Европын холбооны санхүүжилттэй ARTEST төслийн хүрээнд зохион байгуулж буй “Digital Humanities Mongolia – 2024” олон улсын эрдэм шинжилгээний хурал боллоо. Хурлыг Японы International Institute for Digital Humanities хамтран санхүүжүүлж дэмжлэг үзүүлж, Prof. Kiyonori Nagasaki зочин илтгэгчээр оролцсон бөгөөд тус олон улсын хуралд Грек, Итали, Герман, Кипр, Япон, Монголын дижитал хүмүүнлэгийн ухааны салбарын эрдэмтэн судлаачид оролцож олон сонирхолтой илтгэл хэлэлцүүллээ.
Дижитал хүмүүнлэг гэсэн ойлголт нь технологи, хүний бүтээлч байдал, соёлын өв гүн гүнзгий огтлолцдог өвөрмөц салбар бөгөөд энэ удаагийн хуралд дижитал урлаг, соёлын өв, хүн судлал, археологи, сурган хүмүүжүүлэх ухаан зэрэг олон салбар, чиглэлийн эрдэмтэд оролцож өгөгдөл олборлох, дижитал архив, хиймэл оюун ухаан зэрэг шинэ технологиуд нийгэм, хүмүүнлэгийн ухааны салбарт эрдэм шинжилгээ, судалгааны олон шинэ чиглэл үүсгэж буйг онцолж байв.
“Digital Humanities Mongolia 2024” олон улсын эрдэм шинжилгээний хурал шинэ үеийн, шинэ технологийн тусламжтайгаар урьд өмнө ашиглагдаж, хэрэглэгдэж байгаагүй арга хэлбэр, агуулгаар түүхийг ярьж, соёлын өвийг хадгалж, хүний зан үйлийг тодорхойлох боломжуудыг харуулсан үйл явдал боллоо.
Дашрамд дурдахад, “Enhancing education programmes in Arts and Humanities via European STEM methods and tools” буюу ARTEST төсөл нь 2021-2025 оны хооронд хэрэгжиж буй төсөл бөгөөд Монгол Улсын хүмүүнлэгийн ухааны боловсролыг Европын стандарт, судалгаа, практикт нийцүүлэн шинэчлэх, боловсролын дижитал аргыг нэвтрүүлэх замаар хөдөлмөрийн зах зээлийн сүүлийн үеийн чиг хандлагад нийцүүлэн сайжруулах зорилготой юм. Төслийн хамтрагчаар Монгол Улсаас МУИС, ШУТИС, СУИС, Хүмүүнлэгийн ухааны их сургууль, Отгонтэнгэр их сургууль ажиллаж байна.
