Шинжлэх Ухааны Сургуулийн Биологийн тэнхим Хөвсгөлийн байгалийн цогцолбор газарт “Хөвсгөл орчмын экосистемд уур амьсгалын өөрчлөлт ба газар ашиглалтын үзүүлэх нөлөөг үнэлэх нь” төслийг АНУ-ын Хүнс, Эрүүл мэнд, Хамгаалал сангийн санхүүжилтээр 2020 оноос 2024 он хүртэл хэрэгжүүлнэ. Уг төслийг МУИС-ийн Хэрэглээний Шинжлэх Ухаан, Инженерчлэлийн Сургуулийн Хүрээлэн буй орчин ба Ойн инженерчлэлийн тэнхим, МУБИС-ийн Математик, Байгалийн Ухааны Сургуулийн Биологийн тэнхим, ХААИС-ийн Агро-Экологийн Сургуулийн Экологийн тэнхим, ШУА-ийн Ботаникийн Цэцэрлэгт Хүрээлэн болон Газарзүй, Гео-Экологийн Хүрээлэн хамтран хэрэгжүүлнэ.
Хөвсгөл нуур орчмын экосистем нь Сибирийн бореалын ой болон үргэлжилсэн тархалттай цэвдгийн урд хил дээр байрладаг учраас уур амьсгалын өөрчлөлт болон газар ашиглалтын нөлөөнд эмзэг экосистем. Иймээс ОХУ-ын Эрхүүгийн Их Сургууль болон МУИС-ийн хамтарсан биологийн иж бүрэн экспедиц 1970-аас 1990-ээд оны дунд хүртэл тус бүс нутагт ажиллаж олон арван судалгааны бүтээлийг туурвисан. 1990-ээд оноос хойш АНУ-ын Филадельфийн Байгалийн Шинжлэх Ухааны Академи ба Пенсильваний Их Сургууль нь Дэлхийн Банк, Даян Дэлхийн Сан, АНУ-ын Үндэсний Шинжлэх Ухааны Сангийн санхүүжилтээр хэд хэдэн удаагийн төслүүдийг хэрэгжүүлээд байгаа билээ. Эдгээрээс 2002-2007 онд хэрэгжсэн “Хөвсгөлийн байгалийн цогцолборт газар дахь биологийн төрөл зүйлийн хомсдол болон цэвдгийн гэсэлтийн динамик” төсөл нь экосистемийг бүхэлд нь хамарсан цогц судалгаа хийснээрээ онцлог юм. Мөн уг төсөл нь Монголын байгаль орчны салбарт мэргэжилтэн бэлтгэх зорилгын хүрээнд 20 орчим залуу судлаачдыг судалгаанд хамруулан дотоод, гадаадын их дээд сургуулиудад эрдмийн зэрэг хамгаалах нөхцөлийг бүрдүүлж өгсөн. Эдгээр судлаачид хорин жилийн дараа нэгдэн Хөвcгөл нуур орчмын экосистемд сүүлийн хорин жилд гарсан өөрчлөлтийг илрүүлэхээр уг төслийн санхүүжилтийг АНУ-ын Хүнс, Эрүүл мэнд, Хамгаалал сангаас авч судалгаагаа 2022 оны 4-р сард эхлүүлэх гэж байна.
