Монгол Улсын Их Сургуулийн түүхт 80 жилийн ойн хүрээнд мөн Монгол улсад газрын харилцааны салбар үүсэж байгуулагдсаны 67 жилийн ой, Газрын харилцааны салбарын ажилтны өдрийг угтан “Ж.Наранцацралт агсны нэрэмжит Газрын харилцааны салбарын оюутны эрдэм шинжилгээний бага хурал”-ыг МУИС-ийн Газарзүйн тэнхим, Наранцацралт сан болон Газар зохион байгуулалт, Геодези, Зураг зүйн газар зэрэг байгууллагуудтайгаа хамтран 2022 оны 4 дүгээр сарын 19-ний өдөр МУИС-ийн Номын сангийн хурлын танхимд амжилттай болж өндөрлөлөө.
Эрдэм шинжилгээний хурлын үндсэн зорилго нь Газрын харилцаа, Газар зохион байгуулалтын чиглэлээр суралцаж байгаа болон холбогдох чиглэлийн хүрээнд судалгааны ажил бичиж буй бакалаврын түвшний оюутнуудыг хамруулах, эрдэм шинжилгээний ажлыг дүгнэх, шилдэг бүтээлийг урамшуулах, сурталчлан таниулах, тэдний эрдэм шинжилгээний ажил гүйцэтгэх мэдлэг, ур чадварыг нэмэгдүүлэх, харилцан туршлагаа солилцох боломжийг олгоход чиглэдэг болно.
Тус хурал нь 2017 оноос хойш зохион байгуулагдаж ирсэн улсын чанартай хурал бөгөөд цар тахалтай холбоотойгоор 2020, 2021 оны хурлууд цуцлагдаж байсан хэдий ч энэ жилийн хувьд уламжлалынхаа дагуу боллоо.
Хурал зохион байгуулахад зөвхөн дээр нэр дурдсан байгууллагуудаас гадна салбарын үе үеийн эрдэмтэн багш нар, судлаачид, салбарын мэргэжилтнүүд болон мэргэжлийн байгууллагуудын оролцоо, дэмжлэг өндөр байдгийг энд онцлох нь зүйтэй.
Хуралд уригдаж оролцсон хүндэт зочид, төлөөлөгчид болон дэмжигч байгууллагуудын төлөөллөөс энд дурдвал МУИС-ийн Газарзүйн тэнхимийн эрхлэгч, Профессор В.Батцэнгэл, мөн тус тэнхимийн Зөвлөх профессор Б.Чинбат болон, МУ-ын Ерөнхий сайд асан Ж.Наранцацралт агсны хүү Н.Тулга, мөн Монголын Газар зохион байгуулагчдын холбооны Дэд тэргүүн МУ-ын Зөвлөх инженер, Доктор Ж.Даваабаатар, Нийслэл Улаанбаатар хотын орлогч дарга асан, Доктор С.Очирбат, ГЗБГЗЗГ-ын зарим төлөөлөл, “Геоботаник” ХХК, “Ланд Овнер” ХХК, ШУТИС, ГУУС, Геодезийн салбар болон ХААИС-ийн Агроэкологийн сургуулийн Газрын менежментийн тэнхимээс зэрэг байгууллагуудаас төлөөллөөс уригдан оролцлоо.
Энэ удаагийн хурлын 2-р шатанд 10 илтгэл шалгарч хуралд илтгэлээ хэлэлцүүлсэн бөгөөд байр эзэлсэн байдлыг дор танилцуулбал:
1-р байр: ХААИС, АЭС, Газрын менежментийн тэнхим, Газрын үнэлгээ-IV түвшний оюутан Б.Номин “Орон сууцны үнэд нөлөөлөх орон зайн хүчин зүйлсийг ‘Хедоник’ загвараар тодорхойлох боломж /Улаанбаатар хотын БЗД-ийн зарим хороодын жишээн дээр/”;
2-р байр: МУИС, ШУС, Газарзүйн тэнхим, Хот ба бүс нутгийн төлөвлөлт-IV түвшний оюутан О.Оюунтуяа “Дуу чимээний бохирдол сурлагын амжилтад нөлөөлөх нь /ЕБС-ийн сурагчдын жишээн дээр/”;
3-р байр: ХААИС, АЭС, Газрын менежментийн тэнхим, Газар зохион байгуулалт-IV түвшний оюутан Э.Оюунбилэг, Б.Намсрайцэрэн нарын “Хөв цөөрөм байгуулах боломжит байршлыг ‘Archydro’ загвар болон тохиромжтой байдлын үнэлгээгээр тодорхойлох нь”;
Тусгай байр: МУИС, ШУС, Газарзүйн тэнхим, Байгаль орчныг зайнаас тандан судлал-IV түвшний оюутан Ц.Мөнхзаяа “Зайнаас тандан судлалыг газрын доройтлыг тодорхойлоход ашиглах нь” зэрэг сэдэвт судалгааны ажлууд байр эзэлсэн болно.
Хуралд илтгэлээ ирүүлсэн нийт оюутнууд болон хуралд оролцсон хүндэт зочид, төлөөлөгчдөдөө цаашдынх нь эрдэм судлал, ажил мэргэжлийн салбартаа өндөр амжилт гаргахыг хүсэн ерөөе.
Хамтран ажилласан та бүхэнд баярлалаа!
МУИС, ШУС, Газарзүйн тэнхим
