МУИС-ийн Шинжлэх Ухааны Сургуулийн Нийгмийн ухааны салбарын Антропологи, Археологийн тэнхимийн хамт олон 2024 оны оюутны эрдэм шинжилгээний хурлаа гуравдугаар сарын 28-нд МУИС-ийн хичээлийн II байрны 220 тоот танхимд зохион байгуулав. Энэхүү хурал нь жил бүр уламжлал болон зохион байгуулагддаг бөгөөд “археологи”, “антропологи”, “хүн ам зүй” хөтөлбөрийн оюутан суралцагсдын эрдэм шинжилгээ, судалгааны ажлыг дэмжих, арга зүйг сайжруулах, шүүмжлэлт болон бүтээлч сэтгэлгээг хөгжүүлэх, онол практикийн мэдлэгийг гүнзгийрүүлэхэд чухал ач холбогдолтой юм. Эрдэм шинжилгээний хурлын шүүгчээр профессор, доктор У.Эрдэнэбат, доктор, профессор Ц.Болормаа, доктор, профессор М.Эрдэнэ, доктор Ц.Цэцэнцолмон нар ажиллалаа.
Бакалаврын түвшинд МУИС-ийн Шинжлэх Ухааны Сургууль, МУИС-ийн Шинжлэх Ухаан Технологийн Улаанбаатар Парк, МУБИС-ийн нийт 13 оюутан илтгэл хэлэлцүүлснээс тэргүүн байранд МУИС-ийн Антропологи, Археологийн тэнхимийн “Антропологи” хөтөлбөрийн II түвшний оюутан Б.Мөнхжин “Нүүдэлчний шинэ соёл буюу “дижитал нүүдэлчин” сэдэвт илтгэлээр, дэд байранд МУИС-ийн ШУТУБП-ийн III түвшний оюутан Ц.Намуун “Бунхант булшнаас илэрсэн эртний шавжийн үлдэгдэл археологийн судалгаанд шинэ мэдээллийг бий болгох нь” сэдэвт илтгэлээр, гутгаар байранд “Антропологи” хөтөлбөрийн III түвшний оюутан Ц.Мөнхзаяа “Цахим шүтлэг: Тарот мэргэ үе хоорондын ялгааг тодруулж байгаа нь” сэдэвт илтгэл, тусгай байранд “Археологи” хөтөлбөрийн II түвшний оюутан Ё.Адьяалхам, М.Орчлон нарын “Хэмцэгийн чулуун бөмбөлөг”, МУИС-ийн ШУТУБП-ийн III түвшний оюутан Э.Хулан “Монголын үеийн булшнаас илэрсэн нэхмэл эдлэлийн материал судлал” сэдэвт илтгэлээр тус тус шалгарав.
Ахисан түвшний суралцагчийн хувьд тэргүүн байранд МУИС-ийн Антропологи, Археологийн тэнхимийн “Археологи” хөтөлбөрийн магистрант М.Үүрийнтуяа “Хожуу хүрэл, түрүү төмрийн үеийн хүмүүсийн булчингийн маркерын судалгаа”, дэд байранд “Антропологи” хөтөлбөрийн докторант Б.Төгсбуян “Дижитал мэдрэмж: “Лайк”, “Шейр”, “Фоллоу”-ын утга, үнэ цэн” сэдэвт илтгэл, гутгаар байранд “Археологи” хөтөлбөрийн магистрант Б. Эрдэнэсувд “Орхоны хөндий дэх хиргисүүрийн тахилын байгууламжаас гарсан адууны шүдний өвчлөлийн судалгаа” сэдэвт илтгэл, тусгай байранд “Антропологи” хөтөлбөрийн магистрант Б.Анужин “Монгол хүүхдийн хүмүүжил сэтгэл судлалын антропологид”, Tonggalaga “Соёлын констракшн дахь жендэрийн үүрэг: Хятадын хань ба Өвөр Монголын Монголчуудын нийгэмлэгүүдийн харьцуулсан судалгаа” сэдэвт илтгэлээр тус тус байр эзэллээ.
Эрдэм шинжилгээний хуралд идэвхтэй оролцсон оюутан суралцагчдадаа цаашдын сурлага, хөдөлмөр, судалгааны ажилд нь амжилт хүсье!
