Монгол Улсын Ерөнхийлөгчийн ивээл дор зохион байгуулагдсан 1200 төлөөлөгч бүхий Монголын багш нарын YIII их хуралд МУИС-ийн төлөөлөгчөөр Н.Тунгалаг (БС), Д.Гармаа (МТЭС), Ч.Нямгэрэл (ШУС), Д.Оюунцэцэг (ШУС), Г.Баасанжав (УТСОУХНУС) нар оролцов.
Хурлын эхний өдрийн дөрвөн салбар хуралдааны нэг болох дээд боловсролын 93 төлөөлөгч оролцсон хуралдааны үеэр МУИС-ийн төлөөлөгчид дараах чиглэлүүдээр үг хэлж, саналаа илэрхийлэв.
Дээд боловсролын салбар хуралдааны панел хэлэлцүүлэгт Химийн тэнхимийн дэд профессор Ч.Нямгэрэл панелистээр томилогдон оролцож, их дээд сургуулиудын багшийн хангалтыг нэмэгдүүлэх үндсэн хүчин зүйл нь өрсөлдөхүйц цалин гэдгийг онцлов.
Мэдээлэл, компьютерийн ухааны тэнхимийн зөвлөх профессор Д.Гармаа бүх шатны сургалтын чанарыг сайжруулахад сайн багш, сайн хөтөлбөр, сайн орчин нөхцөл, цалин хөлс онцгой чухал үүрэгтэй болохыг, мөн судалгааны их сургуулийг олон төрлийн сургуулиудыг нэгтгэх замаар бус харин судалгааны үр дүн нь улс орны хөгжилд шууд хувь нэмэр оруулдаг, санхүүгийн хувьд бие даах чадвартай “энтрепренер” шинж бүхий байх ёстой гэв. Тухайлбал, эхний ээлжинд мэдээллийн технологи, электроникийн чиглэлийн сургуулийг хөгжүүлэх нь зүйтэй хэмээлээ.
Нээлттэй хэлэлцүүлэгт 40 гаруй төлөөлөгч санал хэлснээс НББТ-ийн зөвлөх профессор Н.Тунгалаг, “Боловсролын салбарыг Монгол Улсын бүсчилсэн хөгжлийн бодлого, бусад салбаруудын хөгжлийн бодлого, эдийн засаг болон татварын хөнгөлөлт чөлөөлөлт, нийслэлийн хүн амын нягтаршлыг буруулах улс орны бодлоготой уялдуулан хөгжүүлэх нь зүйтэй юм. Тухайлбал, Бизнесийн удирдлагаар хангалттай мэргэжилтэн бэлтгэгдсэн гэж ярьж байгаа боловч баруун бүсийн Ховдын багшийн их сургууль, Баянхонгорын ХААИС, Увсын Хөдөлмөрийн дээд сургууль, МУИС-ийн Завхан сургууль зэрэгт Бизнесийн удирдлагын чиглэлээр давхардуулан мэргэжилтэн бэлтгэж байна. Энэ сургуулиудын аль нь ч хөгжихгүйн дээр анхны чиглэлүүдээр нь төрөлжүүлэн, дутагдаж байгаа багш, мал аж ахуй, газар тариалангийн мэргэжилтнүүдээ бүсчлэн бэлтгэх, элсэн суралцагчдыг, багшлах боловсон хүчнийг болон төгсөгчдийг нь орон нутагтаа үлдэн ажиллахад хөшүүрэг болгон орон сууцжуулах, жижиг дунд бизнес эрхлэх эдийн засгийн бодлогоор дэмжих бодлого хэрэгжүүлэх нь зүйтэй байна” гэв.
Нийтийн удирдлагын тэнхимийн эрхлэгч Г.Баасанжав, нэгдүгээрт их дээд сургууль, сургалтын байгууллагын дотоод чанарын баталгаажуулалтын системийг сайжруулах ЧБ-ын нэгжийг бэхжүүлэхэд анхаарах, хоёрдугаарт, их сургуулийн багшийг хөгжүүлэхийн зэрэгцээ захиргааны (сургалтын албаны) ажилтныг хөгжүүлэхэд анхаарах, гуравдугаарт, ахисан түвшний сургалтын хөтөлбөр, магистрант, докторантын судалгааны ажлыг дэмжих, эрчимжүүлэхэд анхаарахыг хөндөж ярив.
Социологи, нийгмийн ажлын тэнхимийн ахлах багш Д.Оюунцэцэг, “гаднын орнуудад их дээд сургуулийн багш нарыг оюутных нь үнэлгээнд түшиглэж цаашид ажиллуулах болон цалинг нэмэх эсэхийг шийддэг. Бид барууны кредит системийн хэлбэрийг авсан мөртлөө агуулгыг авахгүй байна. Өнөөдөр хэн чадаж байгаа нь цалингаа нэмүүлээд цааш ажиллах ёстой. Цалинг бүх хүнд тэгшитгэж нэмнэ гэдгээс илүүтэй, чадаж байгаад нь өгөх зах зээлийн системээ дагамаар байна” гэсэн саналыг хэлэлцүүлэгт оруулав.
Хоёр дахь өдрийн нэгдсэн хуралдаанд Монгол Улсын Ерөнхийлөгч У.Хүрэлсүх, УИХ-ын дарга Г.Занданшатар, Монгол Улсын Ерөнхий сайд Л.Оюун-Эрдэнэ, БШУ-ын сайд Л.Энх-Амгалан, УИХ-ын гишүүн, БСШУС-ын байнгын хорооны дарга Б.Баярсайхан нар оролцон төр засгийн бодлого, шийдвэр, цаашид хэрэгжүүлэх арга хэмжээнүүдийн талаар илтгэл тавив.
Их хурлаас “Багшийн хангалт, шилжилт хөдөлгөөний талаар авах арга хэмжээ”, “Багшийн хөгжил, ёс зүй, нэр хүндийн талаар авах арга хэмжээ”, “Багшийн нийгмийн баталгаа, цалин хөлсний талаар авах арга хэмжээ”, “Сургалтын хөтөлбөр, сурах бичиг, хэрэглэгдэхүүнийг сайжруулах талаар авах арга хэмжээ” гэсэн дөрвөн заалт бүхий тогтоолыг батлав.
Уг тогтоолд тусгасан авч хэрэгжүүлэх 60 орчим арга хэмжээнээс Бүх түвшний сургалтын байгууллагын багшийн хангалтыг нэмэгдүүлэх богино, дунд, урт хугацааны төлөвлөгөө боловсруулан баталж, шаардлагатай санхүүжилтийг хийх, Мэргэжлийн болон техникийн боловсролын багш бэлтгэх тогтолцоог их, дээд сургуулийг түшиглэн бий болгох зэрэг 20 орчим нь их дээд сургуультай холбоотой заалтууд оров.
Нэгдсэн хуралдааны үеэр 2024 онд Багш бэлтгэх бакалаврын сургалтын үндсэн хөтөлбөрөөр, эрэлттэй мэргэжлээр сурч буй нэгдүгээр дамжааны 4100 суралцагчдын төлөөлөл 10 оюутанд, Боловсролын ерөнхий хуулийн 13.3.6-д зааснаар 15-аас дээш жил боловсролын салбарт тасралтгүй ажилласан багш, ажилтны төрийн өмчийн дээд боловсролын байгууллагад эрэлттэй, тэргүүлэх мэргэжлээр суралцаж 580 хүүхдийн төлөөлөл 10 оюутанд, мөн тухайн орон нутгийн захиалгаар, эсхүл өөрийн хүсэлтээр орон нутагт гурваас дээш жил ажиллах 108 багшид магистрын хөтөлбөрт хамрагдахад дэмжлэг үзүүлж байгаагийн төлөөлөл 10 багшид тэтгэлэг гардууллаа.
