МУИС нь 2018 оноос хойш оюутныг дэмжих үйлчилгээний нэг төрөл болох “Хөгжлийн бэрхшээлтэй суралцагчийг дэмжих үйлчилгээ”-г эрчимтэй хөгжүүлэх асуудлыг чухал зорилт болгон хэрэгжүүлж ирсэн. Юуны түрүүнд хөгжлийн бэрхшээлтэй суралцагчдын судалгааг гаргаж, тэднээс хэрэгцээний судалгаа авч, хэрэгжүүлэх асуудлаа эрэмбэлсэн. Хөгжлийн бэрхшээлтэй суралцагчийн хамгийн чухал хэрэгцээ бол хичээл сонголт түүнтэй холбоотойгоор хичээлийн байр, өрөөний сонголт хийх асуудал чухал хэрэгцээ буюу тулгамдсан асуудал гэж үнэлсэн. Энэхүү асуудлыг “МУИС-ийн сургалтын үйл ажиллагааны журам”-ын 4.3.21-д тодорхой заалт болгон оруулж шийдвэрлүүлсэн билээ. Иймээс дараагийн тулгамдаж буй асуудлуудыг шийдвэрлэхийн тулд судалгаанд түшиглэсэн хөтөлбөр боловсруулахаар зорьсон.
Судалгааны хүрээнд орчны дэд бүтцийн асуудлуудыг шийдвэрлэх, хөгжлийн бэрхшээлийн хэлбэрээс хамааран суралцагч бүрд тулгарч буй хэрэгцээ шаардлага, асуудлуудыг өөр өөрөөр шийдвэрлэх, мэдээлэл өгөх, сурах орчин, нөхцөл байдлаа бүрдүүлэхэд өөрсдийн оролцоо чухал гэдгийг ойлгуулах, идэвхжүүлэх, бусад суралцагчдад зөв мэдээлэл, нөлөөллийн ажлуудыг хийх шаардлагатай байгаа нь уг судалгаанаас харагдсан. Хөгжлийн бэрхшээлтэй суралцагчдын суралцах үйл явцад хөгжлийн хөтөлбөр чухал ач холбогдолтой бөгөөд дэлхий дахинаа эдгээр бэрхшээлийг даван туулахад шаардлагатай “тохируулга”-д суурилсан хөтөлбөрөөр дамжуулан бэрхшээлийг даван туулж, хөтөлбөрийг хэрэгжүүлдэг олон туршлагууд байдаг. МУИС нь энэхүү хөтөлбөрийг боловсруулах явцад хийсэн судалгааны дүгнэлтүүд, уулзалт ярилцлага, хэлэлцүүлгээс гарсан санал, зөвлөмжүүд санхүүжилтийн тооцоолол, шалгуур үзүүлэлтүүд, хөтөлбөр хэрэгжүүлэх үйл ажиллагааны төлөвлөгөөний төсөл зэргийг үндэслэн хөгжлийн бэрхшээлтэй суралцагчдыг дэмжих, бэрхшээлийг даван туулахад шаардлагатай “тохируулга”-ыг хөтөлбөрөөр дамжуулан хэрэгжүүлэх боломжтойг тодорхойлсон.
Хөгжлийн бэрхшээлтэй суралцагчийг дэмжих дунд хугацааны хөгжлийн хөтөлбөрийг боловсруулан МУИС-ийн Захирлын 2019 оны 12 дугаар сарын 30-ны өдрийн А/568 тоот тушаалаар батлуулсан. Уг хөтөлбөрийн хүрээнд Оюутны хөгжлийн төвийн эрхлэгч, гэрээт мэргэжилтэн, мэргэжилтэн нарын бэлтгэсэн “Хичээлийн тохируулга үйлчилгээ” багш, оюутанд зориулсан зөвлөмж хэвлэгдэн гарлаа.
Сургалтын орчин, суралцах үйл явц, олон нийтийн үйл ажиллагааг хүртээмжтэй болгохын тулд мэргэжлийн тэнхимүүдтэй Оюутны хөгжлийн төвийн хичээлийн тохируулга үйлчилгээ хариуцсан баг хамтран ажиллах шаардлагатай болж байна. Хүртээмжтэйгээр тэгш хамруулах боловсролын орчин бүрдүүлэхээр зорьж буй энэхүү ажил нь Монгол Улсын хэмжээнд тэр дундаа Их, дээд сургуулиудын хувьд маш шинэлэг ажлын эхлэл болж байна. Хичээлийн тохируулга үйлчилгээний зорилго нь тухайн суралцагчид үр дүнтэй байх тохируулгыг боловсруулж хэрэгжүүлснээр хөгжлийн бэрхшээлтэй суралцагчид бусад суралцагчдын нэгэн адил мэдлэг, чадвар, дадал эзэмшээд зогсохгүй өөрийн хичээл зүтгэл, чармайлтаа шударгаар үнэлүүлэх боломжийг нэмэгдүүлдэгт оршино. Олон улсын туршлагаас харахад хөгжлийн бэрхшээл буюу чадвар алдалттай болох нь албан ёсоор нотлогдсон байвал энэхүү үйлчилгээг заавал авах шаардлагатай гэж үздэг байна. Ингэж өөрт үр дүнтэй оновчтой тохируулга хэрэглэн суралцаж, шалгалтаа өгөх боломжтой болсноор хөгжлийн бэрхшээлтэй суралцагчдын сурлагын амжилт болон төгсөлтийн хувь эрс нэмэгддэг гэсэн судалгаа байдаг. Энэхүү гарын авлагаас тохируулга үйлчилгээ үзүүлэхэд ямар бодлого, журам, процесс үйлчилдэг болохыг ерөнхийд нь ойлгох бөгөөд багш, суралцагч, үйлчилгээ үзүүлэгч талуудын хоорондын уялдаа холбоо, хамтын ажиллагаа ямар чухал болохыг тодорхой харах болно.
Манай төвийн хичээлийн тохируулга үйлчилгээ хариуцсан баг багш, суралцагч нарт зориулсан “Хичээлийн тохируулга үйлчилгээ” зөвлөмжийг тэнхим бүрд үндсэн багшийн тоогоор хүргэн ажиллаж байна.
ОЮУТНЫ ХӨГЖЛИЙН ТӨВ
