Сүмитомо корпорацийн нэрэмжит тэтгэлэг нь хоёр орны харилцан ойлголцлыг бэхжүүлэх, хөгжүүлэх хүрээнд Монгол Улсын нийгмийн сайн сайхны төлөө, ирээдүйн шилдэг боловсон хүчнийг дэмжих зорилготойгоор тэтгэлгийг 30 дахь жилдээ олгож байна. Тэтгэлгийг үргэлжлүүлэн авах болзол хангасан 24 суралцагч, шинээр шалгарсан зургаан суралцагч, нийт 30 суралцагч 700 доллартай тэнцэх хэмжээний тэтгэлэг авлаа.
Тэтгэлэг гардуулах ёслолын үйл ажиллагааг нээж Оюутны хөгжил эрхэлсэн проректор, доктор Г.Галбаяр үг хэллээ. Тэрбээр, “Юуны өмнө Сүмитомо корпорацийн нэрэмжит тэтгэлгийг гардан авах болзол хангасан 30 оюутандаа МУИС-ийн захиргаа, хамт олныхоо нэрийн өмнөөс талархал илэрхийлье. Сүмитомо корпораци нь Азийн орнуудын ирээдүйн чадварлаг боловсон хүчнийг дэмжих зорилгоор сургалтын тэтгэлэгт хөтөлбөрийг 1996 оноос хэрэгжүүлж эхэлсэн бөгөөд МУИС-тай байгуулсан хамтын ажиллагааны гэрээний хүрээнд 30 дахь жилдээ нэрэмжит тэтгэлгээ гардуулах гэж байна. Уг тэтгэлэгт болзол шалгуураа хангавал төгстөл нь үргэлжлүүлэн олгодгоороо онцлогтой. Нөгөө талаас МУИС нь гадаад, дотоодын 40 гаруй байгууллага, хувь хүн, сангийн нэрэмжит тэтгэлгийг олгож байгаа. Эдгээр тэтгэлгүүдээс хамгийн олон оюутанд тэтгэлэг олгодгоороо Сүмитомо корпорацийн нэрэмжит тэтгэлэг онцлогтой. Энэ хичээлийн жилд үргэлжлүүлэн тэтгэлэг хүртэж байгаа 24, шинээр сонгогдон шалгарсан зургаан оюутан хамрагдсан байна. Тиймээс япон ёс заншлаар бол өмнөх тэтгэлэгт оюутнууд нь шинээр тэтгэлэгт шалгарсан дүү нартаа тэтгэлгийн онцлог, давуу талыг тайлбарлаж заавар зөвлөмж өгч, цаашид үргэлжлүүлэн авахын төлөө хамтдаа хичээгээрэй. МУИС нь тэтгэлэг олгох нийтлэг дүрэм журамтай. Бусад тэтгэлгийн адил маш шударга зохион байгуулдаг. Ер нь сүүлийн жилүүдэд хэл ам гараагүй. Тэтгэлэг өгч байгаа байгууллага, хувь хүн, сангийн нэрэмжит тэтгэлэг бүр өөр өөрийн шалгуур дүрэм журамтай бөгөөд хоёр талын дүрэм журамд нийцүүлэн нийтэд ил мэдээлэлдэг. Нийт ирсэн материалуудын сонгон шалгаруулалт хийх ажлын хэсгийн комисс байгуулж, анхан шатанд шалгарсан 10 оюутныг тэтгэлэг олгогч талд илгээсэн. Эцсийн шатанд СК ярилцлага авч зургаан оюутан шалгарсан. Тэтгэлэг авах нэг хэрэг. Зөв зүйлд зарцуулах, зорилгоо ухамсарлаж хариуцлагатай хүн байж, өөрийгөө хөгжүүлэхэд зориулаарай. Ингээд Сүмитомо корпорацийн нэрэмжит тэтгэлэг хүртэж байгаа оюутнууддаа баяр хүргэж, цаашдын сурлага хөдөлмөрт нь амжилт хүсье. Мөн энэхүү тэтгэлгийг олон жил тогтвортой хэрэгжүүлж байгаа Сүмитомо корпорацийн хамт олондоо талархал илэрхийлье” гэв.
Сүмитомо корпорацийн Улаанбаатар дахь Төлөөлөгчийн газрын дарга Югэ Ясүши мэндчилгээ дэвшүүллээ. Югэ Ясүши (Mr.Yuge Yasushi) хэлэхдээ, “Хүндэт Их сургуулийн Оюутны хөгжил эрхэлсэн проректор Г.Галбаяр, Оюутны хөгжлийн бодлогын газрын дарга В.Дашдаваа, Оюутны хөгжлийн төвийн эрхлэгч М.Эрдэнэчимэг, тус төвийн ахлах мэргэжилтэн Л.Чинзориг, мэргэжилтэн Ц.Энхтайван болон энд оролцож буй та бүхэнд энэ өдрийн мэнд хүргэе.
Нийгэмд хувь нэмрээ оруулах ажлын хүрээнд олон жилийн турш үргэлжлүүлсээр ирсэн Сүмитомо корпорацийн нэрэмжит тэтгэлгийг гардуулах үнэ цэнтэй боломжийг өнөөдөр олгосонд чин сэтгэлээсээ талархаж байгаагаа илэрхийлье.
Энэ жил шинээр Сүмитомо Корпорацийн тэтгэлэгт хамрагдах оюутнууд болон хичээл сурлагадаа шаргуу хөдөлмөрлөсний үр дүнд үргэлжлүүлэн Сүмитомо Корпорацийн тэтгэлэгт хамрагдаж буй бүх оюутнуудад баяр хүргэе. Та бүхэнтэй биечлэн уулзаж, тэтгэлэг гардуулж байгаадаа маш их баяртай байна.
Дашрамд дурдахад, намайг Югэ гэдэг. Би Сүмитомо корпорацийн Улаанбаатар дахь төлөөлөгчийн газрын даргаар ажилладаг бөгөөд та бүхэнтэй анх удаа уулзаж байна. Би өнгөрсөн оны дөрөвдүгээр сараас хойш өмнөх дарга Инабагийн ажлыг үргэлжлүүлэн авч Сүмитомо корпорацийн Улаанбаатар дахь төлөөлөгчийн газрын даргаар томилогдон ажиллаж байна.Өнөөдрийн тэтгэлэг гардуулах ёслол дээр би хоёр зүйлийг хэлэхийг хүсэж байна. Эхнийх нь сүүлийн үед Японы сүмогийн ертөнцөд анхаарал татаж байгаа сэдэв юм. Монголд ч бас сүмо өргөнөөр түгэн дэлгэрсэн бөгөөд Монголоос маш олон хүн Японд ирж, Японы сүмогийн ертөнцөд идэвхтэй барилдаж, Ёкозүна сүмочид олноор төрснийг та бүхэн мэдэж байгаа. Саяхан гуравдугаар сард болсон Осакагийн башё тэмцээнд шинэхэн бөх Такэрүфүжи хэмээх залуу бөх түрүүлж аварга болсон. Сүмогийн тэмцээнд ч гэсэн эрэмбэ зэрэг байдаг бөгөөд тэдний дундаас хамгийн өндөр цолтой нь Макуноүчи дээд зиндаа нь юм. Такерүфүжи дээд зиндаанд дэвшиж, эхний тэмцээндээ ийнхүү түрүүлсэн. Энэ нь сүмогийн түүхэнд сүүлийн 110 жилд анх удаа ийм амжилт үзүүлж байна. Барилдаан 15 хоногийн турш өрсөлддөг ч Такэрүфүжи түрүүлэхийн өмнөх 14 дэх өдөр баруун хөлөө гэмтээж, өөрөө алхаж чадахгүй эмнэлэгт хүргэгдсэн. Сүүлийн өдөр түүний гарч ирэх эсэх нь эргэлзээтэй байсан ч өмнөх орой нь Такэрүфүжигийн хүндэлж, биширдэг, өөртэй нь нэг дэвжээний сүмоч Монгол Ёкозүна Тэрүнофүжи түүнд хандан Түүхэнд тэмдэглэгдэхээсээ илүү түүхэнд мартагдашгүй сумогийн эзэн болж, ялагдсан ч эцсээ хүртэл барилдах нь чухал хэмээн Такэрүфүжид урам өгч, “Чи л чадна” гэж хэлсэн. Эдгээр үгийг сонсоод Такафүжи хачирхалтай нь бие даан алхаж чадахаар барах уу түрүүлсэн байна. Та бүхэн итгэж чадах уу? Үүнээс миний хэлэхийг хүссэн зүйл бол сэтгэл санааны дэмжлэг үзүүлж зөвлөгчид буюу ментор гэж байдаг. Ментор гэдэг нь таны одоо сурч байгаа сургууль, их амьдралд хөл тавьсны дараах ажил алба, тэр ч байтугай хувийн амьдралын тань талаар үнэтэй, чухал заавар зөвлөгөө өгөх хүн юм.
Амьдралдаа урагшлах тусам янз бүрийн зүйлд санаа зовж, хэцүү шийдвэр гаргах үе гарч ирнэ. Тэр үед өөрийнхөөрөө сайн тунгаан бодох нь чухал ч, тэр хүн бол намайг сонсож, зөв зүг рүү чиглүүлж хэлж өгдөг, чиний хүндэлж чаддаг хүн байгаа эсэх нь таны дараагийн шийдвэр, сонголтод ихээхэн нөлөөлнө. Сургуулийн багш, дээд ангийн ах эгч, найз, гэр бүлийн гишүүн, хамаатан садан байна уу хамаагүй өөрт итгэж болох хүнээ олж, сэтгэлээ үнэнчээр илэрхийлж, шударга зөвлөгөөг сонсоорой. Хэрэв танд сайн зөвлөгч олдвол амьдрал тань улам гэрэлтэж, магадгүй цаашдаа өөрөө ч гэсэн хэн нэгний зөвлөгчөөр ажиллах хүн болохыг зорьж чадвал би баяртай байх болно.
Хоёр дахь хэлэхийг хүссэн зүйл бол та бүхэн сүүлийн үед маш ихээр харж, сонссон байж болох D&I (Diversity & Inclusion) тухай юм. D&I нь олон талт байдал, оролцоог илэрхийлдэг бөгөөд хурдацтай өөрчлөгдөж буй өнөөгийн ертөнцөд энэ нь байгууллагын гүйцэтгэлийг сайжруулах чухал ойлголт бөгөөд ялангуяа бизнесийн салбарт өргөн хэрэглэгдэж байна. Янз бүрийн үндэс угсаа, соёл иргэншилтэй хүмүүс нэгдэж, нийгмийн өрөөсгөл үзэл, ялгавартай байдал оршин байгаа үед өөрсдийн өрөөсгөл ойлголтыг танин мэдэж, түүнийгээ даван туулах хэрэгтэй бөгөөд өөр өөр гарал үүсэлтэй хүмүүс бие биедээ хүндэтгэлтэй ханддаг, нээлттэйгээр санаа бодлоо хуваалцах соёлыг бий болгож чадах нь байгууллагад байгаа хүн бүр эдгээр үнэт зүйлсийг ухамсарлаж, тухайн байгууллагад тохирсон соёлыг төлөвшүүлж, өөрчлөлтөд хариу үйлдэл үзүүлэх чадвар сайжирч, тэсвэр тэвчээр нэмэгдэж, шинэ санаа бий болох магадлал нэмэгдэж, үүний үр дүнд байгууллагын оршин тогтнох, өсөх магадлал нэмэгддэг.
Та бүгд өөр өөр гарал үүсэлтэй, өөр өөр гэр бүлийн бүтэцтэй, өөр өөр эцэг эхийн ажил мэргэжилтэй, өвөрмөц орчинд өссөн байгаа. Ийм өөр өөр хүмүүс Их сургууль хэмээх нэгэн бүтцийн доор нэгдэж эрдэм шинжилгээ, судалгаа, хичээлээс гадуурх үйл ажиллагаанд хамтран ажилладаг хүмүүсийн дунд D&I гэсэн ойлголт аль хэдийн бий болсон байдаг. Та үүнийг мэдэхгүй байж магадгүй, гэхдээ та амьдралдаа олон хүмүүстэй уулзаж, өөр өөр сэтгэхүй, үнэт зүйлтэй хүмүүстэй уулзаж байсан байх. Ингэхдээ та өөрийн бодол санаа, үнэт зүйлээ бусад хүнд хэлж, санал бодлоо солилцохын зэрэгцээ өөр өөр сэтгэлгээ, үнэт зүйлсийг хүндэтгэж, ойлгож, хүлээн зөвшөөрч чадаж байна уу. Та өөрийн үзэл бодол, үнэлэмжтэй нийцэхгүй түүнийг хүлээн авахаас татгалзаж, үгүйсгэж, өөрийн санаагаа тууштай баримтлах тохиолдол гардаг уу? Битгий буруугаар ойлгоорой, нөгөө хүнийхээ санаа бодлыг үргэлж хүлээн авч, дагаж мөрдөөрэй гэж хэлэх гэсэнгүй. Заримдаа та соёлын ялгаа, зан заншлын ялгаатай байдлаас болж ойлгоход хэцүү, хүлээн зөвшөөрөхөд хэцүү зүйлтэй тулгардаг, гэхдээ үүнийг эхнээс нь үгүйсгэж, арилгахын оронд эхлээд сонсож, ойлгохыг хичээх тухай хэлж байгаа юм.
Дэлхий даяаршлын чиглэлд улам бүр гүнзгийрэн хөгжиж байгаа бөгөөд та бүхний олонх нь гадаадад суралцах, ажиллах талаар бодож байгаа гэдэгт итгэлтэй байна. Хэрэв тэгвэл та Монголын өөр өөр соёл, өөр өөр зан заншил бүхий D&I-аар зогсохгүй төсөөлж ч байгаагүй өөр өөр үзэл бодол соёлыг мэдрэх болно. Өөр соёл, үнэт зүйлтэй хүмүүстэй харилцахаас айж төвөгшөөлгүй, харин ч сониуч зан гаргаж, санал бодлоо солилцоод үзээрэй. Танай Монголын өвөрмөц үнэт зүйлс, соёл бусад орны хүмүүсийг гайхшируулж, шинэ зүйлийг бүтээх боломжийг олгож магадгүй юм. Эцэст нь хэлэхэд, одоогоос эхлэн та бүхэн өөрсдийн хүсэл мөрөөдлөөр Монгол Улсаа хөгжүүлэх нь гарцаагүй биз ээ. Энэ их хүсэл мөрөөдөлдөө зайлшгүй хүрээрэй. Сүмитомо корпорацийн хувьд ийм мөрөөдөлтэй хүмүүсийг дэмжиж, цаашид ч гэсэн чадах бүхнээрээ туслах болно гэдэгт найдаж байна. Өнөөдөр надад үнэ цэнтэй боломжийг олгосон та бүхэнд талархлаа. Маш их баярлалаа” гэлээ.
Тэтгэлгийн батламж гардуулах ёслолын ажиллагаанд Оюутны хөгжил эрхэлсэн проректор Д-р Г.Галбаяр, Оюутны хөгжлийн бодлогын газрын дарга Д-р. В.Дашдаваа, Оюутны хөгжлийн төвийн эрхлэгч Д-р. М.Эрдэнэчимэг, Япон Улсын Сүмитомо корпорацийн Улаанбаатар дахь төлөөлөгчийн газрын дарга Югэ Ясүши, тэтгэлэг хариуцсан менежер Б.Сансармаа нар шалгарсан суралцагчдад сурлагын амжилт хүсэж тэтгэлгийн батламжийг гардуулан өглөө.
Тэтгэлэг гардан авсан суралцагчдыг төлөөлөн IV түвшний суралцагч Ж.Бүжмаа талархлын үг хэллээ. Ж.Бүжмаа хэлэхдээ, “Энэ танхимд хүрэлцэн ирсэн та бүхэнд энэ сайхан өдрийн мэнд хүргэе. Намайг Бүжмаа гэдэг. Би МУИС-ийн Нийгмийн ажил мэргэжлийн IV түвшинд суралцдаг. Юун түрүүнд Сүмитомо корпорацийн хамт олонд маш их баярлаж, талархаж байгаагаа илэрхийлмээр байна. Миний хувьд өнөөдөр Сүмитомо корпорацийн тэтгэлгийг дөрөв дэх удаагаа гардан авч байна. Шантарсан, баярласан олон өдрүүдийн үр дүн үнэхээр сайхан байна, МУИС-аар овоглосон оюутан насны минь хамгийн дурсамжтай, аз жаргалтай үеүдийн нэг хэсэг нь билээ. Энэхүү тэтгэлэг надад маш олон боломжуудыг олгосон ба аливааг өөрөөр харах өнцгийг нээж, өөртөө итгэх итгэл нэмэгдүүлж, надад маш том үүрэг хариуцлагыг хүлээлгэсэн. Боломж тэр бүр хүн бүрд олддоггүй тиймээс олдсон боломжоо зөв зүйлст зарцуулж чамд итгэсэн итгэлийг алдалгүй улам их хичээгээрэй. Та бүхний ажил, сурлага хөдөлмөрт нь өндөр амжилт хүсье.” хэмээв.
Тэтгэлэгт шинээр хамрагдсан суралцагчдыг төлөөлөн I түвшний суралцагч Б.Батмэнд талархлаа илэрхийллээ. Тэрбээр, “Би Монгол Улсын Их Сургуульд Физик-электроник мэргэжлээр энэ жил элсэн орсон нэгдүгээр курсийн оюутан. Өнөөдөр энэ танхимд ирээд та бүхэнтэй цуг энэхүү тэтгэлгийг албан ёсоор гардаж авч байгаадаа туйлын их баяртай байна. Юун түрүүнд Сүмитомо корпорацийн хамт олон болох ноён Yuge Yasushi мөн Сансармаа эгч танаа бас МУИС-ийн Багш Оюутны Хөгжлийн төвийн ах эгч нар, тэтгэлэг хариуцсан мэргэжилтнүүддээ бүгдэд нь талархаж байгаагаа хэлье. Энэ жил тэтгэлэгт тэнцээд шинээр элсэн орсон нэгдүгээр дамжааны зургаан оюутан байгаа, тэдний төлөөлөл болоод энэ индэр дээр үг хэлж байгаа нь нэр төрийн хэрэг болж байна. Би саяхан болсон нэг түүхийг та бүхэнд ярьж өгөхийг хүссэн, тэр юу вэ гэвэл хэдхэн хоногийн өмнө тэтгэлэгт тэнцсэн хүүхдүүдийн нэрс зарлагдсаны дараа бас нэг энэ тэтгэлэгт өргөдөл явуулаад эхний шатанд тэнцээд дараагийн шатанд тэнцээгүй найзтайгаа уулзсан юм л даа. Тэгсэн манай найз надад “Миний найз миний ганц сайхан тэтгэлгийг авчихлаа шүү” гэж хэлж байсан юм. Эндээс юуг хэлэх гэсэн бэ? гэхээр надаас өөр, биднээс өөр зөндөө олон хүүхэд энэ тэтгэлгийг авах боломж байсан, ийм олон хүүхдийн боломжийг хүртээд энд зогсож байгаа нь нэг талаараа бахархууштай ч нөгөө талаараа маш том үүрэг хариуцлага надад ирж байгаа гэж харж байгаа юм. Тийм болохоор хариуцлагатай байж илүү их хичээж одоо байгаагаасаа илүү сайн хүн болохын төлөө зүтгэх ёстой юм байна гэдгийг маш сайн ойлгуулж байна. Тиймээ илүү их хичээнэ” гэлээ.
2023-2024 оны хичээлийн жилд тэтгэлэг үргэлжлүүлэн авч буй суралцагчид Сүмитомо корпорацид талархал илэрхийлэн мэндчилгээ илгээлээ.
ТЭТГЭЛЭГТ ШАЛГАРСАН СУРАЛЦАГЧДЫН НЭРС
| № | Овог | Нэр | Сургууль | Хөтөлбөр | Түвшин |
|
2023-2024 оны хичээлийн жилд тэтгэлэг үргэлжлүүлэн авах суралцагчид |
|||||
| 1 | Пүрэвдорж | Анарзаяа | ХЗС | Эрх зүй | 5 |
| 2 | Баяраа | Энхнаран | БС | Санхүү | 4 |
| 3 | Батдорж | Мөнхтамир | БС | Санхүү | 4 |
| 4 | Магсаржав | Золмаа | ШУС-ХУС | Гадаад хэл, орон судлал (Хятад) | 4 |
| 5 | Нацаг-Юнгэр | Бат-Ундрал | БС | Санхүү | 4 |
| 6 | Хашбат | Өнөбилэг | ШУС-НУС | Сэтгэл судлал | 4 |
| 7 | Жавгарал | Бүжмаа | ШУС-НУС | Нийгмийн ажил | 4 |
| 8 | Бямба-Эрдэнэ | Содонтуул | УТСОУХНУС | Олон улсын харилцаа | 4 |
| 9 | Даян | Балжинням | МТЭС | Програм хангамж | 4 |
| 10 | Мөнхцэцэг | Үүрийнтуяа | ХЗС | Эрх зүй | 3 |
| 11 | Ганболд | Номин | ХЗС | Эрх зүй | 3 |
| 12 | Төртогтох | Эрдэнэжаргал | ШУС-НУС | Сэтгэл судлал | 3 |
| 13 | Тодхүү | Дуламсүрэн | ШУС-НУС | Сэтгэл судлал | 3 |
| 14 | Серекбай | Жанаргүл | ШУС-ХУС | Гадаад хэлний орчуулга (Англи) | 3 |
| 15 | Батсайхан | Анударь | ХЗС | Эрх зүй | 3 |
| 16 | Дашдэнзэн | Отгонбилэг | ШУС-НУС | Сэтгэл судлал | 4 |
| 17 | Сүхбаатар | Арвинбилэг | БС | Санхүү | 3 |
| 18 | Энхбаатар | Эрдэнэтуул | ШУС-ХУС | Багш, гадаад хэлний боловсрол (Англи) | 2 |
| 19 | Нямсүрэн | Додмаа | ШУС-НУС | Сэтгэл судлал | 2 |
| 20 | Сэнгэсамба | Бадамгарав | МТЭС | Програм хангамж | 2 |
| 21 | Болд | Болортуяа | ШУС-БУС | Хими | 2 |
| 22 | Өнөртуул | Уянга | ШУС-ХУС | Гадаад хэлний орчуулга (Солонгос) | 2 |
| 23 | Наранбаатар | Мөнхжаргал | УТСОУХНУС | Олон улсын харилцаа | 2 |
| 24 | Төмөрбаатар | Дөлгөөн | ХЗС | Эрх зүй | 2 |
|
2023-2024 оны хичээлийн жилд тэтгэлгийн шалгаруулалтанд тэнцсэн суралцагчид |
|||||
| 25 | Балжинням | Анар-Эрдэнэ | БС | Санхүү | 1 |
| 26 | Батчулуун | Аминцэцэг | ШУС-БУС | Аялал жуулчлал | 1 |
| 27 | Батхуяг | Батмэнд | ШУС-БУС | Физик электроник | 1 |
| 28 | Уранчимэг | Долгорсүрэн | БС | Менежмент | 1 |
| 29 | Нямдорж | Лхагваням | БС | Нягтлан бодох бүртгэл | 1 |
| 30 | Болдсайхан | Болорхүү | МТЭС | Хэрэглээний математик | 1 |
ОЮУТНЫ ХӨГЖЛИЙН ТӨВ
ТУС МЭДЭЭТЭЙ ХОЛБООТОЙ АСУУДЛЫГ МУИС-ИЙН ОЮУТНЫ ХӨГЖЛИЙН БОДЛОГЫН ГАЗАР ХАРИУЦНА
