ШУС-ийн дэргэдэх Судалгааны Ёс зүйг Магадлах Зөвлөл нь 2023 оноос үйл ажиллагаагаа явуулж байгаа бөгөөд өнөөг хүртэл 20 орчим хүсэлтийг авч хэлэлцэн зөвшөөрөл олгосон байна. Тус зөвлөлд салбар сургуулиудаас зөвлөлийн даргаар Ч.Тамир (Багш оюутны хөгжил Нийгмийн Ухааны салбар хариуцсан дэд захирал), нарийн бичгийн даргаар Д.Золжаргал (Боловсрол судлалын тэнхимийн дэд профессор), гишүүдээр Н.Алтантөгс (Эрдэм шинжилгээний бодлого зохицуулалт Хүмүүнлэгийн Ухааны салбар хариуцсан дэд захирал), А.Батхишиг (Социологи, Нийгмийн ажлын тэнхимийн дэд профессор), Ц.Нямсүрэн (Философи, шашин судлалын тэнхимийн дэд профессор), Б.Отгонтөгс (Эдийн засгийн тэнхимийн профессор), Б.Очирхуяг (Биологийн тэнхимийн дэд профессор), И.Саруул (Химийн тэнхимийн дэд профессор), Ө.Энэрэлт (Биологийн тэнхимийн дэд профессор) нар ажиллаж байна.
Судалгааны Ёс зүйг Магадлах Зөвлөл нь гишүүдээ чадавхжуулах зорилгоор семинар зохион байгуулдаг бөгөөд энэ удаагийн семинарт Баруун Вашингтоны их сургуулийн профессор Доктор Андреа Россинг МакДауэлл Судалгааны ёс зүйн магадлах хороо (IRB)-ны туршлагын талаар цахимаар оролцон илтгэл тавьсан юм. Тэрээр Баруун Вашингтоны Их Сургуульд Судалгаанд Оролцогцогчдыг Хамгаалах Хөтөлбөрийн (Human Research Protection Program) даргаар сүүлийн нэг жил хагасын турш ажиллаж байна. Энэ хугацаанд тэрээр дээрх хөтөлбөр болон сударгааны ёс зүйг магадлах хорооны (IRB) бодлого журмыг илүү тодорхой болгож, хяналтын үйл явцыг сайжруулан, сургалтын хамрах хүрээг өргөжүүлж, тус хорооны нэр хүндийг их сургуулийн хүрээнд өсгөж чадсан юм. Андреа нь судалгааны ёс зүйг дэмжих, ижил зорилготой байгууллагуудын хоорондын хамтын ажиллагааг бэхжүүлэхийн төлөө бусад их сургуулийн удирдлагуудтай нягт хамтран ажилладаг. Андреа нь өмнө нь 13 жилийн турш Сиэтлийн Их Сургуулийн Ёс Зүйн Хяналтын Хорооны (IRB) даргаар ажиллаж байсан туршлагатай.
Тус семинарт Баруун Вашингтоны их сургуулийн Амьтан хамгаалал болон судалгааны ёс зүй, ашиг сонирхолын зөрчил хариуцсан Тэйлор Гленон, Дотоод Хэргийн Их Сургууль болон Санхүү Эдийн Засгийн Дээд Сургуулиас багш, эрдэмтэд оролцон санал солилцон оролцсон юм.
Семинар нь судалгааны ёс зүйн ойлголт, туршлагыг солилцох, ил тод байдал, шилдэг практикийг түгээх чухал алхам болох бөгөөд цаашдын хамтарсан судалгаа болон IRB-ийн чиглэлээр сургалт, хамтын ажиллагааг өргөжүүлэх талаар идэвхтэй хэлэлцүүлэг өрнүүллээ.
Энэхүү үйл ажиллагаа нь МУИС болон Баруун Вашингтоны их сургуулийн хоорондын хамтын ажиллагааг гүнзгийрүүлж, их сургуулиудын хоорондын хамтын ажиллагааг бэхжүүлэх чухал алхам юм. МУИС цаашид судалгааны ёс зүй, чанарыг дээшлүүлэх чиглэлээр ижил төстэй эрдэм шинжилгээний харилцаа, хамтын ажиллагааг үргэлжлүүлэн хөгжүүлэхээр зорьж байна.
Өмнөх семинаруудад Канадын Бритиш Колумбын Их сургуулийн профессор Жулиан Дэркэс болон АНУ-ын Өмнөд Иллианоисын их сургуулийн профессор Д.Ундрахбуян, Канадын Бритиш Колумбын Ёс зүйн зөвлөлд ажиллаж буй докторант П.Болормаа болон мөн тус сургуулийн Судалгааны Ёс зүйн Хорооны гишүүн Жан Руиз нар оролцон цахимаар оролцон туршлага солилцож байв. Мөн АШУҮИС-ийн профессор Г.Чойжамц анагаах ухааны салбарын ёс зүйн хороо болон судалгааны ёс зүйн талаар туршлага солилцон семинарт илтгэж байв.
