МУИС-ийн ШУС-ийн Биологийн тэнхимийн Экологийн хөтөлбөрийн хамт олон Монголын экологийн нийгэмлэгтэй хамтран экологи, эволюцийн биологийн судалгааны цуврал семинар, сургалтыг зохион байгуулдаг уламжлалтай бөгөөд энэ үйл ажиллагаандаа тухайн салбарын тэргүүлэх судлаач, профессоруудыг гадаадаас урьж оролцуулдаг билээ. 2015 оны тавдугаар сарын 5-нд болсон энэ удаагийн судалгааны семинарт Дани улсын Копенгагений Их Сургуулийн Байгалийн түүхийн музейн Геогенетикийн төвийн Палеомикс группийн эрхлэгч Д-р. Людовик Орландо уригдаж, “Эртний геном, эпигеном ба метагеном: молекул түүхийн эрэлд” сэдвээр судалгааны нээлттэй семинарыг явууллаа. Энэ удаагийн семинарт биологийн чиглэлээр үйл ажиллагаа явуулдаг их дээд сургууль, эрдэм шинжилгээ, байгаль хамгааллын чиглэлэээр үйл ажиллагаа явуулдаг байгууллагын судлаачид, оюутнууд оролцов. 
Д-р. Людовик Орландо нь мөхөж сөнөсөн организмын бүхэл геномын дарааллыг тодорхойлох судалгааны салбарыг тэргүүлэн ажиллаж буй судлаачдын нэг мөн. Эртний геномын судалгааны чиглэлээр олон улсад хүлээн зөвшөөрөгдсөн энэхүү залуу судлаач неандерталь хүний геномын бүхэл дарааллыг анх тодорхойлсон ажил, хэл ярианы хөгжлийг тодорхойлсон гэж үздэг FOXP2 генийг илрүүлсэн нээлт, мөхсөн агуйн баавгай, Якутын адуу зэрэг олон зүйлийн бүхэл геномын дарааллыг тодорхойлсон ажлуудыг гардан хийлцсэн, нэр хүндтэй судлаач юм.
Энэ удаагийн судалгааны семинараар Д-р. Людовик Орландо неандерталь хүн ба адууны овгийн амьтны геномын дараалал, гарал үүсэл ба эволюцийг молекул биологи, биохими, геном ба биостатистик зэрэг салбар шинжлэх ухааны олон аргыг хослуулан хэрэглэсэн зарим үр дүнгээс хэлэлцүүлсэн нь оролцогсдод ихээхэн сонирхолтой байлаа. Ялангуяа гэрийн адуу, тахь, эртний адууны хоорондын эволюцийн хамаарал, тэдгээрийн хоорондын генийн урсгалын талаар гаргасан дүгнэлт нь бидний гэрийн адууны гарал үүсэл, гэрийн адуу-тахийн эволюци хамаарлын талаарх ойлголтыг нэлээд гүнзгийрүүлсэн, тодорхой болгосон ажил байв.
Эволюцийн биологийн сэтгэлгээг чанарын өндөр түвшинд гаргаж байж биологийн бүхий л салбарын хөгжил хангагддаг болох нь өндөр хөгжилтэй улс орнуудын туршлагаас тодорхой байгаа тул манай улсад эволюцийн биологийн чиглэлд ихээхэн ач холбогдол өгөх шаардлага тулгарч байна. Иймд, сүүлийн жилүүдэд Экологийн хөтөлбөрийн хамт олон эволюцийн биологийн өндөр түвшний судлаачдыг урьж, тэднээс суралцах, цаашид судалгаа, оюутан солилцох чиглэлд хамтран ажиллах үүд хаалгыг нээхэд ихээхэн анхаарч байгаагийн нэг илрэл нь энэ удаагийн өндөр түвшний семинар байлаа.
