МУИС: Эрдэм шинжилгээний менежментийн мэдээллийн системийн хөгжүүлэх төслийн саналын урилга

ТӨСЛИЙН НЭР

“МУИС-ийг 2016-2024 онд хөгжүүлэх стратеги төлөвлөгөө”-нд МУИС-ийг СУДАЛГААНЫ их сургууль болгон хөгжүүлэх бодлогын хүрээнд эрдэм шинжилгээний мэдээллийн менежментийн систем хөгжүүлэх

• Эрдэм шинжилгээ, инновацийн хэлтэс, МУИС
• Мэдээллийн Технологийн алба, МУИС
• Номын сан
• МУИС Пресс
• Эрдэм шинжилгээний сэтгүүлийн редакцийн зөвлөл

МУИС-ийг судалгааны их сургууль болгон хөгжүүлэхтэй уялдан МУИС-ийн эрдмийн хамт олны судалгааны ажлын үр дүнд бүтээгдсэн мэдлэгийг бүртгэх, архивлах, үнэлэх, түгээх, үр ашигтай удирдах, өгөгдлийн хайлт, анализ хийх зэрэг зохион байгуулалтын асуудлууд ихээхэн тулгамдсан асуудлууд болоод байна.

Дэлхий нийт глобалчлагдаж, эрх зүй, эдийн засаг, шинжлэх ухаан, технологийн хувьд нэгдэн ойртож буй өнөө үед бүх дэлхий нийтээр мэдээлэл солилцох үүд хаалга нээгдэж байна. Энэхүү мэдээллийн зуунд соргог, зөв, дэвшилттэй мэдээллийг хамгийн түрүүнд олж авсан хүн, албан байгууллага, пүүс компани, улс орон хөгжиж дэвших боломжтой юм. Аливаа хөгжил дэвшил, тэр дундаа мэдээлэл холбооны технологийн хөгжил дэвшил нь хүн төрөлхтний оюуны хэрэгцээ, өдөр тутмын амьдралд үйлчилж цаг хугацаа, орон зайн саад бэрхшээлийг арилгаж байна. Шинжлэх ухаан, техник технологи цаг мөчтэй уралдан асар хурдацтай хөгжиж буй өнөөгийн цаг үетэй зэрэгцэн алхах зайлшгүй шаардлага урган гарч байна.

Өндөр манайд хаанаас хэдийд ч цаг хугацаанаас шалтгаалахгүйгээр мэдээлэл авах, боловсруулах боломж маш хомс байна. Үүнээс шалтгаалан давхардсан үйл ажиллагаа маш ихээр хийгдэж, зөрүүтэй мэдээ, мэдээлэлд цаг хугацаа, үр ашиггүй санхүүжилт, зардал маш ихээр зарцуулагдаж байна.

Уг захиалгын зорилго мэдээллийн технологийн эрчимтэй хөдөлгөөнт орчинд байгаа өнөө үед аль ч байгууллага, их дээд сургуулийн удирдлага, мэргэжилтэн, судлаач, эрдэмтэн, багш, суралцагч, хувь хүн шаардлага хангахуйц мэдээлэл, боловсруулалт хийх боломжит мэдээллийн сан, шуурхай хүргэх, авах, улмаар ухаалаг бодлого, шийдвэр гаргах боломжийг бүрдүүлэх СиСи-гийн Эрдэм шинжилгээний мэдээллийн менежментийн нэгдсэн цахим системийн хөгжүүлэлтийн техник, эдийн засгийн үндэслэл /ТЭЗҮ/-ийг боловсруулах юм.

Тус ТЭЗҮ гадаад, дотоодын эрдэм шинжилгээний мэдлэгийн удирдлагын цахим менежментийн технологид SWOT дүн шинжилгээг хийж системийн хөгжүүлэлтийн зорилго, зорилтууд, үр дүнг тодорхойлно.

Төслийн үр дүнд МУИС-ийн Эрдэм шинжилгээний мэдээллийн менежментийн системийн техник даалгавар бүхий стандартыг тогтоож, тус системийн шинж чанар, түвшинг тодорхойлж системийг загварчилна. Ингэснээр эрдэм шинжилгээний ажлын мэдээллийн сан үүсэхээс гадна профессор багшийн албан тушаалын зэрэглэлийн шалгуур, эрдэм шинжилгээний гүйцэтгэлийн үнэлгээг тооцоолох, мэдлэгийг олон улсын эргэлтэд оруулах боломж олгох юм.

ТӨСЛИЙН ХҮРЭЭНД ХИЙХ АЖИЛ, ХҮЛЭЭГДЭХ ҮР ДҮН

• МУИС-д ашиглаж буй цахим ЭШММС-ийн техник даалгавар, стандарт боловсруулах (Хэрэглэгчийн болон системийн шаардлага);
• ЭШММС-ийг хөгжүүлэх ажилд баримтлан ажиллах тулгуур баримт бичиг, заавар (Системийн документаци) боловсруулан гаргах;
• ЭШММС-ийг хөгжүүлэх;
• Эрдэм шинжилгээ, судалгааны мэдлэгийн сангийн өгөгдлийн хайлтын удирдлагыг сайжруулах;
• Багшийн судалгааны гүйцэтгэлийн хяналтын модулийг үүсгэх
• Дотоодын сэтгүүлийн импакт фактор, өгүүллийн эшлэлийн платформ үүсгэх бодлогын зөвлөмж
• D-Space, Plum X Analytics, Research Gate, Academia.edu, TR In-Site, MongoliaJOL/ http://mongoliajol.info/ системийг судлах
• Номын сан, МУИС пресс, сэтгүүлийн редакцийн менежментийг сайжруулах

Багш, судлаач нарын хувьд:

• Өөрсдийн судалгааны ажлын түүх үүснэ.
• Мэдлэгийн үр ашигтай ашиглах боломжтой
• Өгөгдлийн хайлт хийх боломжтой
• Хамтран ажиллах боломж нэмэгдэн бүтээлч хамтын ажиллагаа, сүлжээ үүсэх боломж нээгдэнэ.
• Судалгааны гүйцэтгэлийн үнэлгээг (Б цагийн үнэлгээ) хянах боломжтой болно.

Магистр, докторын оюутны хувьд:

• Ижил төстэй эрдэм шинжилгээний ажилтай танилцана.

Тэнхмийн эрхлэгч, эрдэмтэн нарийн, удирдлага нарын хувьд:

• Профессор, дэд профессор, багш нарын албан тушаалын зэрэглэлийн шалгуур болон эрдэм шинжилгээний ажлын гүйцэтгэлийн үнэлгээнд ашиглах суурь мэдээллийн бааз болно.
• Эрдэм шинжилгээтэй холбоотой мэдээллийг богино хугацаанд шуурхай олж авах, үнэлгээ хийх, бодлого боловсруулах, тайлагнах шаардлагатай мэдээллийн үүсвэр бий болно.
• Эрдэм шинжилгээний ажлын статистик үзүүлэлтийг харах, үнэлгээ хийх боломжтой болно.

ТЕХНИКИЙН ШААРДЛАГА

• Хэлний шаардлага: Монгол хэл
• Системийн өмчлөгч нь МУИС байна.
• Вэб-д суурилсан систем байна.
• Системийн агуулгын математик, логикийн загварын бичиг баримт
• Мэдээллийн технологийн сүүлийн үеийн дэвшилтэт технологи ашигласан мэдээллийн аюулгүй байдал, нууцлал хамгаалалтыг өндөр түвшинд хангасан байх
• МУИС-ийн мэдээллийн системүүд (SiSi болон бусад)-тэй хамтран ажилладаг байх
•  Систем нь нэгэн зэрэг 1000 хэрэглэгчийг ажиллагаа доголдохгүйгээр дэмждэг байх
• Систем нь үйлдлийн систем, түүний хувилбараас хамааралгүй ажиллах боломжтой мөн ухаалаг утас, таблетанд ажиллах боломжтой байна.
• UNICODE-ыг бүрэн дэмжиж хийгдсэн байх
• Шийдэл нь ирээдүйд шинэчлэгдэх болон сайжруулахад тохиромжтой уян хатан, модулийн болон өргөсөх боломжтой байх
• Хэрэглэгчийн интерфэйс нь хэрэглэхэд хялбар байх
• Төслийн хүрээнд хийгдсэн системтэй холбоотой бүхий л материалыг захиалагч талд өгөх (source code, ашигласан технологи, баримт бичиг гэх мэт)
• Систем нь шаардлагатай лавлагааг өгдөг байх ёстой (Help)
• Систем нь мэдээлэл илгээх, мэдэгдэл өгөх функцүүдтэй байх

Системийн хамрах хүрээ: Монгол Улсын Их Сургууль