Профессор С.Дулам, доктор Г.Нандинбилиг нар Францын Франсуа Раблегийн их сургуульд нэг сарын хугацаатай ажиллаад ирлээ. Францын Сэргэн мандлын соёл, урлагийн төв Тур хотод байдаг энэ их сургуулийн Раблегийн сангаас бүх зардлыг даажээ. Турын их сургуульд саяхан байгуулагдсан ЮНЕСКО-гийн түшиц тэнхим анхны гадаадын зочин профессороор Монголын эрдэмтнийг сонгосон юм байна. Проф. С.Дулам магистр, докторын бүх төвшний оюутнуудад соёлын антрополог, бэлгэдэл зүйн асуудлаар цуврал лекц уншсан байна. Тус сургуулийн ректор, проф. Лойк Вейяан, декан Бернард Руже, тэнхмийн эрхлэгч Марк дө Фериер нар хүлээн авч уулзаад, цаашид хамтран ажиллах хүсэлтэй байгаагаа илэрхийлж, хичээл заалгасан оюутнуудын и-мэйлээр ирүүлсэн талархлыг дамжуулав. Тухайлбал, 2013 онд ЮНЕСКО-гийн түшиц тэнхим, МУИС-ийн нүүдлийн соёл иргэншил судлалын төвтэй хамтран олон улсын эрдэм шинжилгээний хурал зохион байгуулах санал дэвшүүлэв.
Их сургуулийн ректор болон антропологийн тэнхимийн эрхлэгч нарын хамт
Г.Нандинбилиг Леонорда да Винчийн ажлын өрөөнд
С.Дуламын лекц социологийн ангийн оюутнуудад
Тур хот бол Францын үе үеийн хаадын олон зуун шилтгээн бүхүй түүх, соёлын төв, аугаа их зохиолч Франсуа Рабле, Оноре дө Бальзак, Пиерре Ронсар, их сэтгэгч, гүн ухаантан,математикч Рене Декарт нарын төрсөн нутаг гэдгээрээ алдартай бөгөөд франц хэлний хамгийн цэвэр аялгуутай нутаг гэгддэг юм байна. Иймд доктор Г.Нандинбилиг энэ сургуулийн франц хэл, уран зохиол заадаг багш, профессоруудтай уулзаж, орчин үеийн уран зохиолын чиг хандлага, дунд сургуульд уран зохиол заах аргын талаар зөвлөгөө авлаа. Мөн Шенонсо дахь хатан хаан Катерин Медич, Луйз Лорен, Диана дө Пуатиер нарын ордон шилтгээн, Амбуаз дахь франц хаадын шилтгээн, Кло Люсе дэх Леонардо да Винчийн амьдралынхаа сүүлийн жилүүдийг өнгөрүүлсэн шилтгээн, бүтээл туурвилын үзэсгэлэнг үзэж сонирхов.
Франц хэлээр соёлын антрополог, бэлгэдэл зүйн чиглэлээр уншсан эдгээр цуврал лекц бол МУИС байгуулагдсаны 70 жилийн ойд зориулсан проф. С.Дуламын бэлэг юм байна.
