МУИС-ийн оюутны ” PIE” нэгдлээс санаачлан МУИС-ийн бүх бүрэлдэхүүн сургуулийн оюутнуудын оролцоотойгоор төрөлхи сургуулийнхаа 70 жилийн ойд зориулан “FUTURE MONGOLIA – VISION 2050” фестивалийн хүрээнд зохион байгуулж буй оюутны бүтээлийн үзэсгэлэн өнөөдөр нээлтээ хийлээ. Тус үзэсгэлэнд “Робокон” болон “Залуу зохион бүтээгч” зэрэг наадамд түрүүлж, шагнал хүртэж байсан роботуудаас гадна цагаан будаа, самрын яс, шилний хагархай, цаас, эвдэрсэн компьютерийн гар гэх мэт хаягдал бүтээгдэхүүн ашиглан хийсэн 100 гаруй бүтээлийг дэлгэн тавьжээ.
Үүний дотор 1942 онд байгуулагдсан дээд боловсролын ууган байгууллага – их сургуульдаа зориулан 1942 ширхэг рубикийн шоогоор эвлүүлэн бүтээсэн МУИС-ийн 70 жилийн ойн лого бүхий самбар олны анхаарлыг ихэд татаж байлаа. 2,8м*2м харьцаатай энэхүү самбараа сургуулийнхаа музейд дурсгал болгон хадгалуулна хэмээн оюутнууд ярьсан юм. Урьд өмнө манай улсад дээд тал нь 1000 ширхэг шоо ашиглан хийсэн бүтээлүүд л байдаг байсан бол энэ удаа МУИС-ийн оюутнууд монголд анх удаа ийм олон шоогоор энэхүү самбарыг урлан бүтээсэн байна.
“Оюутнууд хичээлээс гадна найз нөхдийн хүрээгээ өргөжүүлэх, сонирхлынхоо дагуу нэгдэж хоббигоо хөгжүүлэх, чөлөөт цагаа зөв боловсон өнгөрүүлэх зорилготой байгуулагдан үйл ажиллагаагаа явуулдаг манай оюутны нэгдлийн үйл ажиллагаа улам өргөжин тэлж МУИС-ийн хэмжээнд энэхүү фистевалийг жил бүр уламжлал болгон зохион байгуулж байхаар төлөвлөөд байгаа. Оюутнууд маань маш идэвхитэй оролцож, ялангуяа сургуулийнхаа 70 жилийн ойд зориулан өөрсдийн гараар бүтээсэн зүйлсээрээ үзэсгэлэн гаргаж, заримыг нь сургуулийнхаа музейд дурсгал болгож байгаадаа сэтгэл маш өндөр байна. Үзэсгэлэн гаргахаар оюутнууд маань өнгөрсөн 7 дугаар сараас хойш бэлдсэн” хэмээн ЭЗС-ийн төгсөгч, PIE нэгдлийн тэргүүн Ч.Алтан-Өлзий ярьсан юм.
Оюутнуудын хүч оюунаа зориулан бүтээсэн ховор сонин, юмханаар юм хийсэн этгээд хачин бүтээлийн энэхүү сонирхолтой үзэсгэлэн МУИС-ийн хичээлийн 1-р байрны 320 тоот танхимд энэ сарын 1-5- ныг дуустал гарна. Та бүхнийг хүрэлцэн ирж сонирхохыг урьж байна.
