МУИС-иас санаачлан “Esan-Үндэсний цахим сан”-гийн дэмжлэгтэйгээр хэрэгжүүлж буй ном, сурах бичгийг цахимжуулж, нийтэд түгээх Цахим сурах бичгийн сангийн нээлт боллоо. Нээлтэд Боловсрол, шинжлэх ухааны сайдын зөвлөх М.Батгэрэл, МУИС-ийн захирал Д.Бадарч, “И Эс Эй Эн” компанийн захирал Ц.Мөнхтүвшин, МУИС-ийн ахмад багш доктор, профессор Ц.Даржаа нар үг хэлж, багш эрдэмтэн судлаачид, ном, сурах бичгийн зохиогчид болон оюутны төлөөлөл оролцов.
Төслийн хүрээнд нийт 30 гаруй эрдэмтэн багш нарын байгалийн шинжлэх ухааны ховор, алдартай сурах бичгүүдийг үнэ төлбөргүй, нээлттэйгээр онлайнд байршуулж, олны хүртээл болгоход бэлэн боллоо.
Нээлтийн үеэр, МУИС-ийн захирал Д.Бадарч, “МУИС-ийн зорилго бол сургалтын хамгийн сайн агуулгыг үнэ төлбөргүйгээр бүх нийтэд хүргэж, өндөр чанартай суралцахуйн үр дүнд хүргэх нөхцөлийг бүрдүүлэх явдал юм. Манай эрдэмтэн судлаачид тэр дундаа ахмад үеийн багш нар маань өөрсдийн эрдэм мэдлэгийн хүчээр бий болгосон үнэ цэнтэй оюуны бүтээлээ сургалтын агуулга болгосон. Энэхүү сургалтын агуулгыг цахим хэлбэрээр нийтэд хүргэх санал тавихад эрдэмтэн багш нар маань дэмжин ажилласанд талархалтай байна. Сурах бичгийг нээлттэй болгоход зохиогчийн эрхийн асуудал яригддаг. Өнөөдөр та бүхэнд танилцуулж буй 30 номын зохиогчид бүтээлийг нь цахим болгож, нээлттэй түгээх эрхийг сургуульдаа шилжүүлэхийг зөвшөөрсөн юм. Ийнхүү МУИС эрдэмтдийнхээ оюуны үнэ цэнтэй санг нийтэд нээлттэй болгож байна. Энэ бол Монголын дээд боловсрол төдийгүй манай улсын боловсролын салбарт гарч буй чухал ач холбогдолтой үйл явдал” хэмээв.
МУИС-ийн зүгээс эрдэмтдийнхээ бүтээсэн мэдлэгийг бүх нийтийн баялаг болгох үүднээс үндсэн суурь сурах бичгүүдээ онлайнаар түгээх ажлыг эхлүүлж байгаа нь манай орны боловсролын чанарыг дээшлүүлэхэд чухал ач холбогдолтой болохыг боловсрол судлаачид үнэлж байна. Ийнхүү оюуны бүтээлийг цахим хэлбэрээр байршуулах нь зохиолч, хэрэглэгч аль аль талдаа ач холбогдолтой болохыг зохион байгуулагчид онцоллоо. Академик түвшний зохиолчдын бүтээл зөвхөн хэвлэмэл хэлбэрээр оюутнуудад хүрдэг. Үүнийг цахим хэлбэрт шилжүүлснээр хүртээмжийг нэмэгдүүлэхээс гадна орон зай үл харгалзан хүссэн бүтээлээ унших боломжтой болох юм.
МУИС-ийн Сургалт хариуцсан захирал Б.Батжаргал, “Энэ удаагийн нийтэд нээлттэй түгээж буй сурах бичгүүдийг МУИС-ийн мэргэжлийн тэнхимүүдээс санал болгосны дагуу ажлын хэсгээр шийдвэрлэж, сонгон шалгаруулсан байгаа. Тус сурах бичгүүдийг зөвхөн МУИС-ийн оюутнууд төдийгүй бусад их, дээд сургуулийн оюутан залуус, ЭЕШ-д бэлдэж буй ЕБС-ийн сурагчид болон бүх түвшний багш нарт үнэ төлбөргүй нээлттэй үзэх боломжийг бий болгож байна. Уг төслөөр орон нутагт болон алс газар суугаа сурах бичиг худалдан авах бололцоогүй хүмүүст МУИС-ийн сайтаар дамжуулан байгалийн ухааны суурь сурах бичгүүдийг үнэ төлбөргүй үзэх боломжтой. МУИС-ийн багш нар залуу үедээ тэгш боломж олгох үүднээс эрдэм мэдлэгээ нийтэд үнэ төлбөргүй, түгээн дэлгэрүүлэх гэсэн чин сэтгэлийг өвөрлөж энэхүү сурах бичгүүдийг нээлттэй болгож байгаа юм. Тус төсөлд нэгдсэн эрдэмтэн багш нар, хамтран ажиллаж буй “Esan-Үндэсний цахим сан”-гийн хамт олонд талархал илэрхийлье” гэлээ.
МУИС-ийн ахмад багш доктор, профессор Ц.Даржаа, “Эрдэмтэн багш нар, үе үеийн шавь нар болон энэхүү үйл ажиллагааг дэмжиж буй байгууллага, хамт олонд талархлаа илэрхийлье. Их сургууль байгуулагдаад 80 жил болоход, би 40 жилд нь МУИС-ийн багшаар ажилласан. Багш хүний хувьд цахим номын сан нээгдсэн явдалд туйлын их баярлаж, тайвшрал төрж байна. Учир нь оюутнууд маань сурах бичгийг үнэ өртөггүй, хүссэн цагтаа ашиглах боломжтой боллоо” гэв.
ШУС-БУС-ийн Биохими тэнхимийн төгсөгч Э.Цэрэндулам, “Суралцаж байх хугацаанд маань ихэнх номууд олон жилийн өмнө бичигдсэн учраас хүртээмж нь бага, барагтай олддоггүй байсан. Номын сангаас номоо авсан ч дээд тал нь гурван хоног хэрэглээд буцааж өгдөг. Тэр хугацаанд тухайн номыг бүтэн уншина гэж байхгүй шүү дээ. Тийм болохоор ийнхүү сурах бичгүүдийг цахим болгож байгаад баяртай байна. Ингэснээр гэрээсээ заавал номын санд ирэх шаардлагагүй болж байгаа нь маш их давуу тал” гэв.
