БШУЯ болон төрийн өмчийн их сургуулиуд хамтран “Шинжлэх ухаан, технологийн сэргэлт: Их сургуулийн оролцоо” сэдэвт олон улсын эрдэм шинжилгээний хурлыг 2024 оны дөрөвдүгээр сарын 23-ны өдөр зохион байгуулсан. Арга хэмжээний хүрээнд болон МУИС-д анхны эрдэм шинжилгээний хурал зохион байгуулсны 80 жилийн ойг тохиолдуулан “Шинжлэх ухаан, технологийн шинэ сэргэлт: Судалгааны их сургууль” сэдэвт олон улсын эрдэм шинжилгээний хурал өнөөдөр боллоо.
Хурлыг нээж, МУИС-ийн ректор Д.Бадарч үг хэлэв. Тэрбээр, энэхүү хуралд хүрэлцэн ирсэн МУИС-ийн эрдэмтэн, багш нар болон гадаадын хүндэт зочин профессоруудад МУИС-д анхны эрдэм шинжилгээний хурал зохион байгуулсны түүхт 80 жилийн ойн баярыг мэндийг хүргэлээ. Мөн өнгөрсөн хугацаанд МУИС-ийн сургалт, судалгааны чиглэлд гаргасан ололт амжилтыг дурдаад үүнд үе үеийн эрдэмтэн багш нарын үүрэг оролцоо өндөр байсныг онцоллоо. Энэхүү эрдэм шинжилгээний хурлаар МУИС-ийн эрдмийн хамт олон өнгөрсөн хугацааны ололт амжилтаа дүгнэхийн зэрэгцээ, ирээдүйн хөгжлийн чиг хандлагаа тодорхойлно гэдэгт итгэлтэй байна гэв.
Тус хуралд оролцогчдод хандан Монгол Улсын Ерөнхийлөгч У.Хүрэлсүх илгээлт явуулсан юм. Илгээлтийг Монгол Улсын Ерөнхийлөгчийн Боловсрол, шинжлэх ухаан, технологийн бодлогын зөвлөх Ч.Лодойравсал уншиж сонордуулав.
Монгол Улсын шинжлэх ухаан, дээд боловсролын ууган байгууллага – МУИС нь үүсэн байгуулагдсаныхаа дараа жил буюу 1943 онд анхны хээрийн судалгааны экспедицийг, улмаар 1944 онд анхны эрдэм шинжилгээний хурлыг зохион байгуулжээ. Энэ нь Монгол Улсад зохион байгуулагдсан анхны эрдэм шинжилгээний хурал байсан ба уг хуралд хэлэлцүүлсэн 14 илтгэлийг эмхэтгэж МУИС-ийн Эрдэм шинжилгээний бичгийн анхны дугаарт хэвлүүлсэн юм.
Анхны эрдэм шинжилгээний хурал зохиосноос хойших 80 жилийн хугацаанд МУИС нь мэргэжлийн олон чиглэлээр сургалт явуулж мэргэжилтэн бэлтгэхийн зэрэгцээ судалгааны олон салбар зэрэгцэн хөгжиж, үндэсний эрдэмтэн судлаачдын томоохон хамтлаг бий болсон байна.
Орчин үед их сургуулиуд эрдэм шинжилгээ, сургалтын үйл ажиллагааны хамрах хүрээ, түвшин, чанарын үзүүлэлт зэргээрээ нэг нэгнээсээ ялгаатай хэд хэдэн чиглэлээр хөгжиж байна. Үүний нэг чиглэл нь судалгааны их сургууль бөгөөд эрдэм шинжилгээ, ахисан түвшний сургалтыг түлхүү хөгжүүлж, шинжлэх ухааны шинэ мэдлэгийг бий болгон, сургалтыг судалгаатай хослуулан уялдуулж, өөрийгөө хөгжүүлэх, хөрвөх болон өрсөлдөх чадвартай, бүтээлч сэтгэлгээтэй мэргэжилтэн бэлтгэхэд үндсэн үйл ажиллагаагаа чиглүүлдэг. Үйл ажиллагааны хувьд ийм шинж чанартай их сургууль манай улсад хараахан бий болоогүй байна.
МУИС дэлхийн тэргүүлэх их сургуулиудын хөгжлийн чиг хандлагын дагуу, олон улсад хүлээн зөвшөөгдсөн судалгааны их сургууль болохоор хөгжлийн чиглэлээ тодорхойлон ажиллаж байна.
Их сургуулиудын олон улсын нэр хүнд, чансааг илэрхийлдэг хамгийн чухал үзүүлэлт бол Web of Science, Scopus зэрэг мэдээллийн санд бүртгэлтэй олон улсын эрдэм шинжилгээний сэтгүүлд хэвлүүлсэн бүтээл, уг бүтээлүүдээс гадаад, дотоодын судлаачид эш татсан байдал зэрэг юм. МУИС нь энэхүү үзүүлэлтээр манай улсын бусад их, дээд сургуулиудыг тэргүүлж байна. Одоогийн байдлаар МУИС-ийн эрдэмтэн судлаачид Web of Science мэдээллийн санд бүртгэлтэй олон улсын эрдэм шинжилгээний сэтгүүлд 1730 гаруй өгүүлэл хэвлүүлсэн ба тэдгээр нь нийт 21,500 гаруй удаа эшлэгдсэн байна. Түүнчлэн тус их сургуулийн эрдэмтэн судлаачид 2023 онд нийт зургаа орчим тэрбум төгрөгийн өртөг бүхий 130 гаруй эрдэм шинжилгээний төсөл, хөтөлбөр, судалгааны ажлыг амжилттай хэрэгжүүлсэн байна. Үүнээс нэг тэрбум төгрөгийн өртөг бүхий төсөл, судалгааны ажлыг МУИС-ийн өөрийн хөрөнгөөр санхүүжүүлсэн ажээ.
Энэхүү олон улсын эрдэм шинжилгээний хурлаар гадаад, дотоодын нэр хүндтэй олон эрдэмтэн илтгэл хэлэлцүүлэхээс гадна МУИС-ийн дэлхийн шинжлэх ухаан болон Монгол улсын хөгжил дэвшилд оруулсан хувь нэмэр ололт амжилтыг дүгнэн, ирээдүйн хөгжлийн чиг хандлагийн талаар хэлэлцүүлэг өрнүүлж байна. Түүнчлэн судлагааны инновацын асуудлаар найман салбар хурал хийхээс гадна МУИС-ийн эрдэм багш судлаачдын туурвисан ном, судалгааны бүтээлүүдийн үзэсгэлэн гаргах, судалгааны лабораториудыг танилцуулах нээлттэй хаалганы өдөр зэрэг олон арга хэмжээг зохион байгуулж байна.
Хурлын вебcайт: https://www.num.edu.mn/ic2024
