Хиймэл оюун, тэр дундаа Generative AI, Large Language Model (LLM)-д суурилсан бүтээгдэхүүн үйлчилгээ хэрэглээнд хэдийнэ нэвтэрч халуун сэдэв, бас чиглэх технологи болж байна. Хүмүүс өдөр тутмын болоод төрөл бүрийн үйл ажиллагаандаа ChatGPT, Gemini гэх зэрэг хиймэл оюуныг өөрт ашигтайгаар хэрэглэдэг болсон ч хиймэл оюуны загварыг сургасан үеийн хуучирсан мэдээллийг эсвэл санаанаасаа зохиосон худал мэдээлэл, дүгнэлт гаргаж өгдөг дутагдал байсаар байна.
Гэтэл байгууллагууд нийтэд ил болгох боломжгүй эсвэл дотоод үйл ажиллагааны талаарх баримт бичиг, мэдээлэлд хиймэл оюуныг ашиглах хэрэгцээ бий. Үүнийг шийдвэрлэхэд хаалттай мэдээллийг илүү үнэн зөв, эх сурвалжтай нь боловсруулж өгдөг RAG (Retrieval-Augmented Generation) технологи эрчимтэй хөгжиж байна. Энэ нь хиймэл оюуныг уламжлалт мэдээллийг гаргаж авах (information retrieval) аргатай хослуулсан технологи. Жишээлбэл, байгууллагын дотоод баримт бичиг, эсвэл мэдээллийн системийн өгөгдлөөс хариулдаг хиймэл оюуны туслахтай болж болно. Тэгвэл манай оюутнууд эдгээр сэдвийн хүрээнд уралдлаа.
2024 оны 12-р сарын 7-8 өдрүүдэд Хас Банкны ивээн тэтгэлгээр МУИС-ийн МТЭС-тай хамтран зохион байгуулсан “ХасБанк сорил 2024: Хиймэл оюуны LLM суурьт виртуал туслах” хакатон уралдаан хоёр өдрийн турш өрсөлдөөнтэй болж өнгөрлөө. Тэмцээнд нийт 10 баг оролцсоноос 9 баг бүтээлээ илгээж амжилттай оролцлоо. Тэмцээний үеэр багууд Хас банкны бүтээгдэхүүний танилцуулга, салбарын хаяг байршлын мэдээлэл, веб сайтын мэдээ нийтлэлээс хариулдаг виртуал туслахын шийдлийг RAG ашиглан боловсруулах даалгаврыг гүйцэтгэсэн нь оюутнуудын өөрсдийн мэдлэг чадвараа сорьж, бодит өгөгдөл дээр ажиллах боломжийг олгосон юм. Түүнчлэн уралдаанд зориулж тооцооллын орчин – GPU сервер гаргаж өгсөн нь LLM загваруудыг бодитоор нэмж сургах, суулгаж тохируулан ашиглах боломжтой болсон юм.
Тус уралдаанд Компьютерын ухаан хөтөлбөрийн 3-р түвшний оюутан Б.Тайванбат, Програм хангамж хөтөлбөрийн 3-р түвшний оюутан А.Батзориг, Мэдээллийн технологи хөтөлбөрийн 4-р түвшний оюутан Б.Хүслэн нарын RAGe баг тэргүүн байр эзэлж, 3,000,000 төгрөгийн сургалтын тэтгэлэг, Програм хангамж хөтөлбөрийн 3-р түвшний оюутан Б.Лхагвадорж, П.Номин-Эрдэнэ, Э.Доржням нарын Minimax баг хоёрдугаар байр эзэлж, 2,250,000 төгрөгийн сургалтын тэтгэлэг, Програм хангамж хөтөлбөрийн 4-р түвшний оюутан А.Гаусар, Б.Баяржавхлан, Э.Оюун-Эрдэнэ нарын Pioneers баг гуравдугаар байр эзэлж 1,500,000 төгрөгийн сургалтын тэтгэлэг болон Хас Банканд цалинтай дадлага хийх эрхийн бичгээр тус тус шагнуулав.
Энэхүү хакатон нь оюутнуудын бүтээлч сэтгэлгээ, техникийн ур чадварыг хөгжүүлж, практик туршлага олгох боломжийг олгосноороо онцлогтой болсон юм. Хэдийгээр уралдаан нь богино хугацаанд болсон ч оролцогч оюутнууд өөрийн мэдлэг, ур чадвараа дайчилж бараг эцсийн бүтээгдэхүүн хөгжүүлж чадсан. Энэхүү тэмцээнийг МУИС-аас Мэдээлэл, компьютерийн ухааны тэнхимийн дэд профессор Г.Амарсанаа, дадлагажигч багш доктор А.Амгалан, дадлагажигч багш О.Билгүүн нар оролцон зохион байгуулжээ.
Цаашид Хас банк болон МУИС, МТЭС-ийн хамтын ажилгааны хүрээнд энэхүү тэмцээн нь уламжлал болон тогтож, хиймэл оюун, систем хөгжүүлэлт, өгөгдлийн шинжилгээ зэрэг мэдээллийн технологийн бусад олон сэдвээр өргөжиж жил бүр уламжлал болгон зохион байгуулахаар төлөвлөж байна. Тус тэмцээний ерөнхий ивээн тэтгэгчээр ажиллаж, хамтран зохион байгуулсан Хас банкны хамт олон болон МТЭС-ийн багш, оюутнуудад талархал илэрхийлье.
Хиймэл оюунаар инженерчлэе!
