МУИС-ийн Хөтөлбөрийн Ерөнхий хороо бакалаврын 98; магистр, докторын 116 хөтөлбөрийг батлаад байна.
МУИС-ийн Хөтөлбөрийн хорооны үйл ажиллагаа, цаашид хийхээр төлөвлөж буй ажлын талаар Сургалт эрхэлсэн дэд захирал проф О.Мөнхбаттай ярилцлаа.
-Хөтөлбөрийн хороо өнгөрсөн хугацаанд ямар ажлууд хийж гүйцэтгээд байна вэ?
-“МУИС-ийн Хөтөлбөрийн Хорооны түр журам”-ыг Эрдмийн зөвлөл баталснаас хойш 11 сар өнгөрч байна.Энэ хугацаанд МУИС-ийн хөтөлбөрийн хороодын гишүүд, нийт багш эрдэмтэд багагүй ажил амжууллаа.
2013-2014 оны хичээлийн жилийн хаврын улиралд гэхэд бакалаврын 69 индекс бүхий 98 хөтөлбөр боловсруулан, шат шатны хороодоор хэлэлцэж баталсан бол 2014-2015 оны хичээлийн жилийн намрын улиралд магистрын мэргэжлийн 43 хөтөлбөр, судалгааны 50 хөтөлбөр, докторын 41 хөтөлбөр боловсруулснаас Хөтөлбөрийн ерөнхий хорооны хуралдаанаар магистрын мэргэжлийн 37 хөтөлбөр, магистрын судалгааны 45 хөтөлбөр, докторын 34 хөтөлбөрийг тус тус баталсан байна. Магистр, докторын зарим хөтөлбөрийг 2015 оны гуравдугаар сард Ерөнхий хорооны хуралдаанаар хэлэлцэхээр зэхэж байна.
-Цаашид хийхээр төлөвлөсөн ажлуудынхаа талаар мэдээлэл өгөөч?
-Хөтөлбөрийн хороодод хийх ажил их байна. Бид Ерөнхий суурь, бакалавр, магистр, докторын зэрэг олгох хөтөлбөрүүдээ үндсэндээ боловсруулаад, хэлэлцээд баталлаа. Ер нь хөтөлбөрийн хороо Монголын дээд боловсролын тогтолцоонд шинэ зүйл болохын хувьд цөөнгүй бэрхшээл тулгарч байгаа хэдий ч МУИС-ийн хувьд үүнийг бодитоор хэрэгжүүлж, багагүй туршлага хуримтлуулж чадсанаараа давуутай. Бид анхдагч болсон, гэхдээ төгс зүйл хийгээгүй харин ч бүтээж бий болгосон зүйлсээ боловсруулж улам бүр сайжруулах шаардлагатай байна. Юуны өмнө бид Хөтөлбөрийн хорооны журмаа сайжруулах ингэхдээ эн тэргүүнд хорооны бүтэц бүрэлдэхүүн, удирдлагын тогтолцоо, хорооны чиг үүрэг, багшийг чадавхжуулах, хорооны гишүүн бус мэргэжлийн багш нартай хэрхэн хамтран ажиллах, тэдний оролцоог хэрхэн хангах, хөтөлбөрийн хэрэгжилт, чанарын шаардлагын хяналт үнэлгээг яаж тавих зэргийг журмаар сайтар зохицуулах хэрэгтэй. Энэ чиглэлээр бид дэд хороод, мөн МУИС-ийн эрдмийн зөвлөлийн гишүүдийн санал авах ажлыг эхлүүлж, заавар зөвлөмжөө хүргүүлээд байна. Мөн хавсарга болон хос мэргэжлийн хөтөлбөр, орой эчнээ сургалтын хөтөлбөрүүдийг боловсруулах ажил өмнө маань байна.
-Хөдөлмөрийн зах зээлд МУИС-ийн төгсөгчдийн өрсөлдөх чадварыг нэмэгдүүлэх чиглэлээр хэрхэн ажиллаж байна вэ?
-МУИС-ийн төгсөгч бол Монголын хөдөлмөрийн зах зээлд хамгийн үнэ цэнэтэй, эрэлттэй хэсэг. Саяхан социологи нийгмийн ажлын тэнхмийн багш нарын хийсэн судалгаагаар ажил олгогчид манай төгсөгчдийг бусад их дээд сургуулийн төгсөгчдөөс мэдлэг, ур чадвар, бүтээлч санаачлагатай, хариуцлагатай байдал зэрэг олон шинжээр их давуу гэж үнэлсэн байна лээ. МУИС-ийн мэргэжлийн хөтөлбөрүүд, нийт багш нар бол улсдаа тэргүүлдэг. Давхардал арилгах, хөтөлбөрийг нээлттэй, хичээл багш нарыг сонголттой болгох, багш оюутны сургах, сурах хариуцлагыг дээшлүүлэх зэрэг сургалтын шинэчлэлийн хүрээнд хийсэн ажлууд нэмэлт боломж давуу байдал олгож байгаа.
Minor буюу бидний нэрлэж заншсанаар Хавсарга мэргэжил ийм чадварыг нэмэгдүүлдэг, мөн оюутанд нэмэлт сонголт олгодгоороо чухал зүйлийн нэг. Одоо бид хавсарга мэргэжилд тавих шаардлага, түүний хөтөлбөрийг хэрхэн боловсруулах чиглэлээр санал боловсруулах ажлын хэсэг байгуулж байна. Мөн магистрын сургалтыг судалгаа болон мэргэжлийн гэсэн хувилбартай явуулахаар болсон нь суралцагчдын авьяас чадвар төдийгүй ирээдүйн ажлын байрны эрэлт хэрэгцээг тооцсон дэвшилттэй зүйл болж байгаа.
-2014-2015 оны хичээлийн жилд МУИС-д бакалаврын хөтөлбөрт элссэн оюутнууд хаврын улирлын эцэст мэргэжлийн хөтөлбөрөө сонгох талаар товч тайлбарлавал?
-Мэргэжил сонгуулах журам батлагдаад одоо СНА, сургалтын албад бэлтгэл хангах, сурталчлах ажил эхлээд байна. Мэргэжил сонгуулах нь дараах хэд хэдэн ач холбогдолтой. Нэгдүгээрт, дээд боловсролын суурь мэдлэг, ур чадвар хичээлээ судалсны эцэст мэргэжлийн хөтөлбөрөө сонгох бөгөөд ингэхдээ оюутнууд сурлагын амжилтаараа жагсаж өрсөлдөнө. Хэн сайн сурна тэр хүссэн мэргэжлээ сонгох боломж бүрдэж оюутнуудын хооронд сайн сурах өрсөлдөөн үүснэ. Хоёрдугаарт, мэргэжлийн хөтөлбөрийг сурталчлан ойлгуулснаар оюутан ухамсартай мэдлэгтэйгээр мэргэжлээ сонгоно. Гуравдугаарт, хөтөлбөрийн хооронд академик өрсөлдөөн буй болж, ойлгуулан сурталчлах, багш нарын сургалт судалгааны ажлаа сайжруулах замаар оюутныг татах ажил идэвхжинэ.
Бизнес эдийн засгийн багц хөтөлбөрт элсүүлээд 2-3 улирлын дараа мэргэжил сонгуулдаг туршлага өмнө нь МУИС-д байсан боловч нийт сургуулийн хэмжээнд хийгдэж байгаагүйн зэрэгцээ албан ёсоор батлагдсан дүрэм журам байсангүй. Мөн бид анх удаа нэг хөтөлбөрөөр сургах оюутны тоог багш, анги танхимын хүрэлцээ зэрэг бодит шалгууруудаар индексжүүлэн гаргах гэж байгаа нь шинэлэг ажил болж байна гэж хэлж болно. Анх удаа нэгдсэн байдлаар хийх тул зарим нэгэн бэрхшээл гарах магадлалтай. Иймээс бид аль болох багш оюутанд сурталчлах, тэдний оролцоог нэмэгдүүлэхэд анхаарч байна.
-Сургалтын журам боловсруулах ажил хийгдэж байгааг бид мэднэ. Энэ ажил ямар шатандаа явж байна вэ? Онцлог нь юу болохыг хэлээч?
-Шинэ журам хэд хэдэн зүйлээр онцлогтой. Тухайлбал, 1. Бакалавр, магистр, докторын сургалтыг нэг журмаар зохицуулснаар сургалтын үйл явцын уялдаа холбоо сайжирна, 2. Нэг улирлын танхимын хичээлийн долоо хоног, багц цагийн хуваарилалт, хичээлийн хэлбэрүүдийн харьцаа зэргийг тухайн хөтөлбөрийн онцлогоос үүдээд багш профессорууд өөрсдөө шийдэж хувилбартай хийх боломжтой, 3. Магистр, докторын хөтөлбөр хооронд багц цаг тооцох, зарим хичээлийг хамт судлах, түүнчлэн өөрийн төгсөгчдийг ахисан болон өөр хөтөлбөрт элсүүлэн сургахад давуу боломж олгох зэрэг олон шинэлэг зүйлс, боломж олгож байгаа, 4. Мөн honor program нээж, гоц авьяастай оюутныг гүнзгийрүүлэн судлах боломжоор хангах, сургалтын хэвийн ажиллагааг хангахад оролцогч талуудын үүрэг хариуцлагыг тодорхой заах зэрэг олон шинэ соргог зүйлсийг тусгасан журам болно гэж найдаж байна.
Бид нийт багш нарын саналыг тусгах үүднээс бүх тэнхим сургуулиудын саналыг бичгээр авч, тэдний саналд үндэслэн 20 гаруй багш профессороос бүрдсэн ажлын хэсэг байгуулж ажилласан. Мөн оюутны байгууллага болон МУИС-ийн захиргааны зөвлөлөөр хэлэлцүүлж санал авлаа. Одоо бүх багш нарын дунд нээлттэй хэлэлцүүлэг хийх бөгөөд санал зөвлөмжийг нэгтгэж оруулсан журмын төслийг Эрдмийн зөвлөлд хэлэлцүүлэхээр энэ хоёрдугаар сард өргөн барихаар зэхэж байна.
-Ярилцлагын төгсгөлд танд нэмж хэлэх зүйл байна уу?
-2014 он бол сургалтын шинэ тогтолцоог үүсгэн төлөвшүүлэх, сургалтын шинэчлэлийг эхлүүлсэн жил байлаа. Аливаа зүйлийг бодохгүй хийх, бодсоор суугаад хийхгүй байх хоёр аль аль нь хортой зүйл. Бид бодсон төлөвлөсөн зүйлээ өнгөрсөн онд хийж, ямар ч байсан цаашдаа хэлэлцэх сайжруулах юмтай болоод авсан. Харин 2015 он бол өнгөрсөн хугацаанд хийж босгосон зүйлдээ дүн шинжилгээ хийж, шаардлагатай зүйлсээ боловсронгуй болгох, ялангуяа сургалтын чанар, хэрэгжилтэд ахиц гаргах он жил гэж бодож байна. Бид Ерөнхий суурийн тогтолцоог анх бий болгосон бол одоо энэ тогтолцоог дээд боловсролын суурь мэдлэг ур чадвар өгөх үндсэн зорилгын үүднээс хянан сайжруулах, их сургуулийн сургалтад liberal art номнолыг бүрэн утгаар нь хэрэгжүүлэхэд анхааран ажиллана.
Энэ онд үндэсний болон олон улсын магадлан итгэмжлэлд орох хөтөлбөрийн жагсаалт гаргаж, үнэлгээ хийж бодлого, санхүү эдийн засгийн дэмжлэг олгож ажиллах бөгөөд одоогоор тэнхим сургуулиудаас өөрийн үнэлгээний санал авах ажлыг эхлүүлсэн байгаа. Мөн их сургуулийн багшийн хөгжлийг олон улсын түвшинд дээд боловсролын сургалт, эрдэм шинжилгээнд тавьдаг шаардлагатай уялдуулж, өөрсөддөө байгаа нөөц боломжоо зөв дайчлан ажиллах ёстой. МУИС-д боловсрол судлал, дидактикийн чиглэлээр мэргэшсэн, хийсэн ажил бүтээлтэй цөөнгүй багш, мэргэжилтэн байна. Тэдний мэдлэг туршлагыг багшийн хөгжлийн чиглэлээр өргөн ашиглана. Мөн сургалтад цахим сургалтыг өргөн нэвтрүүлэх, ийм хичээлийг бэлтгэх, нэвтрүүлэх, үнэлэхэд шаардлагатай бодлогын орчин, хүний нөөцийг тодорхой болгож, бодитоор хэрэгжүүлэх ажил өмнө маань байна.
Энэ бүхнийг амжилттай хийж гүйцэтгэхэд МУИС-ийн эрдмийн хамт олон хангалттай мэдлэг ур чадвар, туршлагатай төдийгүй хүсэл зориг, санаачилгатай хэмээн итгэж явдаг.
-Ярилцсанд баярлалаа. Та бүхний ажилд амжилт хүсье!
