МУИС-ийн ШУС, Оюутны хөгжил, үйлчилгээний газрын зохион байгуулсан гадаад оюутны “Монгол орон судлал” хичээлийн орон нутгийн дадлага 2018 оны 5 дугаар сарын 9-11-ний хооронд амжилттай болж өнгөрлөө.
2017-2018 оны хичээлийн жилд ШУС-ийн ХУС-ын Монгол хэл, хэл шинжлэлийн тэнхимийн “Монгол хэлний бэлтгэл анги”-д 10 гаруй орны 100 орчим гадаад оюутан монгол хэл, соёлыг амжилттай сайн суралцаж байна. Эдгээр оюутан жилийн хугацаанд “Монгол орон судлал” болон бусад хичээлийн хүрээнд сурсан монгол орны байгаль цаг уур, газрын гадарга, хөрс ургамал, ан амьтан, монголчуудын хоол хүнс, гэр сууц, хувцас хэрэглэл зэрэг ахуй амьдралын талаар мэдлэгээ “жинхэнэ” монгол орчин нөхцөлд нь буюу хөдөө орон нутагт очиж үзэж танилцдагаараа уг дадлага маш их ач холбогдолтой юм. Мөн аян замын тэмдэглэл хөтлөн, тайлан хэлэлцүүлдэг.Аян замын тэмдэглэл нь уг хичээлийн явцын үнэлгээнд тооцогдох болно.
Энэ удаагийн дадлага Төв, Булган, Өвөрхангай, Архангай аймгийн нутгийг хамарч, Орхоны хөндийн байгалийн цогцолбор газар; Эрдэнэзуу хийд, Хархорины музей, Хөшөө цайдам зэрэг хөшөө дурсгалт газруудыг үзэхийн зэрэгцээ Архангай аймгийн Хашаат сумын малчин А.Баатардоржийнд зочилж малчдын ахуй амьдралтай танилцан, малчны хотонд “Малын тоног хэрэгсэл хэн сайн мэдэх вэ? Аргал хэн сайн түүх вэ? зэрэг сонирхолтой тэмцээнд оролцоцгоов. Мөн оюутнуудын дунд монгол үндэстний тоглоом-шагайн наадам /шагай няслах, морь уралдуулах/ зохиож, байр эзэлсэн оюутнуудад шагнал урамшуулал гардууллаа.
Малын тоног хэрэгслийг хэн сайн мэдэх тэмцээнд БНХАУ-ын ӨМӨЗО-ны оюутан Цолмон, аргал түүх тэмцээнд ОХУ-ын Халимагийн БНУ-ын оюутан Нарма Каманзаев, шагай няслах тэмцээнд Филиппин улсын оюутан Жэй Марк, морь уралдуулах тэмцээнд Франц улсын оюутан Бруно Лерой нар тус тус тэргүүллээ.
