МУИС Монгол Улсад анх удаа “Ажил мэргэжил судлал”-ын магистрын зэрэгтэй “Ажил мэргэжлийн зөвлөх”-ийг бэлтгэж, анхны 26 төгсөгч магистрын дипломоо гардан авлаа.
Төгсөлтийн арга хэмжээнд УИХ-ын гишүүн, Хөдөлмөр, Нийгмийн хамгааллын сайд С.Чинзориг хүрэлцэн ирж, нээлт хийсэн юм. Мөн Холбооны Бүгд Найрамдах Герман Улсаас Монгол Улсад суугаа Онц бөгөөд Бүрэн эрхт Элчин сайд Штефан Дуппел, МУИС-ийн захирал Я.Төмөрбаатар, БСШУСЯ-ны Шинжлэх ухаан, технологийн бодлогын газрын дарга, МУИС-ийн төлөөлөн удирдах зөвлөлийн дарга С.Мөнхбат, МУИС-ийн Эрдэм шинжилгээ, хамтын ажиллагаа хариуцсан дэд захирал Б.Очирхуяг, Германы хамтын ажиллагааны нийгэмлэг(GIZ)-ийн “Ашигт малтмалын салбар дахь түншлэлд суурилсан мэргэжлийн боловсрол, сургалт” төслийн удирдагч Беатэ Диппмар, Швейцарын хөгжлийн агентлагийн Хамтын ажиллагааны дэд захирал Илария Дали, Хөдөлмөр халамжийн үйлчилгээний ерөнхий газрын дарга Б.Нямдаваа, ХНХЯ-ны Хөдөлмөр эрхлэлтийн бодлогын хэрэгжилтийг зохицуулах газрын дарга Ц.Амартөгс, МУИС-ийн Шинжлэх ухааны сургуулийн захирал Г.Эрдэнэбаяр, Швейцарын хөгжлийн агентлагийн Хөтөлбөрийн ахлах зохицуулагч Д.Заяасайхан зэрэг хүндэт зочид хүрэлцэн ирж, мэндчилгээ дэвшүүллээ.
“Ажил мэргэжил судлал”-ын магистрын хөтөлбөрийг ХНХЯ-ны захиалгаар, Герман, Швейцар, Австрали улсын засгийн газрын санхүүжилтээр Германы хамтын ажиллагааны нийгэмлэг(GIZ)-ийн “Ашигт малтмалын салбар дахь түншлэлд суурилсан мэргэжлийн боловсрол, сургалт” төсөл дэмжин МУИС-ийн ШУС-ийн Улс төр судлал, Боловсрол, Сэтгэл судлал, Социологи, Нийгмийн ажлын тэнхимийн багш нар хэрэгжүүлж байна. Тус хөтөлбөрт зөвлөхөөр ХБНГУ-ын Холбооны Хөдөлмөрийн Агентлагийн Их Сургуулийн эрдэмтэн багш нар хамтран ажиллаж байна.
