ОУХНУС-ийн олон улсын харилцааны хөтөлбөрийн оюутнууд бид “Олон улсын байгууллага, олон талт яриа хэлэлцээ” хичээлийн хүрээнд 2019 оны 12-р сарын 5-ны өдөр Монголын СОС хүүхдийн хотходын үндэсний нийгэмлэгтэй танилцсан бөгөөд уг нийгэмлэгийн ажилтан, манай сургуулийн төгсөгч Т.Цэвэлмаа эгч бид бүхнийг хүлээн авч, байгууллагынхаа үйл ажиллагаатай танилцуулж, сонирхсон асуултад маань хариулж, сонирхолтой яриа өрнүүлсэн юм.
Хүн төрөлхтөнд асар их уй гашуу авчирсан Дэлхийн 2-р дайны дараа өнчирч хоцорсон олон мянган хүүхдүүдэд туслан, тэднийг бусадтай адил гэр бүлийн орчинд өсгөж хүмүүжүүлэх гэсэн Австри улсын иргэн Херманн Гмайнерийн санааг сайн сэтгэлт олон хүмүүс дэмжсэнээр уг нийгэмлэг өнөөгийн дүр төрхөө олсон байна. 1949 оноос хойш 70 жилийг ардаа орхиод буй уг байгууллага өдгөө дэлхийн 135 оронд 30000 гаруй сайн дурын ажилтантайгаар 2000 гаруй салбарт хүүхэд хамгааллын чиглэлээр үйл ажиллагаагаа явуулж байна. Үүний үр дүнд 1995 онд НҮБ-ын Эдийн засгийн зөвлөлд зөвлөх эрхтэй байгууллага болсон юм.
Монгол Улсын ардын эмч, ангаах ухааны доктор, профессор Ж.Хатанбаатарын санаачилгаар анх 1998 онд Монгол Улсын засгийн газар, СОС Киндердорф Интернейшил байгууллагатай хамтын ажиллагааны гэрээ байгуулж, УИХ 2001 онд соёрхон баталснаар гэрээ хүчин төгөлдөр болж, манай улсад үйл ажиллагаагаа албан ёсоор явуулж эхэлсэн. Одоогийн байдлаар “Улаанбаатар СОС хүүхдийн хотхон”, “Дархан СОС хүүхдийн хотхон”, “Залуус-Өсвөр үеийнхний төв”, “Гэр бүлийг дэмжих төв” гэсэн 4 салбартайгаар үйл ажиллагаагаа явуулж байна.
Өдгөө Монголын СОС хүүхдийн хотходын Улаанбаатар дахь салбарт нийт 96 хүүхэд 13 СОС өрхөд, Дархан-Уул аймаг дахь салбарт 57 хүүхэд 7 СОС өрхөд өсөн торниж байна. Мэдээж “гэр бүл”-д суурилсан гэдгээрээ бусад асрамжийн газар, хүүхэд хамгааллын төвөөс ялгагддаг бөгөөд 0-11 насны 6-8 хүүхэд байх 1 өрх бүрд “СОС ээж” байх ба хүүхдүүд яг л төрсөн ээжийнх шигээ хайр халамжинд өсөж төлөвшдөг. Харин 14 нас хүрээд хөвгүүд “Залуус өсвөр үеийнхний төв”-рүү шилждэг бөгөөд тэнд амьдрах ухаан, зөв бие хүн болж төлөвших гэх мэт амьдралын чухал үнэт зүйлсийг сурдаг. Мөн хүүхдүүд 18 нас хүрмэгц уг байгууллагыг орхиж явах эсэх нь гагцхүү хүүхдийн өөрийнх нь хүсэл эрмэлзлээр шийдэгддэг бөгөөд мэргэжил эзэмшиж, ажил хөдөлмөр эрхлээд, өөрийгөө аваад явах чадвартай болсон цагтаа тусдаа гардаг нь тун онцлууштай.
Монголын СОС хүүхдийн хотходын үндэсний нийгэмлэг нь хүүхдийн эрхийг хамгаалах, эмзэг бүлгийн хүүхдүүд, айл өрхүүдэд туслах, тэднийг харилцан хөгжүүлэх зорилгоор нийгмийн олон салбарт үйл ажиллагаагаа тууштай явуулсаар байна.
