НҮБ-ын Ерөнхий Ассамблейн 2012 оны 11 дүгээр сарын 28-ны өдрийн тогтоолоор жил бүрийн 3 дугаар сарын 21-ний өдрийг “Олон Улсын Ойн Өдөр–International Day of Forests” болгон тэмдэглэж байгаа бөгөөд 2021 онд дэлхий даяар энэ өдрийг “Ойг нөхөн сэргээх нь эрүүл, тогтвортой аж амьдралын үндэс” уриан дор тэмдэглэж байна.
Энэ ажлын хүрээнд МУИС-ийн Хэрэглээний Шинжлэх Ухаан, Инженерчлэлийн Сургуулийн Хүрээлэн буй орчин, Ойн инжененрчлэлийн тэнхим нь БОАЖЯ, НҮБХХАБ, ШУА-ийг Газарзүй, геоэкологийн хүрээлэн, Монгол-Солонгосын “Ногоон хэрэм” төсөл, Ойн Судалгаа Хөгжлийн Төв, “Хургатай Хайрхан” ХХК-тай “Монгол орны ойн нөхөн сэргээлтийн өнөөгийн байдал, цаашдын чиг хандлага” сэдэвт үндэсний 5-р хурал, “Оройн нахиа” Оюутны Эрдэм Шинжилгээний 6-р хурлыг онлайн хэлбэрээр амжилттай зохион байгууллаа.
Тус хурлаар Монгол орны ойн өнөөгийн төлөв байдал, ойн талаарх төрийн бодлого, хууль эрхзүйн асуудлууд, уур амьсгалын өөрчлөлтийн ойн экосистемд үзүүлж буй нөлөө, ойн хомсдол, доройтлыг бууруулах, ойжуулалт, нөхөн сэргээлт, ойн үрийн аж ахуй, ойн нөхөн сэргээх технологийг боловсронгуй болгох чиглэлээр хэлэлцүүлэг явагдаж харилцан мэдээлэл солилцлоо.
Хурлын үйл ажиллагаанд төрийн болон хувийн хэвшлийн аж ахуйн нэгж, эрдэм шинжилгээний байгууллагууд, их сургуулиуд, ТББ болон олон улсын байгууллага, төсөл хөтөлбөрүүдийн мэргэжилтэн, судлаачид, ойн чиглэлээр суралцаж буй оюутан залуус зэрэг нийт 350 гаруй төлөөлөл оролцлоо.
Түүнчлэн, ойн чиглэлээр суралцаж буй оюутнуудын эрдэм шинжилгээний ажлыг дэмжих үүднээс “Оройн нахиа” сэдэвт оюутны эрдэм шинжилгээний хурлын “Шилдэг илтгэл“, залуу судлаачдын судалгааны ажлыг дэмжин “Шилдэг ханын илтгэл”-ийг тус тус шалгаруулав.
Оюутны эрдэм шинжилгээний хурлаар МУИС, ШУТИС, ХААИС, ОУУБИС зэрэг Монгол улсын их, дээд сургуульд ойн чиглэлээр мэргэшин суралцаж бакалаврын болон магистрийн түвшний 20 орчим оюутны судалгааны ажлын үр дүнг хэлэлцэж шилдэг илтгэлүүдийг шалгаруулав.
Бакалаврын түвшинд:
1-р байр – Ё.ГАНТӨГС – МУИС “Нарсан ойн (Pinus sylvestris L.) байгалийн сэргэн ургалтанд огтлолын эрчмийн үзүүлэх нөлөө”,
2-р байр – М.БАЯРМАА – МУИС “Хайлаас (Ulmus pumilaL.)-ны амсрын эсийн хөдлөл зүй, усны потенциалд усалгааны үзүүлэх нөлөө”,
3-р байр – Л.САРАНГУА – МУИС “Хээрийн бүсэд тарималжуулсан Улиас (Populus sibirica)-ны өсөлт, навчны хлорофиллын агууламж, биомассын үзүүлэлтэнд усалгаа, бордооны үзүүлэх нөлөө”,
Тусгай байр – Б.ГАНБОЛД – ХААИС “Хүрэлтогоотын амны шинэсэн ойн моддын өсөлт, сэргэн ургалт”,
Тусгай байр – Н.ПҮРЭВСҮРЭН – ХААИС “Хүүшийн амны холимог гацууран ойн моддын өсөлт” сэдэвт илтгэлүүд шалгарсан бол;
Магистрын түвшинд:
1-р байр – Д.ОТГОНСҮРЭН – ОУУБИС “Ex-situ нөхцөлд тарималуулж буй Sedum L.-ийн төрлийн ургамалд үзүүлэх уур амьсгалын нөлөө”
2-р байр – Х.ЦЭВЭЛМАА – МУИС “Oрон зайн олон шалгуурт анализын аргаар ой, хээрийн түймрийн эрсдэлийг зураглах (Сэлэнгэ аймаг)”
3-р байр – Д.НАРАНТӨГС – МУИС “Монгол орны хээрийн нөхцөлд тарималжуулсан Улиас, Хайлаасны биомассын хуримтлалд усалгаа, бордооны үзүүлэх нөлөө”
Тусгай байр – Д.СОЛОНГО – МУИС “Монгол орны таримал нарсан (Pinus sylvestris L.) ойн хөндлөн өсөлтийн харьцуулсан судалгаа”
Тусгай байр – Х.БИЛЭГТ – МУИС “Ойн нөхөн сэргээлтийн тарьцны амьдралт, өсөлтийн хувийг сайжруулах туршилт судалгаа” сэдэвт илтгэлүүд тус тус шалгарч Байгаль орчин, Аялал Жуулчлалын Яамны өргөмжлөл, мөнгөн шагналаар шагнагдав.
Шилдэг Ханын илтгэлээр:
1-р байр –МУИС-ын докторант Д.Жагдаг нарын “ Хүлэмж болон ил талбайд ургуулсан Сибирь гацуурын (Picea obavata Ldb.) тарьцын өсөлт, газрын дээд болон доод хэсгийн биомассын харьцуулсан судалгаа”
2-р байр: ШУА-ийн Газарзүй, геоэкологийн хүрээлэнгийн ЭШАА, доктор Д.Цэндсүрэн нарын “Ногоон бүсийн хушин ойн байгалийн сэргэн ургалтын төлөв байдал” сэдэвт ханын илтгэл
3-р байр: МУИС, ХШУИС-ийн докторант Б.Отгонсайхан нарын “Улаанбаатар хотын ногоон байгууламжийн модлог ургамлын олон янз байдал” сэдэвт ханын илтгэл тус тус шалгарлаа.
Тэргүүн байранд шалгарсан илтгэлүүдийг хурлын эмхэтгэлд болон “Монголын ой” сэтгүүлд хэвлүүлэн олон нийтийн хүртээл болгоно.
