Ковид-19 цар тахалтай холбоотойгоор Монгол Улсын Засгийн газрын гаргасан шийдвэрээр 2021-2022 оны хичээлийн жилийн намрын улирлын сургалтын үйл ажиллагаа холимог хэлбэрээр явагдахаар болсон билээ. Уг шийдвэртэй уялдуулан МУИС-ийн захирлын 2021 оны 8 дугаар сарын 25-ны өдрийн А/200 тоот тушаалаар “Сургалтын үйл ажиллагаанд зохицуулалт хийх удирдамж”-ийг батлан МУИС даяар сургалтын үйл ажиллагаандаа мөрдлөг болгон ажиллаж байна. Энэхүү удирдамжийн хүрээнд, намрын улирлын сургалтын үйл ажиллагааны явцыг үнэлэх, цаашид авах арга хэмжээг тодорхойлох зорилго бүхий бакалаврын түвшний оюутнуудын дундах явцын санал асуулга явагдаж дууслаа.
Санал асуулгад бакалаврын түвшний 11 мянга орчим оюутан оролцсон нь нийт идэвхтэй суралцаж буй бакалаврын оюутны 82 орчим хувь буюу оролцоо өндөр байсан гэж дүгнэж болох юм. Ахисан түвшний суралцагчдын сургалтын үйл ажиллагаа 10 дугаар сарын 01-нээс эхэлсэнтэй холбоотойгоор ахисан түвшний суралцагчдын явцын санал асуулга энэ долоо хоногт явагдаж байна.
Асуултыг оюутан-хичээл нэг бүрээр биш, нэг оюутан нэг удаагийн зарчмаар, нийтлэг 9 асуулт болон хамгийн сайн болон хангалтгүй зааж буй хичээлийн мэдээллийг бөглөх байдлаар боловсруулж явуулсан.
Хэдийгээр МУ-ын Засгийн газрын шийдвэрээр сургалтыг холимог хэлбэрээр явуулах шийдвэрийн хүрээнд сургалт явагдаж буй ч сургалтын хэлбэрийн талаарх оюутнуудаас авсан тандалтын үр дүнд бүх хичээлийг цахимаар судлах сонирхолтой оюутан нийт оюутны 38%, бүх хичээлийг танхимд судлах сонирхолтой оюутан нийт оюутны 25% байна.
Танхимаар хичээллэх үед эрүүл ахуй, халдвар хамгааллын дэглэм мөрдөгдөж буй эсэх талаарх асуултад нийт оюутны 18% нь үгүй гэж үзсэн байна.
Сургалтын чанарын тухайд авч үзэхэд цахимаар судалж буй хичээлийн чанарыг санал асуулгад оролцсон нийт оюутны 13% нь хангалтгүй, 35% нь дунд гэж үнэлсэн бол танхимаар судалж буй хичээлийн чанарыг 7% нь хангалтгүй, 26% нь дунд гэж үнэлсэн байна. Энэ үр дүнгээс үзвэл танхимаар хичээллэх нь цахимаар хичээллэхээс илүү үр дүнтэй, эсвэл цахим сургалтын үед баримтлах стандарт алдагдаж буй, түүнийг засаж сайжруулах шаардлагатай нь харагдаж байна.
Оюутан Ковид-19-ийн эерэг тохиолдлоор батлагдсан эсвэл ойрын хавьтагч болж танхимын сургалтад оролцож чадахгүй болсон тохиолдолд нийт хичээлийн 18% нь нөхөж судлах боломж олгоогүй буюу цахим хичээлийн холбогдох материал үлдээгээгүй гэж хариулсан байна. Халдварын эрсдэлд орсон нийт суралцагчдын 57% нь багш цахимаар давхар заасан, байршуулсан материалыг нөхөж үзсэн, бусад оюутнуудаас хичээлийн агуулгыг нөхөж авсан зэргээр хичээлийн хоцрогдол үүсгээгүй гэсэн байна. Суралцагчдад нөхөж судлах боломж олгохгүй байх нь сургалтын үйл ажиллагааг зохицуулах удирдамжид заасан цахим сургалтын хувьд хичээлийн цахим материалыг системд байршуулж, нөхөн үзэх боломжийг олгох тухай заалт тодорхой хэмжээнд зөрчигдсөнийг илэрхийлж байна.
Цар тахлаас үүдэн цахимаар сургалт зохион байгуулж эхлээд 4 дэх улиралдаа үргэлжилж байгаа энэ үед намрын улирлын сургалтын үйл ажиллагаанд багш болон суралцагчид ихээхэн хичээл зүтгэл гарган ажиллаж, суралцаж байна. Санал асуулгын үр дүнгээс харахад хичээлийг маш сайн зааж байгаа тухай 5000 орчим оюутны санал ирсэн байна. Энэ нь ялангуяа холимог хэлбэрээр сургалт явагдаж буй энэ үед танхимын болон цахим хичээлийг ойлгомжтой, чанартай, хүртээмжтэй явуулах, халдварын эрсдэлд орсон суралцагчдад бүх төрлийн боломж олгохыг эрэлхийлэн ажиллаж байгаа хичээл зүтгэлтэй багш нар их байгааг харуулж байна. Оюутны өгсөн сэтгэгдлүүдээс дурдвал:
…. багш цахимаар лекц орохдоо маш ойлгомжтой, үр дүнтэй заадаг учир семинар дээр бодлого бодоход амархан байдаг. Мөн өгч буй даалгаврууд нь хичээлийн агуулгад нийцэлтэй, үнэхээр хүүхдийн хичээл зүтгэл самбаачилга шаардсан хэрэгтэй даалгаврууд байж чаддаг. Хүүхдэд үнэхээр зөв төлөөс нь хандаж, харж, зааж өгч чаддаг.
… багш маш их сэтгэл, энерги зарцуулж хичээлээ заадаг. Бидний санаа бодлыг чөлөөтэй сонсож, түүн дээрээ үндэслэн дүгнэлт гаргаж мэдлэг олгодог нь таалагддаг. Тодруулбал, биднийг хичээл дээр юунд ч баригдуулахгүйгээр өөрсдийнхөө бодлыг зөв, цэгцтэй, үндэслэлтэй, олон талаас нь харж илэрхийлэх, асуудлыг өөр өнцгөөс харах чадварт сургаж байна. Хичээлд тэнхимээр ирж чадахгүй оюутнуудад зориулж давхар “Teams” дээр хичээлээ явуулдаг.
Нөгөө талаар хичээлийг хангалтгүй зааж буй талаарх оюутны саналууд тодорхой хэмжээнд ирсэн. Тоймлон хэлбэл хэт их даалгавар өгдөг, халдварын эрсдэлд орсон тохиолдолд нөхөн судалж ирц, идэвхээ тооцуулах боломж олгодоггүй, хичээлийн агуулгын уялдаа холбоогүй, нуршуу, ойлгомжгүй заадаг, цахимаар орж буй хичээлд аудио тайлбаргүй, текстэн материал өгөөд орхидог гэх мэт саналууд байна. Мөн хичээлийг тодорхой хэмжээнд ороогүй гэсэн саналууд ч бий. Эдгээр саналуудыг нэгтгэн, шаардлагатай тохиолдолд нэмэлт баталгаажуулалт хийн харьяа тэнхимүүдэд хүргүүлж, холбогдох хэлэлцүүлэг хийлгүүлэхээр бэлтгэж байна. Багш бүр оюутны гаргасан эдгээр саналуудыг харгалзан үзэж цаашдын сургалтын үйл ажиллагаагаа оновчтой төлөвлөн, чанартай зохион байгуулахад анхаарах шаардлагатай байгааг илэрхийлж байна.
Судалгаанд оролцсон болон идэвх зүтгэл гарган ажиллаж, суралцаж буй нийт эрдэмтэн багш, суралцагчдадаа талархал илэрхийлье.
Хөтөлбөр, чанарын баталгаажуулалтын хэлтэс
