Доктор, профессор С.Гомбо нь 1992 оны 11-р сарын 1-нээс МУИС-ийн НУФ-ийн Социологийн тэнхимд багшаар ажиллаж эхэлсэн, 1995 оны 1-р сарын 1-нээс Социологийн тэнхмийн орлогч эрхлэгчээр дэвшин ажиллаж байсан. Тэрээр Нийгмийн ажлын хөтөлбөрийг тус тэнхимд нээх санаачлагыг гаргаж улмаар хөтөлбөрийг нь боловсруулан батлуулж, МУИС-д 2000 оны 9-р сард анхны элсэлтээ авч байв. С.Гомбо нь тэнхмийн эрхлэгчээр ажиллаж байгаад 2007 оны 10-р сарын 1-нээс өөрийн хүсэлтээр насны тэтгэвэртээ суужээ. Профессор С.Гомбо нь МУИС-д ажиллах хугацаандаа бакалавр, магистр, докторын зэргээр олон арван шавь бэлтгэн гаргасны зэрэгцээ олон тооны бүтээл туурвисан социологи, нийгмийн ажлын сор эрдэмтдийн нэг болно.
Социологи, Нийгмийн ажлын тэнхимийн оюутнуудыг сурлага, урлаг, олон нийтийн үйл ажиллагаагаар манлайлж буй “Нийгмийн ажил” хөтөлбөрийн III курсын оюутан Санги овогтой Буяндэлгэрт доктор, профессор С.Гомбо багшийн нэрэмжит анхны тэтгэлгийг нээлттэй шалгаруулалтын үндсэн дээр олголоо. Тус тэтгэлгийг МУИС-ийн оюутны хагас жилийн төлбөр, үнэ бүхий зүйл, БАТЛАМЖ дагалдаж буй бөгөөд хань С.Цэвэлмаа болон гэр бүлийн хүмүүс гардуулж өгсөн юм.
Тэтгэлэг гардуулах үеэр С.Гомбо багшийн хань С.Цэвэлмаатай товч ярилцлаа.
Би Монгол Улсын Боловсролын их сургуулийн орос хэлний багш хүн. Миний нөхөр Санжаагийн Гомбо бол Монгол Улсын Их Сургуулийн Социологи, нийгмийн ажлын тэнхимийн багш, тэнхимийн эрхлэгч, нийгмийн ажлын тэнхимийг үндэслэн байгуулагч хүн байгаа юм. Манай нөхөр хорь гаруй жил Монгол Улсын Их Сургуульд ажилласан. Ийм учраас энэ жил тэнхимийнх нь хүчээр бид нар эрдэм шинжилгээний бүтээлийн эмхэтгэл гаргаж, нэг ёсондоо номын суварга босгосон. Ах дүү, төрөл садан, үр хүүхэд, шавь нар, тэнхимийн хамт олон хамтраад тэнхимийн 30 жилийн ойгоор энэ сайхан үйл явдал болсон. Мөн бид нийгмийн ажлын ангийн нэг тэргүүний оюутанд нэрэмжит тэтгэлэг, сургалтын тэтгэлгийг нь өгье гэж амласан болохоор өнөөдөр хаврын сүүл сарын шинийн арван есний сайхан өдөр Нийгмийн ажлын гуравдугаар курсийн оюутан С.Буяндэлгэрт тэтгэлгийг нь гардуулж өглөө.
Энэ сайхан өдрийг би хэзээ ч мартахгүй ээ. Би өөрөө багш хүн болохоороо тэтгэлэг хүртсэн охинд зориулаад нэг дэвтэр нээж, хүн ямар зйүлсийг эрхэмлэж явах ёстой, юуг анхаарах ёстойг бичиж тэмдэглэж өгсөн. Өнөөдрийн энэ сайхан завшаант өдрийг тохиолдуулж залуучууд бүгдээрээ улс эх орноо хөгжүүлэхэд үнэтэй хувь нэмэр оруулахыг хүсэн ерөөе.
СОЦИОЛОГИ, НИЙГМИЙН АЖИЛ ТЭНХИМ
