Бүгд Найрамдах Чех Улсаас Монгол Улсад суугаа Онц бөгөөд Бүрэн эрхт Элчин сайд ноён Ян Вытопил (Jan Vytopil) 2022 оны 5 дугаар сарын 2-ны өдөр МУИС-д айлчиллаа. Элчин сайдыг МУИС-ийн захирал, доктор Б.Очирхуяг, Санхүү, төлөвлөлт хариуцсан дэд захирал, доктор Ц.Болормаа, ШУС-ийн БУС-ын зөвлөх дэд профессор, доктор Д.Түмэнжаргал, ХАХ-ийн мэргэжилтэн Д.Сая-Эрдэнэ нарын бүрэлдэхүүнтэйгээр хүлээн авч уулзлаа.
Уулзалтын эхэнд МУИС-ийн захирал Б.Очирхуяг ноён Элчин сайд Ян Вытопилд Монгол Улсад суух Элчин сайдаар томилогдсонд баяр хүргэж цаашдын ажилд нь амжилт хүсэв. Тэрээр үргэлжлүүлэн МУИС болон Чехийн их сургуулиуд хоорондын хамтын ажиллагааны талаар товч мэдээлэл өгсөн юм.
Элчин сайд ноён Ян Вытопил дотноор хүлээн авч буйд нь МУИС-ийн удирдлагад талархлаа илэрхийлээд, ковидын үеэрх зогсонги байдлыг хөдөлгөх, уламжлалт хамтын ажиллагааг эрчимжүүлэх, шинэ боломжуудыг эрж хайх зэрэг зорилготой буйгаа дурдаад цаашид хоёр улсын их, дээд сургуулиудын хамтын ажиллагааг эрчимжүүлэх талаар санаа тавин ажиллана гэдгээ хэлэв.
Чех улсад одоогоор 11000 гаран монгол хүн амьдарч, 100 орчим оюутан их дээд сургуульд, 3000 орчим хүүхэд бага, дунд сургуульд суралцаж байгаа, мөн хоёр орны уламжлалт харилцаа нь хамтын ажиллагааг илүү олон чиглэлд өргөжүүлэх, идэвхжүүлэхэд нөөц бололцоо болно гэж харж байна. Засгийн газар хоорондын гэрээ 2019 онд байгуулсан бөгөөд Монгол улс, тэр дундаа МУИС энэхүү бололцоог чех оюутан, судлаачдаас илүү бага ашиглаж байна гэж дүгнэж байна. Өнгөрсөн долоо хоногт хоёр улсын боловсролын яамд зөвшилцөлд хүрч жилдээ 2 судлаач тус улсад судалгааны хүрээнд зочлох, хэл, биологи, эдийн засгийн чиглэлээр оюутнууд хүлээн авах, 2 оюутанг жилийн хугацаанд суралцуулах талаар хэлэлцсэнийг дурдаад хамтын ажиллагааны талаар ямар ажил өрнүүлэх талаар санал асуув.
Захирал Б.Очирхуяг МУИС нь чех хэл, судлалын чиглэлээр 80 гаруй мэргэжилтэн бэлтгэсэн ба 2009 оноос эхлэн элсэгч байхгүй шалтгааны улмаас энэ чиглэлийн хөтөлбөр зогсонги байдалд орсон, мөн багш дутагдалтай байгаа талаар хэлэв. Мөн Монгол Улсын ерөнхийлөгчийн санаачилсан 2000 хүүхдийг гадаад сургах ажлын хүрээнд МУИС нь өөрт олгогдсон квотын хэмжээнд Чех улсад суралцах хүсэлтэй хүүхдүүдэд чех хэлний зохих түвшний мэдлэг олгох сургалт явуулах, улмаар тус улсын их сургуулиудтай хамтран бакалавр болон ахисан түвшинд 2+2 хөтөлбөр хэрэгжүүлэх хүсэлтэй байгаагаа илэрхийлж Элчин сайдын яамны зүгээс боломжит дэмжлэг үзүүлнэ гэдэгт итгэлтэй байгаагаа илэрхийлэв. Мөн судлагааны олон чиглэлээр их сургуулиудын тэнхим, профессор хоорондын хамтын ажиллагааг хөгжүүлснээр хоёр улсын засгийн газар хоорондын гэрээг Монголын талаас бага ашиглаж буй орон зайг нөхөж болох юм гэсэн санааг дэвшүүлэв. Учир нь Чех улс нь монгол судлалын чиглэлээр дэлхийд дээгүүрт ордог бөгөөд жилд дунджаар 10 орчим судлаач энэхүү гэрээний шугамаар Монгол Улсад ирж судалгаа хийдэг ба олон тооны оюутнууд ирж суралцдаг юм. Харин Монгол улсын зүгээс цөөн тооны оюутан зуны сургалтанд хамрагдах төдийхнөөр хязгаарлагддаг тул судалгааны чиглэлүүдийг олшруулах замаар энэхүү хамтын ажиллагааг өргөжүүлэх боломжтой юм гэв.
Уулзалтын талууд хоёр улсын боловсрол, соёл, шинжлэх ухааны хамтын ажиллагааг улам бүр дэмжин дэлгэрүүлэх зорилгоор хэрхэн хамтран ажиллах талаар мэдээлэл солилцож ажиллах талаар санал нэгдлээ.
Хамтын ажиллагааны хэлтэс
