МУИС-ийн стратегийн төлөвлөгөөнд туссан “дэлхийн шилдэг их, дээд сургуулиудтай хамтран ажиллах” зорилтын хүрээнд өмнөх хамтын ажиллагааг идэвхжүүлж ОХУ-ын Уралын Холбооны Их Сургуультай сургалт, судалгааны өргөн хүрээнд хамтран ажиллах гэрээ шинэчлэн байгууллаа.
МУИС-ийн багш, судлаачид тус их сургуультай урт хугацаанд хамтран ажиллаж ирсэн бөгөөд 2011, 2015 онуудад их сургууль хоорондын хамтын ажиллагааны гэрээ байгуулан ажиллаж ирсэн. Шинэчлэн байгуулсан хамтын ажиллагааны гэрээний хүрээнд хоёр их сургууль хамтарсан судалгаа, хурал, семинар зохион байгуулах; оюутан, судлаач, эрдэм шинжилгээний бүтээл, их сургуулийн үйл ажиллагаа, менежментийн туршлага солилцох болон оюутныг хөгжүүлэх чиглэлд хамтран ажиллахаар болов.
Хамтын ажиллагааны гэрээ байгуулах үеэр МУИС-ийн талаас захирал Б.Очирхуяг, Сургалт оюутан хариуцсан дэд захирал Д.Бадмаанямбуу, Эрдэм шинжилгээ, хамтын ажиллагаа хариуцсан дэд захирал С.Должин, Хэрэглээний шинжлэх ухаан, инженерчлэлийн сургуулийн захирал Д.Бямбажав, Хамтын ажиллагааны хэлтсийн дарга Д.Бадамдаш, ШУС-ийн Боловсрол, сэтгэл судлалын тэнхимийн эрхлэгч М.Дэлгэржав нар, Уралын Холбооны Их Сургуулийн талаас тэргүүн проректор С.В.Кортов, Проректорын орлогч, төгсөгчдийн холбооны дарга А.В.Пономарев, Олон улсын боловсролын төвийн дарга Я.С.Высоцкая, Хэвлэлийн албаны дарга Д.А.Бенеманский нар байлцав.
МУИС-ийн захирал Б.Очирхуяг “МУИС, ОХУ-ын их, дээд сургуулиудтай хамтран ажиллаж ирсэн урт хугацааны түүхэн туршлагатай. Тиймээс дэлхийн дахиныг хамарсан цар тахлын нөлөө, хязгаарлалт суларч буй энэ үед Уралын Холбооны Их Сургуультай хамтын ажиллагааг сэргээж буйд талархалтай буйгаа” онцлов. Мөн тус сургуулийн хүчирхэг салбарууд болох нийгэм, хүмүүнлэгийн ухааны салбарт онцгой анхаарч хамтран ажиллах хүсэлтээ илэрхийлж, юун түрүүнд хамтын ажиллагааг идэвхжүүлэхээр хамтарсан судалгааны төсөл, эрдэм шинжилгээний хурал зохион байгуулж ажиллах боломжтойг илэрхийлэв.
Уралын Холбооны Их Сургуулийн тэргүүн проректор С.В.Кортов “тус сургуульд олон Монголчууд сурч боловсорч ирснийг онцлоод Монголын дээд боловсролын байгууллагуудтай, тэр дундаа МУИС-тай хамтран ажиллахдаа үргэлж таатай байдгаа” илэрхийлэв. Мөн тус сургуульд шинээр хэрэгжүүлж буй төсөл, бүтээн байгуулалтуудыг танилцуулаад, МУИС-ийн захирал Б.Очирхуягийн саналуудыг бүрэн дэмжиж ажиллахаа хэлэв. Талууд уулзалтын эцэст хамтын ажиллагааны гэрээ болон гэрээг хэрэгжүүлэх 2022-2023 оны хичээлийн жилийн төлөвлөгөөг хэлэлцэн батлав.
Уралын Холбооны Их Сургууль (Уральский федеральный университет, https://urfu.ru/ru/) нь 1920 онд байгуулагдсан байгаль, нийгэм, хүмүүнлэгийн ухаан, инженерчлэл, хэрэглээний шинжлэх ухаан, анагаах ухааны чиглэлээр бакалавр, магистр, докторын түвшний 424 хөтөлбөрүүд хэрэгжүүлдэг, QS 2021 дэлхийн их сургуулиудын эрэмбээр 312–д, улсдаа 10-т жагссан тэргүүлэх дээд боловсролын байгууллага юм. Тус их сургууль нь ОХУ-ын Екатеринбург хотод байрладаг 12 бүрэлдэхүүн сургууль, 164 судалгаа, хөгжүүлэлтийн лаборатори, 72 судалгааны хүрээлэн, төвүүдтэй. Тус сургуулийн нийт сургалтын 75% орчим нь инженер, технологийн салбарт, үлдсэн 25% орчим нь нийгэм, хүмүүнлэгийн ухааны салбарт чиглэсэн байдаг. Гэвч QS 2021 дэлхийн их сургуулиудын эрэмбээр нийгмийн бодлого, удирдлагын хөтөлбөр 26-д, зочлох үйлчилгээний менежмент хөтөлбөр 47-д, философийн хөтөлбөр 51-д жагссан сайн үзүүлэлттэй байна. Мөн тус сургуулиас эрхлэн хэвлүүлдэг 20 эрдэм шинжилгээний сэтгүүлийн тал нь Scopus-д бүртгэгдсэн байна.
Тиймээс багш, судлаачид та бүхэн шинэчлэн байгуулсан хамтын ажиллагааны гэрээний хүрээнд тус сургуультай хамтарсан сургалт, судалгааны төсөл хэрэгжүүлэх, хамтарсан эрдэм шинжилгээний бүтээл хэвлүүлэх, ахисан түвшний оюутан хамтарч удирдах, эрдэм шинжилгээний сэтгүүлийн редакцийн гадаад гишүүнээр орж ажиллах зэргээр хамтран ажиллах боломжтойг дуулгаж байна.
ХАМТЫН АЖИЛЛАГААНЫ ХЭЛТЭС
