МУИС-ийн 80 дахь хичээлийн шинэ жилийн нээлтийн үйл ажиллагаа өнөөдөр боллоо. Нээлтийн ажиллагаанд Монгол Улсын Ерөнхийлөгч У.Хүрэлсүх, Боловсрол, шинжлэх ухааны сайд Л.Энх-Амгалан, МУИС-ийн удирдлагууд, Эмерит профессор, эрдэмтэн багш нар, УЗ-ийн гишүүд, БШУЯ-ны холбогдох албан тушаалтнууд оролцсон юм.
Монгол Улсын Ерөнхийлөгч У.Хүрэлсүх ард түмнээ соён гэгээрүүлж, шинжлэх ухаан, эрдэм мэдлэгийн үрийг тарин, эх орныхоо хөгжил дэвшлийн түүчээ болсон МУИС-ийн эрдэмтэн багш нарт талархал илэрхийлээд, олон мянган сэхээтэн бэлтгэн, нийгмийн амьдралын салаа мөчир бүрд шинжлэх ухаан, технологийн дэвшлийг бодит ажил хэрэг болгохын зэрэгцээ төрийн бодлого, шийдвэрийг судалгаанд суурилсан, шинжлэх ухаанч байхад бүх талын дэмжлэг үзүүлж байгааг онцлон тэмдэглэв.
80 дахь хичээлийн шинэ жилийг нээж МУИС-ийн захирал Б.Очирхуяг МУИС-ийг сонгон, элсэн суралцаж байгаа элсэгчдэдээ баяр хүргэж сурлагын өндөр амжилт хүсээд ирээдүйн манлайлагч болохоор тэмүүлэн буй залуусыг Их сургуульдаа итгэл хүлээлгэн мордуулсан эцэг эхчүүддээ талархал илэрхийлэн, Эрдэм шинжилгээ, сургалт, хөгжил дэвшил, бүтээн байгуулалт, урагш тэмүүлсэн амжилтуудаар түүчээлэн Их сургуулийнхаа түүхт 80 жилийн ойгоо угтан авч буй эрдмийн хамт олондоо баяр хүргэлээ. Мөн “Их Сургуулийн шинэ наяны шанг татах хариуцлагатай цаг мөч бидэнд ирээд байна. Университет, факультет, декан, ректор, Эрдмийн зөвлөл, оюутан зэрэг үгсийг Монголчуудын чихэнд анхлан дуулгасан манай их сургууль өдгөө Z generation, Дижитал их сургууль, хиймэл оюун ухаан, цахим сургалт зэрэг эрин үеийн шинэ шаардлагыг хангахуйц сургалтын хөтөлбөр, сургалтын орчныг бүрдүүлэн, орон зай, цаг хугацааг үл хамааран, насан туршдаа сурч боловсрох олон талт сургалтын хэлбэрүүдийг бий болгож, техник технологи, аж үйлдвэрийн шинэ эринд зохицсон шинэ их дээд сургуулийн зорилгыг ханган ажиллахаар хэтийн зорилгоо тодорхойлж байна. Өөрөөр хэлбэл бид дэлхийн чиг хандлага руу дэвшин өөрчлөгдөнө. Үүний зэрэгцээ төрийн тэргүүлэх их сургуулийн хувьд сургалтын үйл ажиллагаанаас гадна улс эх орныхоо өмнө тулгамдаж буй саад бэрхшээлийг даван гарах суурь судалгаа хийх, төр засгийн бодлого шийдвэрийг шинжлэх ухаанч байхад судалгаагаар үйлчлэх үүргийг МУИС нэр төртэйгөөр гүйцэтгэсээр ирсэн. Одоо бид энэ үүргээ шинэ шатанд гаргах, судалгааг нэмэгдүүлэх чиглэлд зорин ажиллаж байна” гэлээ.
МУИС нь 2010 оноос эхлэн Web of Science мэдээллийн санд бүртгэлтэй мэргэжлийн сэтгүүлд хэвлүүлсэн бүтээлээс хамгийн өндөр импакт фактортой сэтгүүлд хэвлүүлсэн чансаа өндөр эрдэм шинжилгээний бүтээлийг шалгаруулан МУИС-ийн Захирлын нэрэмжит шагнал олгодог уламжлалтай. 2022 оны “МУИС-ийн Захирлын нэрэмжит шагнал”-ыг Nature сэтгүүлд хэвлэгдсэн “Дэлхийн ойн унанги модны задралд шавьжны үзүүлэх хувь нэмэр” сэдэвт өгүүллийн хамтран зохиогч ХШУИС-ийн Хүрээлэн буй орчин, ойн инженерчлэлийн тэнхимийн профессор Начингийн Баатарбилэг хүртлээ. Nature сэтгүүл нь 2022 oны дэлхийн эрэмбийг тэргүүлж байгаа бөгөөд одоогоор импакт фактор нь 42.78 байгаа юм. Тус өгүүлэл нь дэлхийн дулаарлын процессийг дэмждэг нүүрстөрөгчийн давхар ислийн хэмжээг тооцоход нарийвчлан тооцогддоггүй байсан унанги модноос ялгарах хэмжээг тодорхойлж дулаарлын хэм хэмжээг тогтоодог тооцооллын аргуудад нэмж тооцоолох боломж, үхсэн моддын задралын үйл явцад цохны оролцоо зэргийг дэлхийн 6 тивд 55 суурин цэгт 50 судалгааны баг зэрэг судалж тогтоосноороо онцлог байна.
Нээлтийн үйл ажиллагааны үеэр МУИС-ийн 2022-2023 оны хичээлийн жилд элссэн шилдэг элсэгчдийн төлөөлөлд “МУИС-ийн нэрэмжит тэтгэлэг”-ийн батламж гардуулсан юм. Тухайлбал,
- Математикийн Олон улсын олимпиадын 2-р байр, Математикийн Улсын олимпиадын 1-р байр эзэлж, МУИС-ийн нэрэмжит тэтгэлгийн Олон улсын олимпиад нөхцөлийг хангаж, Хэрэглээний Шинжлэх Ухаан, Инженерчлэлийн Сургуульд элссэн шилдэг элсэгч Бат-Амгалангийн БИЛЭГДЭМБЭРЭЛ
- Биологийн Улсын олимпиадын 1-р байр эзэлж, МУИС-ийн нэрэмжит тэтгэлгийн Улсын олимпиадын нөхцөлийг хангаж, Хэрэглээний Шинжлэх Ухаан Инженерчлэлийн Сургуульд элссэн шилдэг элсэгч Эрдэнэбаатарын БОДЬХҮҮ
- Улсын Газар зүйн олимпиадад 1-р байр эзэлж, МУИС-ийн нэрэмжит тэтгэлгийн Улсын олимпиадын нөхцөлийг хангаж Шинжлэх Ухааны Сургуулийн Байгалийн Ухааны Салбарт элссэн шилдэг элсэгч Амартүвшингийн НАРАНСОЛОНГО
- Математик хичээлийн Элсэлтийн Ерөнхий шалгалтын 800 оноогоор элсэж, МУИС-ийн нэрэмжит тэтгэлгийн МУИС-ийн нэрэмжит тэтгэлгийн Байгалийн Ухааны Салбарт элсэгчийн болзол хангаж, Хэрэглээний Шинжлэх Ухаан Инженерчлэлийн Сургуульд элссэн шилдэг элсэгч Батсайханы ШИХИХУТУГ
- Нийгмийн тухай мэдлэг болон орос хэлний хичээлийн Элсэлтийн Ерөнхий шалгалтын 800 оноогоор элсэж, МУИС-ийн нэрэмжит тэтгэлгийн Өндөр онооны болзол болзол хангаж, Шинжлэх ухааны Сургуулийн Нийгмийн Ухааны салбарт элссэн шилдэг элсэгч Болдын ТОДБИЛЭГ
- Англи хэл хичээлийн Элсэлтийн Ерөнхий шалгалтын 800 оноогоор элсэж, МУИС-ийн нэрэмжит тэтгэлгийн Өндөр онооны болзол хангаж, Олон Улсын Харилцаа Нийтийн Удирдлагын Сургуульд элссэн шилдэг элсэгч Энхболдын ТЭРГЭЛ
- Математик хичээлийн Элсэлтийн Ерөнхий шалгалтын оноо 800 оноогоор элсэж, МУИС-ийн нэрэмжит тэтгэлэг өндөр онооны болзол хангаж, Бизнесийн Сургуульд элссэн шилдэг элсэгч Моломын АЛТАНЦЭЦЭГ
- МУИС-ийн нэрэмжит тэтгэлгийн Монгол угсаатан төрөлөөр элсэж буй ОХУ-ын БНТУ ( Бүгд Найрамдах Тува Улс)-аас элссэн шинэ элсэгч Oorzhak Aidaiana /Ооржак Айдаяна/
МУИС-д элсэн орсон элсэгчдийг төлөөлж Улсын математикийн 58-р олимпиадаас алтан медаль, Олон улсын математикийн 63-р олимпиадаас мөнгөн медаль хүртэн МУИС-д элссэн Б.Билэгдэмбэрэл талархлын үг хэлж эрхэм багш нарынхаа итгэлийг даан нийгэмд мэдлэгээр манлайлсан, нийгмийн хөгжлийн түүчээ нь байж сургуулийнхаа алсын хараа “Дэлхийн түвшний их сургууль” болох их үйл хэрэгт гар бие оролцон дэмжиж ажиллахыг оюутан төгсөгчдөдөө уриаллаа.
Ийнхүү МУИС-д шинээр элсэн орсон оюутнууд “Оюутны тангараг” өргөж, МУИС-ийн нэрэмжит тэтгэлг хүртсэн оюутны төлөөлөл хичээлийн шинэ жилийн анхны хонхоо цохьсноор нээлтийн үйл ажиллагаа өндөрлөсөн юм.
