Монгол Улсын Их Сургууль, ХБНГУ-ын Дрездений Техник, Эдийн Засгийн Дээд Сургууль (HTW Dresden) хамтран археологийн судалгаанд хэрэглээний компьютер, инфоматикийн шинжлэх ухааны аргуудыг ашиглах эрдэм шинжилгээний хамтарсан төсөл хэрэгжүүлэх, улмаар хоёр их сургуулийн хамтарсан “Археоинформатикийн магистрын хөтөлбөр” хөгжүүлэх, профессор багш, залуу судлаач, оюутан солилцох хамтын ажиллагааны гэрээг 2019 оны 9 сарын 16-нд байгуулсан билээ. Энэхүү хамтын ажиллагааны шугамаар МУИС-ийн урилгаар Германы археологич, доктор Хендрик Роланд 2021-2022 оны хичээлийн жилийн хаврын улиралд Шинжлэх Ухааны Сургуулийн Нийгмийн Ухааны салбарын Антропологи, Археологийн тэнхимд зочин багшаар ажиллаж “Археологи дахь компьютерийн хэрэглээний удиртгал”, “Археологийн бүртгэлийн сан ба геомэдээллийн систем” хичээл заасан юм.
Энэ зун 2022 оны 7 сарын 22-ноос 8 сарын 5-нд Монголын төв нутаг Орхоны хөндийд Монгол-Германы Орхон Экспедицийг (удирдагч доктор К.Франкен, проф. У.Эрдэнэбат) түшиглэн хоёр орны их сургуулийн мэргэжлийн багш, оюутнууд хамтран “Археологийн хайгуул ба дижитал баримтжуулалт” сэдэвт зуны сургалтыг амжилттай зохион явуулав. Энэхүү сургалтанд МУИС-ийн проф. У.Эрдэнэбатын удирдсан Антропологи, Археологийн тэнхим болон проф. А.Энхбаярын удирдсан Компьютер график, мультимедиа судалгааны лаборатори, ХБНГУ-ын Дрездений Техник, Эдийн Засгийн Дээд Сургуулийн проф. Марко Блок-Берлитц, проф. Мартин Очыпка нарын удирдсан оюутнууд оролцов. Нийт 14 хоногийн хугацаанд хоёр багт хуваагдан Өвөрхангай аймгийн Хархорин суман дахь Хархорум музей болон Архангай аймгийн Хотонт сумын нутагт орших Уйгурын Хар балгас, Цагаан сүмийн балгас зэрэг түүх, археологийн дурсгалт газар ажиллав.
Багш оюутнууд газарзүйн мэдээллийн систем, фотограметрийн арга болон лидар технологи ашиглан гурван хэмжээст загвар байгуулах, олдворын дижитал баримтжуулалт хийх зэрэг олон чиглэлийн судалгаа, туршилтын ажлуудыг амжилттай хийж гүйцэтгэв. Зуны сургалтын төгсгөлд 2022 оны 8 сарын 3-нд Монгол-Германы хамтарсан “Digital Archaeology-2022” Workshop-ыг МУИС дээр амжилттай зохион байгуулж, сургалт дадлагад оролцсон оюутнууд хийж хэрэгжүүлсэн төслийнхөө үр дүнг тайлагнав.
Монгол-Германы хамтарсан зуны сургалт нь манай хоёр сургуулийн хамтын ажиллагааг бэхжүүлээд зогсохгүй, ахисан түвшинд санал болгож байгаа археологи, информатикийн салбар дундын хичээлүүд нь МУИС-ийн сургалтын хөтөлбөр дэх шинэ туршлага, цаашид хөгжүүлвэл зохих ач холбогдол бүхий болсон хэмээн үнэлж байна.
Зуны сургалтанд оролцсон МУИС-ийн Антропологи, Археологийн тэнхимийн 5 оюутан, Компьютер график, мультимедиа судалгааны лабораторийн 5 оюутан энэ оны 11 сард Дрездений их сургуульд 14 хоногийн хугацаатай очиж туршлага судлахаар боллоо. Тэд энэ удаад зуны сургалтаар хамтран хэрэгжүүлсэн туршилт судалгаагаа мэргэжил нэгт залуустайгаа дахин хамтарч үргэлжлүүлэхээр төлөвлөж байна.
