“Шинэ үеийн залуу судлаач” сэдэвт эрдэм шинжилгээний хурлыг хоёр дахь жилдээ амжилттай зохион байгууллаа. Тус хурлаар МУИС-ийн Ахисан түвшний суралцагчдын шилдэг илтгэлүүдийг хэлэлцүүлсэн юм.
Хурлыг МУИС-ийн Ахисан түвшний сургуулийн захирал Н.Баатарбилэг нээж үг хэллээ. Тэрбээр, “Энэхүү эрдэм шинжилгээний хурлаар Ахисан түвшний сургуулийн нийгэм, хүмүүнлэг, байгаль, инженерчлэлийн чиглэлийн шилдэг илтгэлүүдийг хэлэлцсэн. Өнөө цагт судлаач ганцаараа нэг чиглэлээр судалгаа хийдэг үе ард хоцорсон. Цаашдаа салбар бүрийн залуу судлаачид хамтарч ажиллана гэдэгт итгэлтэй байна. Учир нь аливаа асуудлыг олон талаас харж, судлах шаардлага бидэнд тулгарч байна. Мөн салбар сургуулийнхаа эрдэм шинжилгээний хуралд түрүүлсэн бакалаврын түвшний оюутнууд ханын илтгэлээр оролцож байгаа. Энэ нь тус оюутнууд төгсөөд магистр, докторт суралцахдаа судалгааны баг, чиглэлээ олох боломжийг нээн өгч буй хэрэг юм. Өөрөөр хэлбэл, өнөөдөр энд алдаа оноогоо хэлэлцэж, ахисан түвшний оюутнуудтай хамтарч ажиллах бололцоог бакалаврын түвшний оюутнуудад олгож байна. “Шинэ үеийн залуу судлаач” хэмээн нэрлэсэн шалтгаан нь залуус нэгнээсээ суралцах, хамтран ажиллаж, салбар хоорондын судалгааг хөгжүүлэх ач холбогдолтой” гэв.
“Шинэ үеийн залуу судлаач” эрдэм шинжилгээний хурал нь оюутнууд хоорондоо судалгаа шинжилгээнийхээ ололт амжилтыг хэлэлцэх зорилготой болохыг зохион байгуулагчдын зүгээс онцолж байлаа.
Ахисан түвшний сургуулийн Судалгааны лаборатори хариуцсан мэргэжилтэн, доктор У.Уянгаа: Энэхүү хурал нь МУИС-ийн Ахисан түвшний суралцагчдын магистр, докторантуудын салбар бүрээс шалгарсан шилдгийн шилдэг илтгэлүүдийг хэлэлцүүлэх зорилготой баярын хурал юм. Энэ жилийн хувьд дөрвөн салбарын 12 илтгэлийг амжилттай хэлэлцүүллээ. Бакалаврын түвшинд 18 илтгэгч оролцсон. Хэдийгээр манайх Ахисан түвшний сургууль ч гэлээ бакалаврын түвшний оюутнуудыг дэмжин ажиллаж байна. Учир нь эдгээр оюутнууд их сургуулиа төгссөнийхөө дараа ирээдүйд хамтран ажиллах сонирхолтой багш судлаачдаа олох, судлаач болох хүсэл эрмэлзлийг нь урамшуулах зорилготой гэв.
Хурлын зочин илтгэгчээр МУИС-ийн Эдийн засгийн тэнхимийн доктор, дэд профессор Н.Ууганбаатар оролцлоо. Тэрбээр, залуу судлаачдад жилд нэг удаа хийсэн судалгаа тэр дундаа дипломын ажлаа танилцуулах боломжийг олгож байгаа нь зөв зүйтэй алхам болохыг онцоллоо. Мөн диплом, судалгааны ажлыг маш их хүч хөдөлмөр, цаг зав зарж хийдэг. Гэвч нэг хувь нь хэвлэмэл байдлаар нэг хувь нь номын санд үлддэг. Өөрөөр хэлбэл, эргэлтэд ордоггүй энэхүү оюуны бүтээлээ бусдад танилцуулж, илүү сайжруулах нь зөв. Энэ мэтээр залуу судлаачид бие биетэйгээ уулзаж, харилцан туршлага солилцох нь өндөр ач холбогдолтой гэлээ.
Эрдэм шинжилгээний хуралд оролцогчдын сэтгэгдлийг сонслоо.
Бизнесийн сургуулийн Санхүүгийн магистрант, С.Бурмаа: Энэхүү эрдэм шинжилгээний хурлыг зохион байгуулсан нь залуу судлаач бидний хувьд чухал алхам юм. Бид зөвхөн тэнхимийнхээ цөөн багш нарт судалгаагаа ярих биш, бусад салбар сургуулиудтай мэдээлэл солилцох боломж олдсон нь сайшаалтай. Ахисан түвшний сургуулийн Н.Баатарбилэг захирлын хэлсэн, “Өнөө цагт судалгааг нэг хүн хийхээ больсон” гэдэгтэй санал нэг байна. Залуу судлаачид бие биеийнхээ илтгэлийг сонсож, судалгааны чиглэл хаашаа явж байгааг харах нь сонирхолтой байсан гэлээ.
ШУС-НУС-ийн Антропологийн магистрант Б.Дархижав: Миний хувьд энэхүү эрдэм шинжилгээний хуралд анх удаа оролцож байна. Хэн, аль салбарт, ямар судалгаа хийж байгааг мэдэх нь сонирхолтой байсан. Залуу судлаачийн хувьд энэхүү эрдэм шинжилгээний хурлыг жилд нэг удаа биш, улирал бүр зохион байгуулж, давтамжийг нь ихэсгэх хэрэгтэйг онцоллоо.
ОХНУС-ийн Төрийн удирдлагын III түвшний оюутан, Г.Соёл-Ундрах: Ахисан түвшний суралцагчдын илтгэлийг сонсож, дараа эрдэм шинжилгээний ажилдаа тусгахаар болсондоо баяртай байна. Энэ төрлийн эрдэм шинжилгээний хурал зохион байгуулагдвал оролцоход бэлэн байна гэлээ.
Бакалаврын түвшний оюутнуудыг урамшуулах, тэднийг эрдэм шинжилгээний ажилд дур сонирхолтой болгох үүднээс хуралд оролцогчдоос санал авч, тэргүүний ханын илтгэлийг шалгаруулсан юм. Тэргүүний ханын илтгэлээр ШУС-БУС, Физикийн III түвшний оюутан О.Баярцэцэг тодорлоо. Тэрбээр, “Гиперспектр буюу хэт олон сувагт “LCTF” камер ашиглан ургамлыг төрөл зүйлээр ангилан ялгах шинэ алгоритм” сэдвийн хүрээнд илтгэл танилцуулсан юм.
Шилдэг 12 илтгэгч
[NPG id=94873]
[gview file=”https://news.num.edu.mn/wp-content/uploads/2023/05/jpg2pdf_compressed.pdf”]
Ахисан түвшний сургууль
