ХБНГУ-ын төлөөлөгчид Монгол Улсын БШУЯ-ны урилгаар 2024 оны тавдугаар сарын 15-ны өдөр Монгол-Германы эрдэм шинжилгээний дугуй ширээний уулзалтад оролцлоо. Энэхүү үйл ажиллагаа нь Монгол, Герман хоёр улсын хооронд эрдэм шинжилгээ, технологийн хамтын ажиллагаа хэрэгжүүлж эхэлсэний 20 жилийн ойн хүрээнд зохион байгуулагдлаа.
Уулзалтад Германы талаас тус улсын Боловсрол, эрдэм шинжилгээний яамыг төлөөлж эрдэм шинжилгээ судалгааны нэгжийн дарга Флориан Франк тэргүүтэй 11 зочин оролцсон бөгөөд тэд DLR-PT төслийн менежментийн агентлаг (Project Management Agency DLR-PT), Германы эрдмийн солилцооны байгууллага DAAD, Роберт Кошийн хүрээлэн (Robert-Koch-Institute), Падерборн их сургууль (Paderborn University), Франкфурт дахь Сэнкэнбергийн байгалын судалгааны нийгэмлэг (Senckenberg Society for Nature Research Frankfurt), Ханноверийн Лайбницийн их сургууль (Leibniz University Hannover) болон Төв Азийн тогтвортой инновацийн товчоо (Central Asian Sustainable Innovation Bureau)-г төлөөллөө. Уулзалтын эхэнд Боловсрол, эрдэм шинжилгээний яамыг төлөөлж хатагтай Патрисия Романовский хоёр улсын хоорондын эрдэм шинжилгээний хамтын ажиллагааны тухай болон хамтарсан төслүүдийн хэрэгжилтийн явц болон санхүүжилтийн талаар дэлгэрэнгүй мэдээлэл өглөө. 2023-2033 онуудад хэрэгжүүлэх төслүүд нь гадаад хамтын ажиллагааг бэхжүүлэх, бүс нутгуудын судалгааны дэд бүтцийг сайжруулах, их дээд сургуулиудын хил дамнасан хамтын ажиллагааг хөгжүүлэх болон судлаачид хоорондын хамтын ажиллагааг өргөжүүлэхэд чиглэх ажээ. Тэрбээр мөн одоогийн байдлаар нээлттэй зарлагдаж буй төслийн талаар зар хүргэлээ.
Уг төслийн нэр нь “Partnerships for sustainable solutions” буюу Тогтвортой шийдлийн түншлэл бөгөөд өргөдөл мэдүүлэх cүүлийн хугацаа 2024 оны долоодугаар сарын 08-ны өдөр дуусна. Төсөлд хамрагдах чиглэлүүд нь сэргээгдэх болон тогтвортой эрчим хүч, цаг уурын өөрчлөлтөнд дасан зохицох, цаг уурын болон хүрээлэн буй орчны эрсдэл, усны менежмэнт, биологийн олон янз байдлын судалгаа болон эрүүл мэндийн судалгаа юм.
Монголын талаас МУИС, ШУТИС, ХААИС, АШУҮИС, ШУА болон Монгол-Германы хамтарсан ашигт малтмал, технологийн их сургуулийн эрдэм шинжилгээ, гадаад харилцааны албаны төлөөлөгчид оролцон өөрсдийн их дээд сургуулийн талаар, герман улстай хамтран хэрэгжүүлдэг эрдэм шинжилгээний хамтын ажиллагааны талаар болон ирээдүйд төлөвлөж буй судалгааны ажлын тухай илтгэл тавьж хэлэлцүүлэг өрнүүллээ.
