МУИС-ийн НШУС-ийн Философийн тэнхим 2013 оны 5 дугаар сарын 8-нд философи судалж буй их, дээд сургуулийн оюутнуудын дунд философийн олимпиад зохион явууллаа. МУИС-ийн НШУС-ийн Философийн тэнхмийн эрхлэгч, проф Р.Дарьхүү тус олимпиадын үйл ажиллагааг нээж үг хэлэв.
XXI зуун нь оюун ухааны зуун бөгөөд олон нийтийн дунд философийг түгээх замаар бие даасан, шүүмжлэлт, бүтээлч сэтгэлгээг төлөвшүүлэх нь тун чухал болж байна. Иймд ЮНЕСКО-гоос гаргасан Философийн тухай “Парисын тунхаглал”-д “Хүн ямар нэг философийн сургаалыг чөлөөтэй баримтлан дагах, философийн сургалт нь хэрэгжиж буй газраа өргөжиж, эсвэл байхгүй газар шинээр бий болж байх нь зүйтэй бөгөөд оюуны соёлын охь шим болсон мэдлэгүүд, тэдгээрийг харьцуулан судлахыг дэмжих нь зүйтэй” хэмээн заасан буй.
Энэхүү олимпиад нь философи ойлголт, үзэл санааг урлаг, шинжлэх ухаан, нийгмийн амьдралд шинээр асуудал дэвшүүлэх, бие даан шийдвэрлэхэд оюутнууд суралцсанаар орчин үеийн нийгэм дэх тулгамдсан асуудлуудад өөрийн зөв үнэлэмжтэй хандах хандлагыг төлөвшүүлэхэд туслах эрхэм зорилготой билээ.
Энэхүү олимпиадыг 2010 оноос эхлэн жил бүр уламжлал болгон зохион явуулж байгаа энэ удаагийн олимпиадын эцсийн шатанд МУИС-ийн НШУС-ийн “Гермес” баг болон “Адаптаци” баг, МУИС-ийн МКС-ийн “Космос” баг, МУИС-ийн ЭЗС-ийн “Paradox” баг, МУИС-ийн ОУХС-ийн “Тархины wifi” баг, ШУТИС-ийн “SMSC” баг, СЭЗДС-ийн “Lojia” баг оролцсон юм.
Багуудын философи мэндчилгээний дараа оролцогчид философийн онолын мэдлэгтээ тулгуурлан, киноны утга санааг тайлбарлах, хэрэглээний философийн тохиолдол судлалын жишээн дээр ажиллаж, шүүгчид /профессор Т.Нэмэхжаргал, доктор С.Даваадулам, докторант Б.Санжаажав/ дүн гаргахад, “Уран илтгэгч”-ээр ШУТИС-ийн НТС-ийн оюутан Б.Нямсүрэн, “Мэргэн санаа дэвшүүлэгч”-ээр МУИС-ийн НШУС-ийн Улс төр судлалын 3-р ангийн оюутан Б.Батмэнд шалгарч, МУИС-ийн МКС-ийн Онолын математикийн “Космос” баг тэргүүн байр, МУИС-ийн НШУС-ийн “Гермес” баг дэд байранд тус тус шалгарч, өргөмжлөл, медаль, мөнгөн шагналаар хүртлээ.
Философийн олимпиадыг зохион байгуулахдаа хэрэглээний болон онолын асуудлын хүрээнд тохиолдол судлалын жишээнд судалгаа хийж, үндэслэл дэвшүүлэх байдлаар зохион байгуулдаг бөгөөд энэ нь асуудалд нухацтай, олон талаас харах зэргээр философид буюу сэтгэлгээний соёлд суралцахад оюутан залууст ач холбогдолтой юм.
Олимпиадад амжилттай оролцсон болон зохион байгуулсан нийт эрдэмтэн багш, оюунлаг оюутнууддаа баяр хүргээд, их амжилтыг хүсэн ерөөе.
Монгол Улсын Их Сургууль
Нийгмийн Шинжлэх Ухааны сургууль
Философийн тэнхим
“ЗАЛУУ ФИЛОСОФИЧ” КЛУБ
