МУИС-ийн 70 жилийн ойн ажлын хүрээнд МУИС-ийн ГХСС, гадаад хэлний сургалтын төв хамтран “Гадаад хэл соёл судлал” сэдэвт багш нарын эрдэм шинжилгээний бага хурлыг өчигдөр зохион байгууллаа. Уг хурал нь хэл шинжлэл, боловсрол судлал – гадаад хэл заах аргазүй, олон улс судлал гэсэн гурван салбарын хүрээнд тулгамдсан асуудлуудыг авч хэлэлцсэн юм.
Нийт 50 орчим илтгэл тавигдаж байгаагийн дийлэнхи хувь нь ГХСС-ийн доктор багш, докторантууд байв. Тус сургуульд одоогоор 20 гаруй докторант суралцаж байгаа бөгөөд ойрын жилүүдэд шинэ эрдмийн зэрэг цолтой багш нараар хүрээгээ улам тэлэх нь ээ. Мөн уг 3 салбар хуралдаанд тавигдсан илтгэлүүдээс нэгдсэн хуралдаанаар хэлэлцээд дэмжигдэж, шаардлага хангасан илтгэлүүдийг ГХСС-ийн эрдэм шинжилгээний бичигт хэвлүүлэх бөгөөд энэхүү эрдэм шинжилгээний бага хурал нь багш нарынхаа чадварыг дээшлүүлж эрдэмтдийн эзлэх хувийг нэмэгдүүлэх, докторант багш нартаа бүтээлийн чөлөө, тэтгэлэг олгох зэргээрээ гадаад хэл соёл судлалын чанарыг сайжруулахад ихээхэн ач холбогдолтой гэж уг хурлыг зохион байгуулагч Ph.D Б.Гэрэлт-Ирээдүй онцолсон юм.
Хурлын үеэр ГХСС-ийн дэд захирал Ph.D Д.Сайнбилэгт “ ГХСС-ийн стратеги төлөвлөлт” сэдэвт илтгэлдээ гадаад хэл соёл судлалын өнөөгийн байдал, гадаад харилцаа, стратегт төлөвлөгөөний талаар дэлгэрэнгүй ярьж, манай багш докторууд судалгаа, мэдлэг туршлага арвинтай боловч гадаадын нэр хүндтэй сэтгүүлүүдэд бүтээлээ хэвлүүлэх, эрдэмтдийн залгамж холбоо, баг харилцааг сайжруулах зэрэг зарим нэг тал дээр идэвхи санаачлага сул байгааг дурьдаад цаашид энэ тал дээр түлхүү анхаарахыг залуу докторантууддаа сануулсан юм. Мөн багш нарынхаа чадварыг сайжруулахын тулд сургуулиас эрдэм шинжилгээний зардлыг нэмэгдүүлсэн, магистр, докторын сургалтын чанар дээшилсэн, улсын болоод олон улсын эрдэм шинжилгээний төсөлд орж ажиллах зэргээр боломж их байгааг хэлж байлаа.
Завсарлаад нилээн удаж байсан энэхүү эрдэм шинжилгэний хуралд багш докторантууд маш идэвхитэй оролцож цаашдаа их семинаруудыг тогтмол зохион байгуулж, ЭШХ-ыг уламжлал болгон явуулж байх тал дээр бүгд санал нэгдэн дэмжиж байв. Бүтэн өдрийн турш үргэлжилсэн энэхүү гурван салбар хуралдаан нь гадаад хэл соёл судлалын салбарын хувьд цагаа олсон маш өргөн хүрээтэй сайхан болж өндөрлөлөө.
