БНПУ-аас Монгол Улсад суугаа Онц бөгөөд Бүрэн эрхт элчин сайд ноён Др. Кшиштоф Бойко 2019 оны 5 дугаар сарын 31-ний өдөр МУИС-д зочиллоо. Элчин сайдыг МУИС-ийн захирал Я.Төмөрбаатар хүлээн авч уулзсан бөгөөд уулзалтад МУИС-ийн ШУС-ийн Европ судлалын тэнхимийн эрхлэгч С.Булгантамир тус тэнхимийн багш, профессор Ж.Алтангэрэл, ХАХ-ийн дарга Ш.Мэндбаяр болон мөн хэлтсийн ахлах мэргэжилтэн Б.Энхжаргал нар байлцав.
Ноён Др.Кшиштоф Бойко хоёр хоногийн өмнө Монгол улсын ерөнхийлөгч Х.Баттулгад итгэмжлэх жуух бичгээ барьсан тухайгаа уулзалтын эхэнд дурдаад МУИС-д дахин айлчлан ирж буйдаа баяртай байгаагаа хэллээ. Тэрээр үргэлжлүүлэн 6 дугаар сард Варшавын их сургууль дээр зохион байгуулагдах Евроазийн орнуудын дэлхийд болон бүс нутагт эзлэх байр суурийн талаар хурлын талаар мэдээлэл өгөөд МУИС-аас төлөөлөгчид оролцох эсэх талаар мэдээлэл хүсэв. Эрхэмсэг ноён Др. Кшиштоф Бойко энэ оны 7 дугаар сард явагдах хоёр улсын Засгийн газар хоорондын хуралдаанд Варшавын их сургуулийн төлөөлөгчид оролцох талаар мөн дурдсан юм. Дээрх хоёр арга хэмжээний үеэр МУИС болон Варшавын их сургууль хоорондын харилцан ойлголцлын санамж бичигт гарын үсэг зурах, хамтын ажиллагааны талаар уулзалт хэлэлцээ хийх сайхан боломж бий талаар тэрээр онцлон тэмдэглэв.
Захирал Я.Төмөрбаатар Элчин сайдыг итгэмжлэх жуух бичгээ өргөн барьсанд нь баяр хүргээд БНПУ-ын тэргүүлэх их сургууль болох Варшавын их сургуультай харилцан ойлголцлын санамж бичиг байгуулах саналыг бүрэн дэмжиж буйгаа илэрхийлээд 6 дугаар сард Варшавын их сургууль дээр зохион байгуулагдах олон улсын хурлын арга хэмжээнд ШУС-ийн Европ судлалын тэнхимийн эрхлэгч С.Булгантамирын хамт оролцох талаар мэдээлээд уг арга хэмжээний үеэр хоёр сургууль хоорондын санамж бичигт гарын үсэг зурах боломжтой гэдгээ илэрхийлсэн юм. Мөн МУИС-ийн польш судлал хэрхэн хөгжиж ирсэн талаар дэлгэрэнгүй мэдээлэл өглөө.
Элчин сайд Др.Кшиштоф Бойко БНПУ-ын Цэргийн урлагийн академийн профессор гэдгээ дурдаад захирал Я.Төмөрбаатарын БНПУ-д томилолтоор ажиллах үед тус академид зочилж лекц уншихыг урив. Захирал Я. Төмөрбаатар уг саналыг талархан хүлээн аваад лекцийн сэдвийг ойрын хугацаанд мэдэгдэхээр тохиролцлоо.
Түүнчлэн ирэх жилд тохиох хоёр улсын хооронд дипломат харилцаа тогтоосны 70 жилийн ойн хүрээнд польш хэл, соёлыг сурталчлан ажиллах, хоёр орны их, дээд сургуулиудын хоорондын хамтын ажиллагааг идэвхжүүлэх, олон улсын харилцаа, монгол судлал, бизнес, эдийн засгийн чиглэлүүдэд идэвхтэй хамтран ажиллах талаар санал солилцсон юм.
Монгол Улсын Их Сургууль 1992 онд Польш хэлний ангид анх оюутан элсүүлжээ. 2016 он хүртэл польш хэлний ангийг 87 оюутан төгсөж польш хэл, орон судлаач мэргэжил эзэмшин диплом гардан авчээ. Монгол Улс, БНПУ хооронд соёл, шинжлэх ухааны салбарт хамтран ажиллах хэлэлцээрийн дагуу БНПУ-ын засгийн газрын тэтгэлгээр Слав судлалын тэнхимийн польш хэлний ангийн 12 оюутан 2007 онд дипломын өмнөх хэлний дадлагаа Польшийн Познань хотын Адам Мицкевичийн нэрэмжит их сургуульд бүтэн семестр, мөн польш хэлний дараачийн элсэлтийн 11 оюутан 2009-2010 оны хичээлийн жилд Польшийн Катовице хотын Шлёнскийн их сургуульд бүтэн семестр тус тус хэлний дадлага хийжээ.
Слав судлалын тэнхимийн сургалтын материаллаг баазыг бэхжүүлэх, польш хэлний ангийг тохижуулах, ном сурах бичгээр хангахад Монгол Улсад суугаа БНПУ-ын Элчин сайдын яам, ялангуяа польшийн үе үеийн элчин сайд нар ноён Станислав Годжиньки, Кшиштоф Дембницки, Збигнев Кулак, Тадеуш Хомицки нар үнэтэй хувь нэмэр оруулсныг тэмдэглэж байна.
Польшийн Катовице хотын Шлёнскийн их сургууль манай оюутнуудыг польш хэлний зуны сургалтад хамруулж, польш хэлний ангийг Европын Холбооны стандартын дагуу бэлтгэсэн ном, сурах бичгээр тогтмол хангаж байгаагийн зэрэгцээ 2012 онд польш хэлний ангийг амжилттай төгссөн 2 хүнийг магистрын сургалтад тэтгэлгээр суралцуулсан.
БНПУ-аас мэргэжилтэн багшаар 2007-2008 оны хичээлийн жилд Агнешка Рончка, 2008-2009 оны хичээлийн жилд Люцина Мочек, 2009-2011 оны хичээлийн жилд Юстина Яшиулевич нарыг тус тус урьж ажиллуулсан бөгөөд 2012-2014 онд багш Катажина Шивчик, одоо 2018-2019 оны хичээлийн жилд Ионна Вечорок нар ажилласан.
1999 онд Монгол Улсын ерөнхийлөгч Н.Багабанди БНПУ-д, 2008 онд БНПУ-ын ерөнхийлөгч Лех Качиньски Монголд төрийн дээд айлчлал хийсэн ба БНПУ-ын ерөнхийлөгч Лех Качиньски МУИС-ийн хүндэт доктор болжээ. Польш хэл судлалын салбарыг авч явахад ахмад дипломатч Ж.Алтангэрэл багшийн хичээл зүтгэл, ажлын туршлага, мэдлэг асар их үүрэг гүйцэтгэснийг тэмдэглэх нь зүйтэй юм.
Польш хэл судлалыг МУИС-д хөгжүүлэхийн тулд МУИС болон Лодзийн их сургуулийн хооронд банк, санхүү, нягтлан бодохын чиглэлээр 2+2 хөтөлбөрийг хэрэгжүүлэхээр ажиллаж, 2019 оны 6-р сард хамтарсан хөтөлбөр хэрэгжүүлэх гэрээнд гарын үсэг зурахаар бэлэн болоод байна. Энэ хамтарсан хөтөлбөрийг эхлүүлснээр Польш хэлний сургалт илүү идэвхжих юм.
МУИС нь БНПУ-ын Адам Микэвэчийн их сургууль, Шлонскийн их сургууль болон Лоодзийн их сургуультай хамтын ажиллагааны гэрээтэй бөгөөд Лоодзийн их сургуультай хос зэргийн хөтөлбөрийг 2019-2020 оны хичээлийн жилд хэрэгжүүлэн ажиллах юм.
