Франц Улсаас Монгол Улсад суугаа Онц бөгөөд Бүрэн Эрхт Элчин сайд ноён Филипп Мэрлин, Элчин зөвлөх ноён Николас Лакот нар МУИС-ийн Захирал Я.Төмөрбаатартай 2019 оны 5 дугаар сарын 31-ний өдөр уулзлаа. Уулзалтад МУИС-ийн талаас Франц хэлтэн орнуудын инноваци, хамтын ажиллагааны төвийн захирал, профессор Б.Алтангүл, ШУС-ийн Европ судлалын тэнхимийн эрхлэгч С.Булгантамир, ХАХ-ийн дарга Ш.Мэндбаяр, тус хэлтсийн ахлах мэргэжилтэн Б.Энхжаргал, франц хэлний багш Н.Мөнх нар байлцав.
Уулзалтад эхэнд Элчин сайд ноён Филипп Мэрлин хүлээн авч уулзаж буйд МУИС-ийн захирал Я. Төмөрбаатар тэргүүтэй төлөөлөгчдөд талархлаа илэрхийлээд МУИС-ийг Франц хэлтэн орнуудын Холбоонд гишүүнээр элсэн орж идэвхтэй үйл ажиллагаа явуулж байгаад нь сэтгэл өндөр буйгаа илэрхийлэв. Тэрээр үргэлжлүүлэн Франц улсын Засгийн газрын тэтгэлэгт Монгол улсаас жил бүр 10 оюутан хамруулдаг бөгөөд энэ жилээс тэтгэлгийн тоог 2-оор нэмэгдүүлсэн, мөн МУИС-д франц хэл заадаг нэг франц багшийн зардлыг дааж, ном сурах бичиг, сургалтын хөтөлбөрийг хөгжүүлэхэд ач холбогдол өгч, МУИС дээр байрладаг Франц хэлний монгол багш нарыг дэмжих холбооны үйл ажиллагааг дэмжиж ажилладаг талаар мэдээлэл өглөө.
Захирал Я. Төмөрбаатар Элчин сайдыг хүрэлцэн ирсэнд нь талархлаа илэрхийлээд МУИС-д 1963 оноос Монгол багш нар франц хэлийг зааж франц хэлтэй анхны монгол мэргэжилтэй боловсон хүчин бэлтгэж эхэлсэн талаар болон энэ хугацаанд нийт 500-аад боловсон хүчин бэлтгэн гаргасан тухай мэдээлэв. Одоогийн байдлаар мэргэжлийн ангид 70 гаруй оюутан суралцаж, 80-аад оюутан уг хөтөлбөрийг сонгон судалж байгаа талаар тэрээр нэмж дурдав.
Францын ЭСЯ-аас “Үзэл бодлоо илэрхийлэх эрх чөлөө” сэдвээр МУИС-ийн франц хэлний оюутнуудтай уулзалт ярилцлага хийхэд франц улсад суралцаагүй ч МУИС-ийн франц хэлний хөтөлбөрийн оюутнуудын хэлний болон ерөнхий мэдлэгийн түвшин маш сайн байсан. Энэ нь МУИС-ийн франц хэлний хөтөлбөр болон зааж байгаа багш нарын чанар сайн байгаагийн тод илрэл гэж дүгнээд ЗГ-ын тэтгэлэгт оюутан шалгаруулах үйл ажиллагаанд МУИС-ийг түлхүү оролцуулах тал дээр БСШУСЯ-нд зөвлөмж хүргүүлэхээр боллоо.
Түүнчлэн МУИС дээр 2019 оны 9 дүгээр сарын 19-20-ны хооронд зохион байгуулагдах Ази-Номхон далайн франц хэлний багш нарын бүсийн хурлыг Францын ЭСЯ МУИС-тай хамтран зохион байгуулахаар тогтов. Энэхүү нэр хүнд бүхийн арга хэмжээнд 10 орны 60 гаруй эрдэмтэд оролцож хуран чуулах юм.
Ноён Элчин сайд МУИС, Франц хэлтэн болон Европын холбооны бусад улсуудын их, дээд сургуулиуд харилцаа хамтын ажиллагааг хөгжүүлэхэд анхаарч ажиллахаа илэрхийллээ.
МУИС-д 1963-1964 оны хичээлийн жилээс буюу Монгол улсад анх удаа франц хэлийг зааж эхэлсэн. Өнөөдрийн байдлаар 500 гаруй төгсөгч франц хэлний багш, орчуулагч, орон судлаач мэргэжлээр суралцаж төгссөн. Тус мэргэжлээр МУИС бакалавр, магистр,докторын шаталсан сургалтыг эрхлэн явуулж байна. Франц хэлийг 4 монгол багш, 1 зочин багш зааж буй. МУИС-д ажиллаж байгаа францын зочин багш-д Францын засгийн газраас санхүүгийн дэмжлэг үзүүлдэг юм. Монгол багш нар бүгд эрдмийн зэрэгтэй бөгөөд орчуулга судлал, авиа зүй, хэл шинжлэл, орон судлал, боловсрол судлалаар мэргэшсэн.
МУИС-ийн багш, гавьяат багш Г. Буяннэмэх Франц Улсын “Легион”-ы одон, Францын Засгийн газрын “Академийн дал мод” одонгоор, профессор Б. Алтангүл Францын Засгийн газрын “Академийн дал мод” одонгоор тус тус шагнагдсан.
2018 онд АЮФ-ийн Франц хэлтэн орнуудын инноваци, хамтын ажиллагааны төвийг МУИС-д нээн ажиллуулж буй нь оюутнуудыг хамтарсан хөтөлбөрт суралцах, хамтарсан төсөл хэрэгжүүлэх, хөтөлбөрөө сайжруулах, багш судлаачдаа чадавхжуулахад онцгой хувь нэмэр оруулж байна. Энэ хүрээнд 10 гаруй оюутан Ази-Номхон далайн бүсийн Их, дээд сургуульд суралцан Францын магистрын дипломтой төгслөө. 2 удаа Ази-Номхон далайн бүсийн оюутны дунд зуны сургалт зохион байгуулж ажиллажээ.
Франц хэлний оюутнууд жил бүр Франц улсын “Амисиф”-ийн хөтөлбөрт хамрагдаж байна. Энэ жил 4 хүүхэд сургалтад хамрагдахаар шалгарч Франц улсыг зорих гэж байна. МУИС дээр Франц хэлний монгол багш нарын холбоо төвлөрөн ажилладаг, тэргүүн нь Европ судлалын тэнхимийн эрхлэгч, доктор С. Булгантамир ажилладаг.
МУИС-ийн оюутнууд жил бүр Франц хэлтний олон улсын баярт маш амжилттай оролцож байна. Энэ жилийн Цээж бичиг, Зохион бичлэгийн тэмцээнд түрүүлсэн Анхзаяа, Тэргэл нар Франц улс руу удахгүй явахаар бэлтгэлээ базааж байна. МУИС нь БНФУ-ын 12 их сургуультай хамтын ажиллагааны гэрээ байгуулан ажиллаж байгаа бөгөөд хамгийн сүүлд 2019 оны 4 дүгээр сарын 10-ны өдөр Сорбоны их сургуультай хамтын ажиллагааны гэрээ байгуулсан билээ.
