2021 оны 5 дугаар сараас 11 дүгээр сар хүртэл хугацаанд МУИС-ийн оюуны өмчийг эдийн засгийн эргэлтэд оруулах, инновацийн судалгааны ажил, төсөл хөтөлбөрүүдийг зах зээлийн эрэлт, хэрэгцээтэй уялдуулах, их сургууль-аж үйлдвэрийн хамтын ажиллагаанд багш оюутны оролцоог идэвхижүүлэх, гарааны компани байгуулахад дэмжлэг үзүүлэх зорилготой “Багш, оюутны стартап-2021” (NUM Startup 2.0) хөтөлбөрийг 5 дах жилдээ амжилттай хэрэгжүүлсэн ба өнөөдөр тус хөтөлбөрийн үр дүнг дүгнэж, гарааны компанийн төслүүдэд гарааны тэтгэлэг олгох шалгаруулалтыг зохион байгууллаа.
Хөтөлбөрт нийт 8 багийн 58 багш, оюутан оролцсон ба зохион байгуулагчаар МУИС-ийн Инновац, технологи дамжуулах төв, хөтөлбөрийн үйл ажиллагааны ивээн тэтгэгчээр Рио Тинто Монгол ХХК ажиллав.
Хөтөлбөрийг МУИС-ийн Эрдэм шинжилгээ, хамтын ажиллагаа хариуцсан дэд захирал Н.Батхүү нээж хэлсэн үгэндээ тус арга хэмжээний ач холбогдол, үр нөлөөг онцолсон ба БШУЯ-ны Шинжлэх ухаан, технологи, инновацын бодлого, хэрэгжилтийг зохицуулах газрын дарга Д.Баттогтох, ОӨГ, ДОӨБ-ын ТИСК хөтөлбөрийн зохицуулагч Б.Одгэрэл нар хөтөлбөрийн хүндэт зочноор уригдаж ШУТИ, оюуны өмчийн салбарын эрх зүйн орчин, бодлого зохицуулалтын хүрээнд гарч буй өөрчлөлт, хөгжлийн төлөвлөгөөний талаар танилцуулж, оролцогчдод амжилт хүслээ. Мөн арга хэмжээнд тус хөтөлбөрийн үйл ажиллагааны ивээн тэтгэгч байгууллага, инноваци, гарааны компанийн экосистемийн оролцогчид, гарааны компанид хөрөнгө оруулагч, хамтран ажиллагч байгууллагууд болох Рио Тинто Монгол ХХК, Залуу судлаачдыг дэмжих сан, Старт Централ Азиа ХХК, Азума Шиппин ХХК, Сократус Стартап Студио ХХК-ийн төлөөллүүд оролцож хамтран ажиллах боломжийн талаар танилцууллаа.
Шалгаруулалтад БС, Менежментийн тэнхимийн ахлах багш Ш.Энхтуул удирдагчтай “Quickdrop баг” Гэрээт түгээгчдээр хэрэглэгчийн барааг хүргэх төсөл, ШУС, Биологийн тэнхим др.Т.Сувдмаа удирдагчтай “Aroma баг” Isoprene-Модны үртэснээс байгалийн гаралтай машины үнэртүүлэгч гарган авах төсөл; др. Г.Оюундэлгэр удирдагчтай Lactica баг “Биожелли” пробиотик эрүүл мэндийн ундаа, дэд проф. Д.Лхагвасүрэн удирдагчтай “Monguard баг” РНХ агуулсан вирусийг оношлох CRISPR технологид суурилсан түргэн оношлуур үйлдвэрлэх төсөл; дэд проф. Ө.Энэрэлт удирдагчтай “Tradinsight баг” Сагсаа чонын өргөс ургамлаар нийлэгжүүлсэн мөнгөний нанобөөм агуулсан үрэвслийн эсрэг шархны тос үйлдвэрлэх төсөл; ШУС, Химийн тэнхимийн проф.Ш. Наранмандах болон ХШУИС, ХБОИТ-ийн проф.Ц.Батчулуун нарын хамтран удирдсан “Forest power баг” Ойн дагалдах түүхий эдийг боловсруулж эдийн засгийн эргэлтэд оруулах төсөл; МКУТ-ийн оюутан О.Төгөлдөр удирдагчтай “Yobit” Амьдралын хэв маягийг сонирхолтой сорилт, өрсөлдөөнөөр дэмжих зорилготой гар утасны аппликейшн хөгжүүлэх төсөл; ХБИТ-ийн дэд проф. Б. Даваапүрэв удирдагчтай “Artemisia баг” Сиверсийн шарилж (Artemisia sieversiana) ургамлын ханд агуулсан элэгний хавдрын эсрэг үйлчлэлтэй эмийн бүтээгдэхүүн үйлдвэрлэх төсөл тус тус амжилттай оролцлоо.
Шалгаруулалтын бүрэлдэхүүнд ОӨГ, ДОӨБ-ын ТИСК хөтөлбөрийн зохицуулагч Б.Одгэрэл, Рио Тинто компанийн Монгол дах Харилцаа, хамтын ажиллагаа хариуцсан менежер Б.Даваасүрэн, Залуу Судлаачдыг Дэмжих Сангийн тэргүүн Д.Жаргалсайхан, Старт Централ Азиа ХХК-ийн гүйцэтгэх захирал Б.Пүрэвсүрэн, “Азума Шиппинг Монголиа ХХК-ийн захирал Ч.Чинзориг, Сократус Стартап Студио ХХК”-ийн гүйцэтгэх захирал А.Мөнхцог нар уригдан ажиллалаа.
Шалгаруулалтад оролцож буй төслүүдийн шинэлэг байдал, шинжлэх ухааны багтаамж, мэдлэг шингэсэн давуу байдал, тухайн салбарын тулгамдсан асуудлыг хэрхэн шийдвэрлэсэн, зах зээлд тогтвортой байрших боломж, нийгэм, эдийн засгийн үр ашгийн тооцоолол зэрэг үзүүлэлтээр оноо өгч нэгдсэн дүнгээр үнэлгээ өгч байр эзлүүллээ.
Шалгаруулалтын нэгдсэн дүнгээр:
1-р байрт ХШУИС, ХБИТ-ийн дэд проф. Б.Даваапүрэв удирдагчтай “Artemisia баг” Сиверсийн шарилж (Artemisia sieversiana) ургамлын ханд агуулсан элэгний хавдрын эсрэг үйлчлэлтэй эмийн бүтээгдэхүүн үйлдвэрлэх төсөл (гарааны тэтгэлэг-12 сая ₮)
2-р байрт ШУС, Биологийн тэнхим дэд проф. Ө.Энэрэлт удирдагчтай “Tradinsight баг”, Сагсаа чонын өргөс ургамлаар нийлэгжүүлсэн мөнгөний нанобөөм агуулсан үрэвслийн эсрэг шархны тос үйлдвэрлэх төсөл” (гарааны тэтгэлэг- 10 сая ₮)
3-р байрт ШУС, Биологийн тэнхим др.Т.Сувдмаа удирдагчтай “Aroma баг”, Isoprene-Модны үртэснээс байгалийн гаралтай машины үнэртүүлэгч гарган авах төсөл (гарааны тэтгэлэг- 8 сая ₮)
Шалгаруулалтад оролцсон хамтран ажиллагч байгууллагуудаас тус арга хэмжээнд оролцсон багуудад амжилт хүсч Старт Централ Азиа ХХК-аас БС, Менежментийн тэнхимийн ахлах багш Ш.Энхтуул удирдагчтай “Quickdrop баг”, ХШУИС, МКУТ-ийн оюутан О.Төгөлдөр удирдагчтай “Yobit” багуудыг дараагийн шатанд хөгжүүлэхэд хамтран ажиллах, дэмжлэг үзүүлэх; Сократус Стартап Студио ХХК-аас бүх оролцогч багш, оюутнуудад төслийн хөгжүүлэлтэд нийт 10 сая ₮-ийн сургалт, менторын үйлчилгээг төлбөргүй үзүүлэх, ХШУИС, ХБИТ-ийн дэд проф. Б. Даваапүрэв удирдагчтай “Artemisia баг”-ийн төсөлд хөрөнгө оруулж, хамтран ажиллах; Залуу судлаачдыг дэмжих сангаас ирэх жилийн Багш, оюутны стартап хөтөлбөрт дэмжлэг үзүүлж хамтран ажиллахаа илэрхийллээ.
Хөтөлбөрт оролцсон багийн хамт олон, хамтрагч байгууллагуудад ажлын өндөр амжилт хүсье.
Инноваци, технологи дамжуулах төв
