Унгар Улсаас Монгол Улсад суух Онц бөгөөд Бүрэн эрхт Элчин сайд Борбала Анна Обрушански тэргүүтэй төлөөлөгчид МУИС-д зочлон хоёр улсын харилцаа, хамтын ажиллагааны өнөөгийн түвшин, цаашид өргөжүүлэн хөгжүүлэх талаар авч хэрэгжүүлэх арга хэмжээ, боломжуудын талаар МУИС-ийн захирал Б.Очирхуяг, Сургалт, оюутан хариуцсан дэд захирал Д.Бадмаанямбуу болон албаны бусад хүмүүстэй уулзаж, нээлттэй санал солилцлоо.
Уулзалтын үеэр МУИС болон Унгарын Гадаад хэрэг, худалдааны яам хооронд Унгар хэл, соёлыг хөгжүүлэх тухай хамтын ажиллагааны гэрээнд гарын үсэг зурлаа.
МУИС-ийн захирал Б.Очирхуяг Унгарын онц бөгөөд бүрэн эрхт элчин сайд Борбала Анна Обрушанскийг МУИС-д айлчлан ирсэнд талархал илэрхийлээд хамтын ажиллагааны гэрээний хүрээнд Унгар улсад суралцах монгол оюутнууд, зэргийн болон зэргийн бус сургалтад хамрагдах иргэд, олон нийтэд зориулсан унгар хэл, соёлын хичээл заах, багш, судлаач солилцох, хамтарсан хөтөлбөр хэрэгжүүлэх зэргээр хамтын ажиллагааны төрөл, чиглэлийг нэмэгдүүлэх асуудалд санал нэгдэв.
ХАМТЫН АЖИЛЛАГААНЫ ХЭЛТЭС
