Монгол Улсын дээд боловсролын ууган байгууллага Монгол Улсын Их Сургууль үүсэн байгуулагдаж үндэсний дээд боловсролтой мэргэжилтэн бэлтгэж эхэлсний 80 жилийн ойн хүрээнд урт хугацаанд, тогтвортой, харилцан үр өгөөжтэй үйл ажиллагаа явуулж ирсэн түнш байгууллагуудтай хамтын ажиллагааны санамж бичиг, гэрээ байгууллаа.
Австрийн шинжлэх ухааны академи, Австри
Австрийн засгийн газрын санхүүжилттэй Эрнст Мах Грант-Еврази-Номхон далайн тэтгэлэг хөтөлбөрт МУИС 2002 онд нэгдэн орсноос хойш МУИС-ийн багш, судлаач, докторантууд Австрийн ШУА-д богино хугацаагаар ажиллаж ирсэн. 2011 оны 8 дугаар сарын 3-ны өдөр тус академийн Нийгмийн антропологийн хүрээлэнгийн захирал Андре Гинрих тэргүүтэй төлөөлөгчид МУИС-д албан айлчлал хийж, хамтран ажиллах санамж бичиг байгуулсан. Тус санамж бичгийн хүрээнд нийгэм соёлын антропологи, түүх археологи, палеонтологи, уур амьсгал судлал, буддын судлалын салбарт багш оюутан солилцох, хамтарсан судалгаа хийх, сургалт, семинар, уулзалтууд зохион байгуулах, богино хугацааны эрдмийн хөтөлбөрүүд хэрэгжүүлэхээр тохиролцсон. Санамж бичгийн хүрээнд МУИС-ийн багш, докторантууд тус хүрээлэнд урт, богино хугацаагаар зочин судлаачаар ажилласан. Тус хамтын ажиллагааг хоёр тал дүгнэн үзсэний үндсэн дээр цаашид тогтвортой үргэлжлүүлж, өргөжүүлэхээр хамтын ажиллагааны санамж бичиг шинэчлэн байгууллаа. Шинээр байгуулсан санамж бичигт хамтын ажиллагааны салбаруудыг өргөтгөж, социологи, хүн ам зүй, урлаг судлал, улс төр, эдийн засгийн салбаруудыг шинээр тусгалаа.
Байгалийн улсын их сургууль, ОХУ
ОХУ-ын Эрхүү хот дахь тус сургуультай анх 2008 онд эдийн засаг, эрх зүй, менежмент, бизнес, экологийн чиглэлд хамтарч ажиллах, эрх зүйн клиникийн чиглэлээр хамтарсан хөтөлбөр санаачлах гэрээ байгуулан ажиллаж ирсэн. 2013 онд тус сургуулийн Мэдээлэл зүй, нягтлан бодохын факультеттай МУИС-ийн Эдийн засгийн сургууль хамтарсан эрдэм шинжилгээний хурал зохион байгуулах гэрээ байгуулсан. Урт хугацааны хамтын ажиллагааг хоёр тал дүгнэн үзэж сургалт, судалгааны бүхий л салбарт өргөн хүрээнд хамтран ажиллах гэрээг шинэчлэн байгууллаа.
Буриадын улсын их сургууль, ОХУ
Буриадын улсын их сургуультай МУИС-ийн багш, судлаачид байгаль, нийгэм, хүмүүнлэгийн ухааны өргөн хүрээнд олон жилийн хугацаанд хамтарч ажиллаж ирсэн туршлагатай. Тус их сургуулийн Хууль зүйн факультеттай МУИС-ийн ХЗС 2001 онд, Биологи, газар зүйн факультеттай 2010 онд МУИС-ийн Биологи, биотехнологийн сургууль, 2014 онд ШУС, Эдийн засаг, менежментийн факультеттай 2013 онд МУИС-ийн ЭЗС сургууль тус тус хамтран ажиллах гэрээ байгуулан ажиллаж ирсэн. Үүнийг үндэслэн хоёр их сургууль хооронд багш, судлаач, оюутан, ажилтан, судалгааны мэдээлэл, сургалтын хөтөлбөрийн туршлага солилцох, хамтарсан судалгаа, танхимын болон цахим сургалт зохион байгуулах, оюутны дадлага хийх, ахисан түвшний оюутан харилцан суралцуулахаар бэлтгэх, ахисан түвшний оюутны судалгааны дадлага хийх, экологийн аялал жуулчлал, соёлын солилцооны чиглэлд хамтарч ажиллах гэрээ байгууллаа.
Германы Шпайрын төрийн удирдлагын их сургууль, ХБНГУ
2011 онд анх тус сургуультай МУИС-ийн Эдийн засгийн сургууль төрийн удирдлагын салбарт хамтран ажиллах гэрээ байгуулсан. Үүний дараа 2014 онд ОУХНУС тус гэрээг шинэчлэн байгуулж, хамтран ажиллаж ирсэн. Өмнөх хамтын ажиллагааны гэрээний хугацаа дууссан тул хоёр тал дүгнэн хэлэлцэж багш, судалгааны материал солилцох, хамтарсан сургалт, судалгаа хийх заалттай гэрээг их сургууль хооронд болгон өргөтгөж, шинэчлэн байгууллаа.
Чанвоны үндэсний их сургууль, БНСУ
2011 онд анх тус сургуультай хамтын ажиллагааны гэрээ байгуулан, үүний хүрээнд эрдмийн солилцоо, хамтарсан сургалт, судалгааны чиглэлд хамтарч ажиллаж ирсэн. 2019 оны 5 дугаар сарын 25-нд тус сургуулийн профессор Мин Гын Ги, БНСУ-ын парламентын гишүүн хатагтай Ким Ён Жутай хамт МУИС-д зочилсон. Энэ удаа хамтын ажиллагааг бэхжүүлж, улиралд хоёр хүртэлх оюутныг хөнгөлөлттэй нөхцөлөөр солилцооны хөтөлбөрт хамруулж суралцуулах оюутан солилцооны гэрээ шинээр байгууллаа.
ХАМТЫН АЖИЛЛАГААНЫ ХЭЛТЭС
