МУИС-ийн ШУС-ийн НУС-ын Социологи Нийгмийн Ажлын тэнхимээс “Нийгмийн ажил” хөтөлбөрөөр суралцаж байгаа оюутнуудын судалдаг “Хөгжлийн бэрхшээлтэй хүмүүстэй ажиллах нийгмийн ажил”, “Нийгмийн эрүүл мэнд” зэрэг мэргэжлийн хичээлүүд нь нийгмийн ажлын мэргэжилтэн бэлтгэхэд болон хөгжлийн бэрхшээлтэй иргэдийг ойлгох, тэдэнд туслах арга замыг боловсруулахад чиглэгддэг.
МУИС-ийн Оюутан, төгсөгчийн хэлтэс нь хөгжлийн бэрхшээлтэй суралцагчдыг бусад суралцагчдын нэгэн адил, тэгш хүртээмжтэй боловсролыг олгохын тулд гадаадын их сургуулиудын туршлагыг судлах зочин профессор урьж бодит байдалд дүн шинжилгээ хийх, мэргэжлийн ойлголтын талаар нөлөөллийн ажил хийх санаачилгыг гарган ажилласан. Гаргасан санаачилгыг дэмжин АНУ-ын Фулбрайтын тэтгэлгээр суралцагч, “Гэрэлт Цох” ТББ-ын тэргүүн Б.Оюунтөгс, МУИС-ийн Социологи, Нийгмийн Ажлын тэнхимийн ахлах багш Д. Оюунцэцэг нар хамтран АНУ-аас Хөгжлийн бэрхшээлтэй оюутны суралцахуйг дэмжихтэй холбоотой мэргэжилтэн урих ажлыг 2019 оноос эхлэн ярилцаж Нийл Дачак /Neil Duchac, DrPH, Ed.D, Ph.D / профессорыг сонгон урьж МУИС-тай хамтран ажиллах бодит үйл ажиллагааг эхлүүлээд байна.
Энэ удаагийн айлчлалын хүрээнд хамтын ажиллагааг хөгжүүлэх олон ажил зохиогдож байгаагийн нэг нь Зочин профессорын лекц байлаа. АНУ-ын Кенниси их сургуулийн профессор Нийл Дачак “Нийгмийн ажил ба эрүүл мэнд” хичээлд зочин багшаар оролцон АНУ-ын хүн амын эрүүл мэнд, хоол тэжээлийн тухай “АНУ-ын сургуулийн хоол хүнсний бодлого” сэдэвт лекцийг оюутнуудад толилууллаа.
Социологи, Нийгмийн Ажлын тэнхимийн ахлах багш Д. Оюунцэцэг лекцийг орчуулж, Монгол улсынхаа нөхцөл байдлыг тайлбарласан байна.
Лекцийн агуулгад цар тахлын үеийн АНУ-ын хүн амын хоол тэжээлийн байдлын дутагдалд нийт мужуудын өртөгдсөн байдал, Өмнөдийнхөн бараг өртөгдөөгүй шалтгаан нь өөрсдөө газар тариалан эрхэлдэгтэй холбоотой байсан тухай дурдаж, өнгөрсөн хоёр жилийн туршлагадаа тулгуурлан АНУ хүнс хангалтын бодлогодоо ч өөрчлөлт гаргахыг зорьж байгаагаа ярилаа.
ОЮУТАН, ТӨГСӨГЧИЙН ХЭЛТЭС
СОЦИОЛОГИ, НИЙГМИЙН АЖЛЫН ТЭНХИМ
