МУИС, Шинжлэх ухааны сургуулийн Биологийн тэнхим, Дэлхийн Байгаль Хамгаалах сангийн (WWF) Монгол дахь хөтөлбөрийн санаачилгаар “Дорнод Монголын хуурай хээрийн тогтвортой ландшафт, биологийн олон янз байдлын хамгаалал төсөл” (GEF7) дэмжлэгтэйгээр их дээд сургуулиудын Биологи, Экологи, Байгаль хамгааллын салбарт суралцаж буй оюутнуудын дунд “Судлаач оюутан – 2022” эрдэм шинжилгээний бага хурлыг 6 дахь жилдээ 2022 оны 12-р сарын 17-18-ны өдрүүдэд амжилттай зохион байгууллаа.
“Экологижсон соёл иргэншил: Дэлхий дээрх бүхий л амьд биетэд тэгш, хүртээмжтэй амьдрах ирээдүйг бий болгох нь” урианы дор МУИС, ХААИС, МУБИС, МУИС-ын Ховд салбар сургуулийн бакалавр, магистрын нийт 18 оюутан өөрсдийн судалгааны үр дүнг хэлэлцүүлэв.
Энэ хурал нь Экологи, Биологи, Байгаль хамгааллын чиглэлээр хээрийн судалгаа болон бусад холбогдох ажилд оролцсон оюутнуудын хүсэл эрмэлзлийг дэмжих, ирээдүйн хээрийн судлаач мэргэжилтнүүдийг бэлтгэх, оюутнуудын зуны хээрийн судалгааны үр дүнг хамтын хүртээл болгох эрхэм зорилготой юм. Хурлын үеэр “Миний дуранд буусан гэрэл зураг” фото зургийн уралдаан, “Миний судалгааны ажлын тэмдэглэл” нийтлэлийн уралдааныг уламжлал болгон 2 дахь удаагаа мөн зохион байгуулж шилдэг нийтлэл болон шилдэг гэрэл зургийг Амьтан, Ургамал, Байгалийн гэсэн 3 чиглэлээр тус тус шалгаруулав.
Судлаач оюутан 2022 хурлын хүрээнд судлаач оюутнуудын ур чадварыг дээшлүүлэхээр “Макро гэрэл зураг”-ийн сургалтыг ШУА-н Биологийн хүрээлэнтэй, “Монгол орны эрвээхэй”-н үзэсгэлэнг Байгалийн түүхийн музейтэй хамтран тус тус зохион байгууллаа.
Шилдэг эрдэм шинжилгээний илтгэлээр МУИС, Экологийн хөтөлбөрийн II түвшний оюутан С.Халиун, Биологийн хөтөлбөрийн IV түвшний оюутан Ж.Номундарь, Биологийн хөтөлбөрийн III түвшний оюутан С.Мөнх-Оргил, магистрын түвшний оюутан Н.Энхриймаа, шилдэг нийтлэлээр МУБИС-ийн Математик Байгалийн ухааны Сургуулийн Биологийн тэнхимийн магистрант Б.Жунайсүрэн, МУИС-н Ховд салбар сургуулийн Экологийн хөтөлбөрийн IV түвшний оюутан Д.Хангай, шилдэг гэрэл зургаар ХААИС-ийн магистрант Н.Жүгдэрнамжил, МУИС-ийн магистрант О.Булган, МУБИС-ийн бакалавр Г.Ганчимэг нар тус тус шалгарч бэлэг, дурсгалын зүйлээр шагнуулав.
Талархал
Хуралд оролцсон, гэрэл зургаа илгээсэн, нийтлэлээ тэрлэсэн нийт оюутан залууст мөн Экологи-Биологи-Байгаль хамгааллын чиглэлээр суралцаж буй хээрийн судлаач оюутнуудын судалгааны ажил, үр дүнг дэмжин хамтран зохион байгуулсан, оролцсон “Дорнод Монголын хуурай хээрийн тогтвортой ландшафт, биологийн олон янз байдлын хамгаалал төсөл”, WWF Монгол дахь хөтөлбөрийн газар, МУИС, МУБИС, ХААИС, МУИС-н Ховд дахь салбар сургууль болон ШУА-н Биологийн хүрээлэн, Байгалийн түүхийн музейн хамт олонд судлаач оюутнуудын өмнөөс чин сэтгэлийн үүднээс талархаж байгааг минь хүлээн авна уу. Та бүхний үйлс улам бүр дэлгэрэн оршихын өлзий ерөөлийг хүргэе.
“Судлаач оюутан 2022” эрдэм шинжилгээний бага хуралд оролцогсод, 2022 оны 12-р сарын 17, Улаанбаатар
Эздээ хүлээсэн бэлэг, “Судлаач оюутан 2022” хурлын шагналын сан
“Монгол орны эрвээхэй” үзэсгэлэн зургаас
“Миний дуранд буусан гэрэл зураг” үзэсгэлэн
