МУИС-ийн Шинжлэх ухааны сургуулийн Биологийн тэнхимийн Микробиологийн дэд хөтөлбөрөөс жил бүр уламжлал болгон зохион байгуулдаг “Бичил ертөнцийн нууцыг нээгч” оюутны танин мэдэхүйн 18 дахь удаагийн тэмцээн 2023 оны 12 дугаар сарын 06-ны өдөр болов. Энэ удаагийн тэмцээнд төрийн болон хувийн зургаан их, дээд сургуулийн 1-3 дугаар түвшний оюутнууд оролцож, мэдлэг чадвараа сорилоо.
Энэхүү тэмцээн нь бакалаврын түвшний оюутнуудын онолын мэдлэгийг бататган практиктай холбох, тэдний бүтээлч үйл ажиллагааг дэмжих, чөлөөт сэтгэлгээг хөгжүүлэх болон микробиологийн мэргэжлийг сурталчилах, ач холбогдлыг нийтэд таниулахад оршино.
Тэмцээний ерөнхий ивээн тэтгэгчээр МУИС-ийн ШУС-ийн БУС, “Сүү” ХК, “МонХимо ШУҮ”–ийн ХХК, “Айвико” ХХК, “Синапс” ХХК хамтран ажиллав. Тэмцээнд “МонХимо ШУҮ”–ийн ХХК-ний захирал М.Ариунаа, “Синапс ХХК”–ийн захирал Д.Нарангэрэл, “Сүү” ХК болон “Айвико” ХХК-ийн төлөөлөгчид хүрэлцэн ирсэн юм.
Тэмцээнийг нээж БУС-ийн Биологийн тэнхимийн эрхлэгч Проф. доктор Л.Ариунцэцэг мэндчилгээ дэвшүүлж, үг хэлэв. Тэрбээр, МУИС нь микробиологич, мэргэжлээр 1983 оноос хойш мэргэжилтэн бэлтгэж байгаа бөгөөд өдрөөс өдөрт тус мэргэжлийн эрэлт хэрэгцээ өсөж байгааг онцоллоо. Тухайлбал, хүнс, хөдөө аж ахуй, хүрээлэн буй орчин, анагаах ухаан гэх мэт микробиологийн шинжлэх ухааны мэдлэг шаардлагатай салбар тун олон юм. Гэвч сүүлийн жилүүдэд микробиологич мэргэжлийг сонгох оюутны тоо цөөрсөн. Биологийн тэнхимээс Микробиологийн хөтөлбөрийг магадлан итгэмжлүүлсэн бөгөөд микробиологич мэргэжлээр бие даасан хөтөлбөрийг ирэх оны есдүгээр сараас хэрэгжүүлэхээр төлөвлөж байна гэлээ.
Биологийн тэнхимийн Микробиологийн дэд хөтөлбөрийн зөвлөх дэд проф. Д.Түмэнжаргал хэлэхдээ, “Бичил ертөнцийн нууцыг нээгч” тэмцээнийг анх 2005 оноос эхлэн зохион байгуулж ирсэн. Микробиологийн дэд хөтөлбөрөөс энэхүү тэмцээнийг оюутны бүтээлч үйл ажиллагааг дэмжих, тэдний сурах хүсэл эрмэлзлийг өдөөх цаашлаад микробиологийн салбар шинжлэх ухаанд ажиллах мэргэжилтнийг бэлтгэхэд түлхэц үзүүлэх зорилгоор санаачилсан. Тэмцээн маань МУИС–ийн биологийн мэргэжлээр сурдаг оюутны дунд зохион байгуулагдаж байсан бол улмаар МУИС, АШУҮИС, ШУТИС, ХААИС–ийн оюутнууд оролцдог болж хүрээгээ тэлсээр энэ жил зургаан төрийн болон хувийн хэвшлийн их дээд сургуулийн оюутан залуус оролцож байгаа нь улсын чанартай болж өргөжиж байна. Тухайлбал, МУИС, АШУҮИС, ШУТИС-иас тус бүр хоёр баг, ХААИС, Этүгэн их сургууль, Монгол Коосэн сургуулиас баг оролцсон. Нийт зургаан их дээд сургуулийн есөн багийн 45 оюутан оролцсон ба ганцаарчилсан төрлөөр 40 гаруй оюутан мэдлэг чадвараа сорилоо” хэмээв.
Багийн төрөлд:
Ганцаарчилсан төрөлд:
Тэмцээний үеэр “СҮҮ” ХК-иас тус компанийн үйлдвэрт цалинтай дадлага хийх урилгыг ШУТИС-ийн гурав, МУИС-ийн нэг оюутанд гардуулав.
Мөн “СҮҮ” ХК-иас их сургуулиа төгсөөд ажиллах эрхээр ШУТИС-ийн нэг оюутныг шагнав.
