МУИС-ийн бүтцийн өөрчлөлтийн хүрээнд сүүлийн саруудад дуулиантай үйл явдлууд ихээр гарах боллоо. Оюутны эрх, ашиг сонирхолыг хамгаалдаг төв байгууллага МУИС-ийн Оюутны холбоо, Оюутан Конгрессын тэргүүн, МУИС-ийн Удирдах зөвлөлийн гишүүн Д.Энхтөрөөс тодруулга авлаа.
- Бүтцийн өөрчлөлт хийх шийдвэр гараад 6 сарын хугацаа өнгөрлөө. Оюутанд ээлтэй шийдвэр гарсан уу? Хэрхэн үнэлж байна вэ?
МУИС-ийн Удирдах зөвлөлийн 2013 оны 12 дугаар сарын 16-ны өдрийн 05 тоот тогтоолоор бүрэлдэхүүний 14 сургуулийг өөрчлөн байгуулж, 5 нэгж болгосноор хөтөлбөр, зохион байгуулалт, хичээлийн байрууд зэрэг түүнийг дагасан өөрчлөлтийн олон ажил хийгдэж эхэлсэн. Бүтцийн өөрчлөлт хийхээс өмнө оюутнуудаас судалгаа явуулж, дийлэнхи хувь дэмжсэн тул МУИСОХ, Оюутан Конгресс оюутны саналыг хүндэтгэн, дэмжиж оролцсон. Түүнийгээ хэвлэлийн хуралд тодорхой мэдээлж байсан. Өдгөө 6 сарын хугацаанд сургуулийн захиргаатай хамтран ажиллах гэрээ байгуулах, оюутны асуудлыг уламжлан шийдвэрлүүлэхээр ажиллаж байна. Одоохондоо “Бүтцийн өөрчлөлт”-г үнэлж, дүгнэхэд эрт байна.
- Саяхан оюутнууд жагсаж, суулт хийсэн талаар мэдсэн байх? Оюутнууд ямар асуудал дэвшүүлэв? Оюутны төлөөллийн байгууллагын хувьд ямар байр суурьтай байна вэ?
Нэгж оюутнууд өөрсдийн эрхийг хамгаалахаар эвлэлдэн нэгдэх, үзэл бодлоо илэрхийлэх, тэмцэх эрх нь Үндсэн хуулиар нээлттэй. Нэр бүхий 3 оюутан эрхээ хамгаалуулахаар хүсэлтээ ирүүлсэн. Бид МУИСОХ, Оюутан Конгрессын ээлжит бус хурлаар хэлэлцэж, МУИС-ийн захиргаатай холбоотой асуудлыг ялган авч, захиргаанд уламжилсан. Түүний дагуу ажлын хэсэг байгуулж, тодорхой асуудлыг шийдвэрлэн, зарим асуудалд хүлээлт үүссэн байгаа. Төрийн байгууллага асуудлыг шийдвэрлэж, хуулийн хугацаандаа багтаж хариулт өгөх байх. Оюутнуудын дэвшүүлсэн зарим асуудал чиг үүргийн хувьд Удирдах зөвлөлийн эрх мэдлийн асуудал байсан тул түүнийг удирдах зөвлөлд танилцуулахаар тогтсон.
- Жагсаалд хичнээн оюутан оролцсон бэ? МУИСОХ, Оюутан Конгресс түүнд нэгдсэн үү?
Жагсаалд хичнээн оюутан оролцсон талаар Хуулийн байгууллагаас тодруулах нь зүйтэй. Бид Ээлжит бус хурал зарлаад МУИС-ийн захиргаанд уламжилсан албан тоотын хариу шийдвэрийг гартал албан ёсоор оролцохгүй гэж үзсэн. Хувь оюутныхаа хувьд оролцох эрх нь мэдээж нээлттэй байсан.
- Жагсаалын хажуугаар шилжиж орсон оюутнуудаас төлбөр авсан талаар ШӨХТГ-аас мэдээлсэн. Энэ асуудалд ямар байр суурьтай байна вэ?
МУИС-д элсэн орсон тушаал гарснаар Оюутны холбооны гишүүн болж, бид тэдний эрхийг хамгаалах үүрэг хүлээдэг. 1998 оноос хүчин төгөлдөр мөрдөгдөж байсан. “Оюутан шилжүүлэн суралцуулах журам”-г шилжин орох оюутан хүлээн зөвшөөрч, элсэн орсон болов уу? Энэ журам хуулийн холбогдох заалтууд зөрчсөн талаар ШӨХТГ-аас хэвлэлийн хуралд мэдэгдсэн. Үнэхээр хуулийн заалт зөрсөн бол түүнийг өөрчлөх шаардлагатай. Гэхдээ энэ процесс нь МУИС-ийн Бүтцийн өөрчлөлттэй огтхон ч холбоогүй зүйл. 10 жилийн өмнө хяналтын байгууллагууд байсан л байх.
- Бүтцийн өөрчлөлтийн хүрээнд оюутны сонголтын нэмэгдүүлэх, сурах орчин сайжруулах, хүртээмжийг бий болгох зэрэг амлалтууд байгаа байх? Түүний хэрэгжилт хангалттай байна уу?
“Бүтцийн өөрчлөлт”-г хийхэд хугацаа нилээн орно. Анги танхим нэмэгдэх, хөтөлбөрийн давхцал арилах, суралцагчдын сонголтыг нэмэгдүүлэх зэрэг бидэнд үл анзаарагдах ажлууд хийгдэж л байна. Гэхдээ том өөрчлөлт, шинэчлэлтийн ажилд хугацаа хэрэгтэй. Оюутнууд бид бүх шатны ажлын хэсэг, хороо, удирдах зөвлөлд эрхээ хамгаалахаар орон ажиллаж байна. Эерэг үр дүн гарахад хугацаа, эв нэгдэл чухал гэж бодож байна.
- Хичээлийн жилийн хаалт болж байна. МУИС маань Эрдмийн баяраа хэрхэн тэмдэглэх гэж байна?
Чингис хааны талбайд “Оюутны парад”-ыг зохион байгуулахаар Сургуулийн захиргаанаас шийдвэрлээд, зохион байгуулалтын ажилдаа ороод байна. Парад нь Монголдоо анхдагч, ёслол төгөлдөр ажиллагаа болно гэдэгт итгэлтэй байна.
Бүх төгсөгчдөдөө ажил амьдарлын дээдийг хүсэн ерөөе.
МУИСОХ-ГХХМА
