“Дээд боловсролын шинэчлэл” төслийн хүрээнд байгуулагдсан Зөвлөх үйлчилгээний баг их, дээд сургуулийн удирдлага, санхүүжилт, магадлан итгэмжлэл гэсэн гурван чиглэлд төрийн өмчийн болоод хувийн хэвшлийн тус бүр 2 сургууль сонгон авч ажиллахөөр болсны нэгээр МУИС тодорчээ. Зөвлөх үйлчилгээний баг бүрэлдэхүүн өчигдөр уг хамтын ажиллагаагаа эхлүүлэхээр МУИС дээр хүрэлцэн ирж удирдлагуудтай уулзлаа.
СЭЗДС-ийн дэд захирал, Дээд боловсролын шинэчлэлийн зөвлөх үйлчилгээний төслийн үндэсний зөвлөхДоктор (Ph.D), профессор Ж.Сүхбаатар уулзалтын эхэнд Зөвлөх үйлчилгээнийхээ үндсэн чиг, зорилгыг танилцуулж, хамтран ажиллах хүсэлтээ уламжилсан байна.
МУИС-ийн зүгээс захирал Р.Бат-Эрдэнэ, Сургалт эрхэлсэн дэд захирал О.Мөнхбат, Сургалтын нэгдсэн албаны дарга Ч.Ундрам болон Бүрэлдэхүүн сургуулиудын захирал, тэнхимийн эрхлэгчид гэсэн өргөн бүрэлдэхүүн уулзаж тэдний саналыг тааламжтайгаар хүлээн авч буйгаа илэрхийлсэн юм.
МУИС-ийн захирал Р.Бат-Эрдэнэ хэлэхдээ “МУИС-д шинэчлэл хийгдээд жил гаран хугацааг ардаа орхижоо. Өнөөдрийг хүртэл бүтэц бүрэлдэхүүн, бүх түвшний хөтөлбөрүүдээ шинэчлэх, МУИС-ийн эрх зүйн актууд, нийтлэг дүрэм журмуудаа шинэчлэн батлах, эрдэм шинжилгээ, инновацийг дэмжсэн бодлогыг хэрэгжүүлж эхэлсэн олон ажлууд хийгджээ. Энэ явцад засаж залруулах, сайжруулах шаардлага тулгарч хөндлөнгийн үнэлгээ хийлгэх хэрэгцээ гарсан. Та бүхний санал бидний зайлшгүй хэрэгцээтэй нэгдэж чанартай үр дүн гарна гэдэгт итгэж байна”
гэлээ.
Хамтын ажиллагаа 18 сарын хугацаанд үргэлжлэх бөгөөд үүний хүрээнд
-МУИС-ийн хөтөлбөрүүдээ сайжруулах
-Удирдлага зохион байгуулалтын механизмийг тодорхой болгох
-МУИС-ийн хичээлийн 2 хөтөлбөрийг ОУ-ын магадлан итгэмжлэлд оруулах бэлтгэл ажил гэсэн үндсэн 3 том ажил хийгдэх ажээ.
Их сургуулиас томилсон ажлын хэсэг дээрх чиглэлээр төсөл, хөтөлбөр боловсруулж, үндэсний болоод ОУ-ын зөвлөхүүдтэй нягт холбоотой ажиллах бөгөөд хөрөнгийг Дээд боловсролын шинэчлэл төслөөс гаргуулж ажил хэрэг болгох юм.
Нэмж дуулгахад Дээд боловсролын шинэчлэлийн төслийн хугацаа дуусахад 3 сар үлдэж буй бөгөөд үүнээс урьтаж хэд хэдэн чиглэлээр үр ашиг хүртэх өөр боломж бий аж. Багш нарын мэргэжил дээшлүүлэх, Судалгаа шинжилгээний ажилд грант олгох, дээд боловсролын сургалтын чанарыг сайжруулах гэсэн 3 чиглэлээр төсөл хөтөлбөр боловсруулж өрсөлдөөн дундаас шалгарвал тавдугаар сардаа багтаан санхүүжилтээ авах боломжтой юм байна.
