2022 оны 11 дүгээр сарын 5-наас 19-нд ШУС-ийн Антропологи, Археологийн тэнхимийн эрхлэгч, профессор У.Эрдэнэбат багшийн ахалсан МУИС-ийн 10 оюутан хоёр их сургуулийн хооронд байгуулсан эрдэм шинжилгээний талаар хамтран ажиллах гэрээ, оюутан солилцооны хүрээнд ХБНГУ-ын Дрездений Техник, эдийн засгийн дээд сургуульд (Hochschule fuer Technik und Wirtschaften / Dresden University of Applied Sciences) 14 хоногийн хугацаагаар зочилж хамтарсан дадлага сургалт хийгээд ирлээ.
МУИС-ийн багш оюутнуудыг Дрездений Техник, эдийн засгийн дээд сургуулийн ректор, профессор Катрин Зальхерт, Геомэдээллийн факультетийн декан, профессор Штефан Копф нар хүлээн авч уулзсан. Хоёр их сургуулийн багш оюутнууд хамтран “Workshop Computational Archaeology in Germany and Mongolia” сургалтыг амжилттай зохион байгуулсан бөгөөд МУИС-ийн ШУС-ийн Археологи хөтөлбөрийн оюутан Т.Ганцэцэг, Д.Мөнгөнцэцэг, Ц.Пүрэвдорж, Б.Дамдинжав, П.Сумъяабазар, ХШУИС-ийн Информатик, мэдээллийн технологийн оюутан Б.Мөнх-Оргил, Б.Батзориг, Г.Онон, П.Ганчимэг, З.Төгсжаргал нар оюутан хамрагдсан болно.
Монгол оюутнууд Дрeздeний Тeхник, Эдийн засгийн дээд сургуулийн зарим лабораторийн үйл ажиллагаатай танилцаж, профессор Мартин Очыпка, доктор Хендрик Роланд нарын удирдсан, хэрэглээний компьютер, инфоматикийн шинжлэх ухааны аргуудыг археологийн судалгаанд ашиглах “Алсын зайн тандалт / Remote Sensing / LiDAR” сэдэвт лекц, практик сургалтад суулаа.
Дрездений Техник, эдийн засгийн дээд сургууль нь 1950-иад онд үндэс сууриа тавьсан Төмөр замын дээд сургуулийн суурин дээр 1992 онд орчин үеийн Техник технологи, эдийн засгийн шинжлэх ухаан, инженерчлэлийн сургууль болгон өргөтгөн зохион байгуулагдсан, энэ онд сургуулийнхаа 30 жилийн ойг тэмдэглэж байгаа юм (https://www.htw-dresden.de/). Тус их сургууль нь Барилгын инженерчлэл, Дизайн, Электротехник, Геомэдээлэл, Информатик/Математик, Газар эдэлбэр/Хүрээлэн буй орчин/Хими, Машин үйлдвэрлэл, Эдийн засгийн шинжлэх ухаан гэсэн 8 факультеттай, 43 мэргэжлийн хөтөлбөрт 4800 оюутан суралцдаг. Дэлхийн 150 гаруй их сургууль, эрдэм шинжилгээний байгууллагатай хамтран ажилладгийн нэг нь Монгол Улсын Их Сургууль болно.
Германы Эрдмийн Солилцооны Алба (DAAD) ивээн тэтгэсэн энэхүү оюутан солилцооны хөтөлбөрийн хүрээнд МУИС-ийн багш оюутнууд 2022 оны 11 дүгээр сарын 10-12–нд Австрийн Вена хотод зохион байгуулагдсан “Соёлын өв ба шинэ технологи” (Conference on Cultural Heritage and New Technologies: Cultural Heritage –NextGen. Innovative Approaches in Documentation, Research, Management and Education) олон улсын эрдэм шинжилгээний 27 дахь удаагийн хуралд оролцсон нь мэргэжил нэгт нөхөдтэйгөө танилцаж, шинэ хэлхээ холбоо тогтоох, эрдэм шинжилгээ, сургалт судалгааны сүүлийн үеийн арга технологи, үр дүнтэй танилцах ихээхэн өгөөжтэй болов (https://chnt.at/). Уг хурлыг Австрийн ICOMOS байгууллагаас нийслэл Вена хотдоо жил бүр уламжлал болгон зохион байгуулдаг бөгөөд “Соёлын өв – Дараагийн үеийнхэн. Баримтжуулалт, судалгаа, менежмент, боловсролын салбар дахь шинэлэг хандлага” сэдэвт энэ удаагийн хуралд дэлхийн олон улс орны 400 шахам төлөөлөгчид биеэр болон цахимаар оролцож илтгэл хэлэлцүүллээ.
МУИС-ийн оюутнууд Дрезден, Вена хотын түүх соёлын дурсгалт газрууд, музейгээр зочилж мэргэжил нэгт оюутан суралцагчидтайгаа ойр дотно танилцаж нөхөрлөв. ХБНГУ-д зохиогдсон энэхүү дадлага сургалт нь манай хоёр сургуулийн хамтын ажиллагааг шинэ шатанд гаргаж бэхжүүлсэн төдийгүй, ахисан түвшинд санал болгож байгаа хоёр их сургуулийн хамтарсан салбар дундын “Археоинформатик” магистрын хөтөлбөрт Монголын оюутнууд суралцах сайхан боломжийг нээж өгч байна.
