“МОНГОЛЫН ГАДААД ХЭЛНИЙ СУРГАЛТ СУДАЛГААНЫ ӨНӨӨГИЙН БАЙДАЛ, ЦААШДЫН ЧИГ ХАНДЛАГА” СЭДЭВТ ЭШХ БОЛЛОО

МУИС-ийн ГХСС-ийн Боловсрол судлал-Гадаад хэл заах аргын профессорын багаас зохион байгуулсан “Монголын гадаад хэлний сургалт судалгааны өнөөгийн байдал, цаашдын чиг хандлага” сэдэвт эрдэм шинжилгээний хурал 2013 оны 5-р сарын 31-ний өдөр МУИС-ийн хичээлийн 1-р байрны Дугуй танхимд боллоо.

Тус  хуралд МУИС-ийн ГХСС, МХСС, НШУС, ХХИС, МУИС-ийн Орхон сургууль, МУБИС, ШУТИС, ЭМШУИС, ХААИС, СУИС, Хүмүүнлэгийн ухааны их сургууль, Улаанбаатар их сургууль, Отгонтэнгэр их сургууль, Сантис сургалтын төв зэрэг Монголын төрийн болон төрийн бус өмчийн их, дээд сургуулийн гадаад хэлний сургалт эрхэлдэг байгууллагаас гадна Боловсролын магадлан итгэмжлэх үндэсний зөвлөл, Боловсролын хүрээлэнгийн мэргэжилтэнгүүд оролцсон юм.

Монголын дээд боловсролын гадаад хэлний мэргэжилтэн багш нар нэг дор хуран чуулж, их, дээд сургуулийн хэлний болон хэлний бус мэргэжлийн гадаад хэлний сургалтын хөтөлбөр, стандарт, хөтөлбөрийн агуулга, багц цаг, үнэлгээ болон гадаад хэлний салбарт тулгамдаж буй асуудал, цаашдын чиг хандлагын талаар илтгэл хэлэлцүүлж санал бодлоо солилцсон энэхүү эрдэм шинжилгээний бага хурал амжилттай болж өндөрлөлөө.