“Орчин үеийн физик” сэдэвт олон улсын эрдэм шинжилгээний хурал Улаанбаатар хотод 4 өдрийн турш амжилттай болж өнгөрлөө. Гурван жил тутамд уламжлал болгон зохион байгуулж буй энэхүү хурлыг Цөмийн энергийн газар, МУИС, ШУА болон Дубна хот дахь Цөмийн шинжилгээний нэгдсэн институт (ЦШНИ) хамтран зохион байгуулдаг юм. Энэ жил тав дахь удаагаа болж байгаа бөгөөд манай улсын нэрт эрдэмтэн академич Н. Содномын мэндэлсний 90 жилийн ойд зориулж байгаагаараа онцлогтой юм.
Манай улсын нэрт эрдэмтэн, нийгмийн зүтгэлтэн академич Н. Содномын мэндэлсний 90 жилийн ойд зориулсан ШУА-ийн физик, хими, математикийн салбарын Бага чуулганы Хүндэтгэлийн хуралдаан 2013 оны 5-р сарын 24- нд МУИС-ийн Эрдмийн их танхимд хуралдаж, ШУА-ийн ФТХ-ийн захирал, академич Б.Чадраа “Академич Н. Содном ба шинжлэх ухаан, дээд боловсрол” гэсэн илтгэл тавив.
Хүндэтгэлийн энэ арга хэмжээнд ШУА, МУИС, ШУТИС-ийн эрдэмтэд, академич Н. Содномын үр хүүхдүүд, төрөл төрөгсөд, оюутнууд оролцлоо. Хуралдаанд УИХ-ын гишүүн Р. Амаржаргал, МУИС-ийн дэд захирал профессор Ч. Ганзориг, академич Н. Намсрай, Ц. Баатар, профессор Р. Санжаасүрэн, Г. Шилагарди, Б. Бурмаа, Д. Нямаа, С. Бүдням, П.Зузаан, С. Даваа, Ц. Дамдинсүрэн зэрэг олон хүн академич Н. Содномын тухай дурсан үг хэлэв.
Академич Н. Содномын том хүү Монгол улсаас Кувейт улсад суугаа Бүрэн эрхт элчин сайд академич С. Энхбат on-line интернэтээр алс холоос мэндчилгээ дэвшүүлж, БШУЯ, ШУА, МУИС, ШУТИС-ийн хамт олонд талархал дэвшүүлж, бага хүү Эдийн засгийн хөгжлийн яамны газрын дарга доктор С. Бэхбат нар өөрсдийн бага нас болон эцэг, эх, гэр бүлийнхээ талаар сонирхолтой үйл явдлаас ярьсан юм. ШУА-ийн Ерөнхийлөгч, академич Б. Энхтүвшин академич Н. Содномын ШУА-ийн Ерөнхийлөгчөөр ажиллах хугацаанд түүний хийж санаачилсан ажлын талаар дэлгэрэнгүй яриад академич Н. Содномын мэндэлсний 90 жилийн ойг тэмдэглэн өнгөрүүлэх ойн үеэр зохиох ажлын талаар мэдээлэл хийлээ.
Мөн хурлын үеэр залуу судлаачдын сүүлийн үед хийсэн ажлын үр дүнгүүдийг ханын илтгэл хэлбэрээр гаргасан байлаа.
Академич Н.Сономын намтар
