Монгол цэргийн 2000 гаруй жилийн түүхэн уламжлал, залгамж чанарыг үндэслэн жил бүрийн гуравдугаар сарын 18-ны өдрийг “Монгол цэргийн өдөр” болгон тэмдэглэдэг болсон билээ. Монгол Улсын Ерөнхийлөгчийн зарлигаар хэрэгжүүлж буй “Оюутан цэрэг” хөтөлбөрийн хүрээнд МУИС-ийн эр зоригийн түүчээ болсон 35 оюутан сайн дураараа хугацаат цэргийн алба хааж байна. Тэдний хэдэн нөхөд өнөөдрийн тэмдэглэлт баярын өдрөөрөө алба хашиж явсан үеэ дурсан, жагсаалын хэсгээс үеийнхэндээ сонирхуулахаар дүрэмт хувцсаа зэхэн их сургуульдаа хүрэлцэн иржээ.
МУИС-ийн Сургалтын нэгдсэн албанаас 2015-2016 оны хичээлийн жилийн “Цэрэг хөтөлбөр”-ийн бүртгэл эхэлсэнтэй холбогдуулан, хөтөлбөрийн танилцуулга, мэдээллийг хүргэхээр энэхүү өдөрлөгийг Оюутны байгууллагын оролцоотойгоор МУИС-ийн хичээлийн II байранд зохион явуулсан юм. 
Өдөрлөгийг цэргийн алба хаах сонирхолтой хөвгүүд зорин ирж, уг хөтөлбөр нь халуун цэг дээрээ ямар байдалтай, хэрхэн хэрэгждэг болох, цэргийн алба хашаад ирсний дараах болон өмнөх үеийн өөрчлөлт, нөлөөллийн талаар бодол сэтгэгдлээ хуваалцахыг хүсч буй нь мэдрэгдэж байлаа. Түүнчлэн бүртгэлийн үе шатуудаас гадна алба хаах явцад анхаарах зүйлс юу байдгийг хал цэргүүдээс сонсон, зөвлөгөө авахад багагүй хугацаа зориулсан.
Өдөрлөг үүгээр өндөрлөсөнгүй, цугласан оюутнуудаас хэн хамгийн бяртай, хэн хамгийн сайн эмэгтэйлэг хоолойгоор дуугардаг болохыг тодруулж, инээд хөөр бэлэглээд амжжээ.
Монгол Улсын Үндсэн Хуулиар хүлээсэн “Эх орноо хамгаалах, хуулийн дагуу цэргийн алба хаах” үүрэг биелэлт хангалтгүйгээс Зэвсэгт хүчний дайчилгааны бэлтгэл, нөөцийн бүрэлдэхүүний хомсолд орж улс орны батлан хамгаалах чадавхийг сулруулаад зогсохгүй, залуусын эх оронч хүмүүжил, төлөвшил, эрүүл мэнд бие бялдрын хөгжилд сөргөөр нөлөөлөх, цаашлаад Төрийн албаны тухай хуулийн дагуу төрийн жинхэнэ албанд ажиллах нөхцөлийг хязгаарлаж буй явдлуудыг бодлогоор зохицуулах үүднээс, 2013 онд ийн зарлигдсан нь учиртай. Их, дээд сургуулиуд уг тогтоолтой уялдуулж, “Цэргийн өмнөх бэлтгэл” хичээлийг (2 кредит 96 цаг), мөн өндөр шаардлагуудад тэнцсэн, цэргийн алба хаах сонирхолтой оюутнуудыг тусгай бэлтгэл сургалтад (12 кредит, 560 цаг) хамруулснаар цэргийн алба хаасанд тооцох гэсэн заалтууд бүхий журамтай болох үүргийг хүлээв.
Цэргийн насанд хүрч байгаа (18) нийт залуусын 30 хувь нь л хугацаат цэргийн албанд татагдах боломжтой агаад зориг гарган, шийдэмгий үйлдэл хийснээр оюутан та эрүүл бие бялдар цогцлоон, тэсвэр хатуужил сууж, төрийн албанд ажиллах нөхцөлөө бүрдүүлж байгаагаас гадна, бидний оршин буй цэнхэр бөмбөрцөг дээр тайван, амгалан тогтнох эх орныхоо дархлааг чангалан бэхжүүлэхэд хүч нэмж буй явдал юм.
Өдөрлөгийн зохион байгуулсан сургалтын албаны мэргэжилтнүүд, Оюутны холбооны идэвхтэй гишүүд болон зочноор оролцсон оюутан цэргүүддээ талархлаа. Дашрамд дуулгахад, МУИС-ийн Захиргаа Оюутны холбоотойгоо харилцан хариуцлага хүлээлцэх зарчмаар хамтран ажиллах гэрээ байгуулснаар, оюутнуудад зориулсан олон арга хэмжээний зохион байгуулалтыг төлөөллийнх нь байгууллагаар гүйцэтгүүлэх болсон. ОХ-ны идэвхтэй гишүүд бүхий л арга хэмжээн дээр Сургалтын нэгдсэн албаны Оюутанд үйлчлэх төвтэйгөө нягт уялдаатай ажилладаг юм.
