Монгол Улс, Бүгд Найрамдах Чех улс (БНЧУ)-ын хооронд дипломат харилцаа тогтоосны 65 жилийн ойг тохиолдуулан БНЧУ-аас Монгол Улсад суугаа Элчин сайдын яам, Монгол Улсын Их сургуулийн ШУС-ийн ХУС-ын Европ судлалын тэнхим хамтран МУИС-ийн нийт оюутны дунд “Чех судлал ба БНЧУ-д суралцах боломж” өдөрлөгийг 2015 оны 3 дугаар сар 20-ны өдөр 12.30. цагт МУИС-ийн Хичээлийн I байрны Эрдмийн Дугуй танхимд зохион байгууллаа. 
Өдөрлөгт БНЧУ-аас Монгол Улсад суугаа онц бөгөөд бүрэн эрхт элчин сайд хатагтай Ивана Гроллова, Монгол Улсын Их хурлын гишүүн С.Оюун, Монгол Улсын Онц бөгөөд бүрэн эрхт элчин сайд П. Нямаа МУИС-ийн ректор д-р, проф. Р. Бат-эрдэнэ, ШУС-ийн ХУС-ын захирал д-р, проф. Д.Сайнбилэгт, МУИС-ийн Гадаад харилцаа, хамтын ажиллагааны хэлтэс, ХУС-ын Европ судлалын тэнхимийн багш нар, чех судлалын төгсөгчдийн төлөөлөл, МУИС-ийн 200 орчим оюутан хүрэлцэн иржээ. 
МУИС-ийн ректор д-р Р.Бат-эрдэнэ болон ШУС-ийн ХУС-ын захирал д-р, проф. Д.Сайнбилэгт нар хүрэлцэн ирсэн хүндэт зочдод талархал илэрхийлж, оюутнуудад хандан МУИС-д чех хэл соёлыг 1.Мэргэжил болгон судлах 2.Давхар мэргэжил болгон судлах 3.Хавсарга мэргэжил болгон судлах 4.Хоёрдогч гадаад хэл болгон судлах гэсэн боломж буй талаар сонордуулсан юм.
БНЧУ-аас Монгол Улсад суугаа онц бөгөөд бүрэн эрхт элчин сайд хатагтай Ивана Гроллова БНЧУ-д анагаах ухаан, хүнсний технологи, техник технологи, машины үйлдвэрлэл, гидрогеологи, эрчим хүчний инженерчлэл, эдийн засаг, уул уурхай, хими, нефть-хими, програм хангамж, дизайн, ХАА, нанотехнологи, аялал жуулчлал, орчуулагч, хэлмэрчлэхүй гэх мэт бүх салбараар мэргэжил эзэмших үүд хаалга нээлттэй. Хамгийн чухал нь БНЧУ-ын их сургуулиудад чех хэл дээр бүх төрлийн мэргэжлээр суралцахад үнэ төлбөргүй, мөн дээр нь Чехэд сургууль төгссөн хүн бүр Европын холбооны дипломтой төгсдөг гэдгийг оюутнуудад дуулгалаа. Монгол Улсын Их хурлын гишүүн С.Оюун, Онц бөгөөд бүрэн эрхт элчин сайд П. Нямаа нар БНЧУ-д хэрхэн мэргэжил эзэмшсэн тухайгаа ярьж, чех хэлийг сонгон суралцсанаар ямар боломж буй талаар зөвлөж, оюутнуудтай санал солилцлоо. Өдөрлөгийн төгсгөлд ЭСЯ-наас оюутнуудад танилцуулга, CD тараав. 
Өдөрлөгийг амжилттай зохион байгуулсан БНЧУ-ын ЭСЯ, МУИС-ийн удирдлага, Гадаад харилцаа, хамтын ажиллагааны хэлтэс, ШУС-ын ХУС-ын удирдлага, Европ судлалын тэнхимийн хамт олонд талархал илэрхийлье.
