Ажиа Гэгээний нэрэмжит “зөв” тэтгэлгийн сан нь сурах хүсэл эрмэлзэлтэй, авьяас чадвартай боловч санхүүгийн бололцоо дутмаг оюутан залууст их, дээд сургуульд сурахад нь дэмжиж тэтгэлэг олгох зорилгоор МУИС-тай хамтран ажиллах гэрээ байгууллаа. Гэрээ байгуулах ёслолд Сургалт,оюутан хариуцсан дэд захирал Д.Бадмаанямбуу, Оюутан, төгсөгчийн хэлтсийн дарга М.Эрдэнэчимэг, Ажиа Гэгээний “Зөв” тэтгэлэг сангийн зохицуулагч О.Саранчулуун нар оролцов.
Ажиа Гэгээн Төвдийн Хөх нуур аймгаас гаралтай Америкийн Нэгдсэн Улсын Индиана мужийн Монгол-Төвдийн Буддист соёлын төв хийдийн хамба лам бөгөөд 2006 оноос Монголын хүн ам, тэр дундаа хүүхдүүдэд зориулсан буян номын үйл хэргийг эхлүүлсэн. Ажиа Гэгээний Монголын хүн амд туслах дараагийн чиглэл нь, Монголын соёл, өв уламжлалыг хадгалан үлдээх явдал бөгөөд үүний хүрээнд түүний нэрэмжит “Зөв” тэтгэлэгт хөтөлбөрийг 2019 оноос хэрэгжүүлэн олон хүүхэд, залууст тэтгэлэг олгож иржээ.
2021-2022 оны хичээлийн жилээс эхлэн Ажиа Гэгээний нэрэмжит “Зөв” тэтгэлгийн сан ТББ-тай хамтран энэхүү тэтгэлэг олгох үйл ажиллагааг зохион байгуулж суралцагчдад сургалтын төлбөрийн бүрэн тэтгэлгийг олгож эхлэх юм.
Сургалт, оюутан хариуцсан дэд захирал Д.Бадмаанямбуу хэлэхдээ: Өнөөдөр манай МУИС-д түүхэн тэмдэглэлт өдөр болж байна. Ажиа гэгээнийг Монголчууд сайн мэддэг гэж би боддог. Хэдийгээр АНУ-д амьдарч байгаач гэсэн Монгол улстай маш нягт холбоотой, Монголчуудад элэгтэй, Монголын төлөө гэсэн сэтгэлтэй, Монголчуудад зориулан олон сайхан ажил хийснийг бид мэднэ. Тухайлбал: Монголын оюутан залууст зориулан өөрийнхөө нэрэмжит “Зөв” тэтгэлэгийг 2019 оноос эхлэн хэрэгжүүлж олон оюутан залуус хамрагдсан байна. Энэ тэтгэлэгт жил бүр манай МУИС-аас хэд хэдэн оюутан хамрагддаг байсан гэдэг мэдээллийг сонсоход таатай байна.
Өнөөдөр манай хоёр байгуллага Ажиа Гэгээний нэрэмжит “Зөв” тэтгэлэгийг МУИС-ийн суралцагчдад зориулан олгохоор хамтын ажиллагааны гэрээ байгуулж байна. Энэ гэрээг маш хариуцлагатай, харилцан тодорхой үүрэг хүлээж хамтарч ажиллах гэрээ гэж үзэж байна.
Ажиа гэгээний тэтгэлгийн сангаас 70 хувь, МУИС-иас 30 хувийн төлбөрийн хөнгөлөлт үзүүлнэ. Энэ тэтгэлгийг бусад тэтгэлэгтэй харьцуулахад хэд хэдэн давуу талтай байна гэж харж байна. Нэгдүгээрт: энэ тэтгэлэгт сонгон шалгаруулахдаа яах аргагүй зөв хүнд нь зөв тэтгэлгээ өгье гэсэн болзолтой, Хоёрдугаарт: сонгон шалгаруулахдаа сурлагын амжилт, амьдралын нөхцөл байдал, тухайн хүүхдийнх нь хандлагыг нь хардаг, Гуравдугаарт: энэ тэтгэлгийг олгохын өмнө болон олгосныхоо дараа тэтгэлэг авсан суралцагчидтайгаа байнгын холбоотой байж, сурлагад нь анхаараад зогсохгүй хувь хүн болж төлөвшихөд нь анхаардаг, Дөрөвдүгээрт: тэтгэлгийг 1 удаа биш, сургуулиа амжилттай төгсөх хүртэл олгох давуу талтай байгаад бид олзуурхаж байна.
Энэ тэтгэлэг үнэхээр зөв тэтгэлэг байгаа учраас Монголын олон залуучуудыг зөв замд нь хөтөлж, амьдралд тус дэм болно гэж итгэж байна. Энэ сайхан тэтгэлгийг бий болгосон Ажиа гэгээн болон Монгол улсаа хариуцан ажиллаж байгаа та бүхэнд МУИС-ийн захиргааны нэрийн өмнөөс болон хувиасаа талархал илэрхийлье.
АЖИА ГЭГЭЭНИЙ НЭРЭМЖИТ “ЗӨВ” ТЭТГЭЛГИЙН ШАЛГУУР
- Монгол Улсын 17-19 насны иргэн байх
- Анх удаа их, дээд сургуульд элсэн суралцагч байх
- МУИС-д бакалаврын ангид элсэлтийн ерөнхий шалгалт өгч тэнцсэн байх
- Сурлагын голч дүн 3- ба түүнээс дээш байх.
- Боловсролын зээлийн сангаас ижил төрлийн тэтгэлэг авах эрх үүсээгүй байх
- Ар гэрийн санхүүгийн чадамж дундаас доогуур түвшинд байгаагаа үнэн, зөв тодорхойлсон байх
- Суралцагч үндсэн мэргэжлээрээ болон өөрийгөө хөгжүүлэх чиглэлээр оролцсон арга хэмжээ, үйл ажиллагааныхаа талаар тайлан, тодорхойлолтыг хавсаргасан байх;
- Суралцагч тогтмол сайн дурын ажил хийсэн байх /тодорхойлолт/;
- Ёс зүй, харилцаа, хандлагаараа үлгэр жишээч оюутан байх /мэргэжлийн тэнхимийн багшийн тодорхойлолт/,
ТЭТГЭЛЭГ ЗАРЛАГДАХ ХУГАЦАА: 2022 оны Элсэлтийн ерөнхий шалгалт болохоос 7 хоногийн өмнө зарлагдах болно.
Мэдээлэл авах утас: 77307730-1514, n.altanzul@num.edu.mn
ОЮУТАН, ТӨГСӨГЧИЙН ХЭЛТЭС
