МУИС-ийн Ойн хүрээлэн Засгийн газрын хэрэгжүүлэгч агентлаг Ойн газартай хамтран “Тэрбум мод үндэсний хөдөлгөөнд эрдэм шинжилгээний байгууллагуудын оролцоо” сэдэвт зөвлөлдөх уулзалтыг 2024 оны 12 дугаар сарын 23-нд амжилттай зохион байгууллаа.
Уг зөвлөлдөх уулзалтын зорилго нь Монгол Улсын Ерөнхийлөгчийн санаачилсан Тэрбум мод үндэсний хөдөлгөөнийг үр дүнтэй хэрэгжүүлэхэд эрдэм шинжилгээний байгууллагуудын оролцоог хангах, төрийн болон сургалт, эрдэм шинжилгээний байгууллагын хамтын ажиллагааг сайжруулах талаар хэлэлцэн зөвлөмж боловсруулан шийдвэр гаргагчидад хүргүүлэхэд оршино.
Зөвлөлдөх уулзалтад МУИС, ХААИС, ОУУБИС болон ШУА-ийн Ботаникийн цэцэрлэгт хүрээлэнгийн Ойн фитоценологийн лаборатори, Газарзүй, Геоэкологийн хүрээлэнгийн Ойн нөөц хамгааллын болон Цөлжилтийн судалгааны салбарууд, ШУТИС-ийн харьяа Ой модны сургалт, судалгааны хүрээлэнгийн төлөөлөл илтгэл тавьж хэлэлцүүлэн, Тэрбум үндэсний хөдөлгөөний хүрээнд хэрэгжүүүлж буй төсөл, хөтөлбөр, гэрээт ажлын талаар мэдээлэлээ хуваалцан, цаашид хамтран ажиллах боломж, чиглэлүүдийн талаар санал солилцсон юм.
Уулзалтын явцад оролцогчид илтгэгчидээс сонирхсон асуултуудад хариулт авахын зэрэгцээ цаашид Тэрбум үндэсний хөдөлгөөний хэрэгжилтийг хангахад эрдэм шинжилгээний байгууллагууд хамтран эрэлт шаардлагатай боловсон хүчнийг бэлтгэх болон ойжуулалт, нөхөн сэргээлтийн технологийн шинжлэх ухааны үндэслэлийг боловсруулахад хувь нэмрээ оруулахын чухлыг онцолж, зөвлөмжийг Ойн газарт хүргүүллээ.
