Олон нийтийг хүмүүнлэгийн үйлсэд уриалж үндэсний хэмжээнд цус, цусан бүтээгдэхүүний нөөц бүрдүүлэх зорилгоор 2022 оноос хойш Анагаахын Шинжлэх Ухааны Үндэсний Их Сургуулийн санаачилгаар Цус сэлбэлт судлалын үндэсний төвтэй хамтран их дээд сургуулиудын дунд зохион байгуулж байгаа “Дусал цус – Дүүрэн амьдрал” цус бэлэглэх аян 2025 оны 4 сарын 2-ны өдөр Монгол Улсын Их Сургуулиас эхэлж, нээлтээ хийлээ.
Тус аяны нээлтэд АШУҮИС-аас Оюутны хөгжил, удирдлагын газрын дарга, анагаах ухааны доктор Д.Оюунбилэг, мэргэжилтэн М.Золжаргал, Цус сэлбэлт судлалын үндэсний төвийн захирал, анагаах ухааны доктор Н.Эрдэнэбаяр нар ирж МУИС-ийн Оюутны хөгжлийн газрын дарга доктор Б.Цэцэнцолмон, оюутны хөгжил хариуцсан ахлах мэргэжилтэн Л.Чинзориг нарт шилжин явах цомыг гардуулан өглөө.
Аяны хүрээнд МУИС дээр зохион байгуулагдаж байгаа цус хандивлах үйл ажиллагаа нь 2025 оны 4 сарын 1, 2 болон 4-ний өдрүүдэд 09:00-12:00 цагийн хооронд Багш, оюутны хөгжлийн төвийн 5 давхарт болж байгаа бөгөөд өдөрлөгийн 2 дахь өдрийн байдлаар 200 гаруй хүн цусаа хандивласан таатай мэдээтэй байна.
Аянд идэвхтэй оролцож байгаа оюутан суралцагч, багш ажилтнууддаа талархал илэрхийлье.
Оюутны хөгжлийн газар
