Монгол Улсын Их Сургуулийн ректор, профессор Б.Очирхуяг, Хэнтий аймгийн Засаг дарга Д.Аюурбуньтай хамтын ажиллагааны санамж бичигт гарын үсэг зурлаа.
Хамтын ажиллагааны хүрээнд талууд Боловсрол, хүний нөөц, Үйлдвэрлэл судалгаа шинжилгээний чиглэлээр хамтран ажиллах юм. Тухайлбал, Боловсрол, хүний нөөцийн чиглэлээр ЕБС-ийн багш, ажилтнуудыг чадавхжуулах, хөдөлмөрийн зах зээлийн эрэлтэд тулгуурлан МУИС-ийн мэргэжлийн хөтөлбөрүүдэд залуучуудыг элсүүлэх, Үйлдвэрлэл, судалгаа, шинжилгээний чиглэлээр хамтын оффис, салбар дундын лаборатори, судалгаа мэдээллийн төв, ухаалаг цахим танхим байгуулах, Шинжлэх ухаан технологийн Улаанбаатар паркд бойжиж буй шинэ технологи инновацыг аймгийн жижиг дунд үйлдвэрлэл эрхлэгч, шинэ хоршоо төслүүдэд нэвтрүүлэх, бүс нутгийн хөгжлийг хурдасгах зорилгоор гарааны бизнесийг дэмжих BootCamp хөтөлбөрийг хэрэгжүүлэх, мөн байгаль хамгаалал, уур амьсгалын өөрчлөлт, тогтвортой хөгжлийн чиглэлээр хамтран ажиллана.
Түүнчлэн Хэнтий аймгийн нийгэм эдийн засаг, боловсрол, хүний нөөцийн хөгжилд дэмжлэг үзүүлэх, мэдлэгийг нийгэм, эдийн засгийн эргэлтэд оруулах зорилгоор сургалт инновац, стартапын экосистемийг бүрдүүлэн шинжлэх ухаан технологийн сүлжээг бий болгож судалгаа хөгжүүлэлт, инновацийн санхүүжилтийн олон эх үүсвэрт тогтолцоо бүхий төр- шинжлэх ухаан, үйлдвэрлэл бизнесийн түншлэлийн таатай орчин бүрдүүлэх зорилго тавин ажиллаж байгаа юм.
Гэрэл зургийн эх сурвалж: Хэнтий аймгийн Засаг даргын Тамгын газар
