Өнөөдөр /2025.04.04/ Монгол Улсын Гавьяат багш, доктор, дэд профессор, МУИС-ийн Удирдах зөвлөлийн гишүүн, МУИС-ийн Үйлдвэрчний эвлэлийн хорооны дарга Дашдэлэгийн Дашдулам агсныг Монгол Улсын Их Сургуулиас сүүлчийн замд нь үдлээ.
Монгол Улсын Гавьяат багш, доктор, дэд профессор Дашдэлэгийн Дашдулам нь олон зуун шавь нартаа эрдэм мэдлэгийг түгээж, амьдралын гараанд нь бэлтгэхийн зэрэгцээ түүх, соёл, шашин зэрэг өргөн хүрээнд судалгааныхаа ажлуудыг туурвиж байсан юм. Тухайлбал, Монгол Улсын шинэхэн түүх, түүхэн сэтгэл судлал, улс төрийн харилцааны түүх, Бурхны шашны түүх, олон улсын харилцааны түүх, Монгол-Япон, Монгол-Оросын харилцаа, монголчуудын сэтгэлгээ, хандлага, өөрчлөлтийн талаар эрдэм шинжилгээ, судалгаагаа туурвиж байжээ.
Тэрээр Ерөнхийлөгчийн ивээл дор хийгдсэн “ХХ зууны Монгол” төслийн ерөнхий таван зөвлөхийн нэгээр ажиллаж, “Сэрсэн зууны түүх” цуврал баримтат түүхэн кинонуудыг бүтээхэд хувь нэмрээ оруулсан юм.
Монгол Улсын Гавьяат багш Д.Дашдулам агсны боловсрол, шинжлэх ухааны салбарт үлдээсэн зам мөр, ажилч хичээнгүй, шударга бөгөөд тууштай, хүнлэг дүр төрх, зан чанар нь бидний сэтгэл зүрхэнд үүрд мөнхөрч үлдэх болно.
Монгол Улсын Их Сургууль
